AKP ភ្នំពេញ ថ្ងៃទី១២ ខែមិថុនា ឆ្នាំ២០២៥--
ឯកឧត្ដម Anatoly Bororik ឯកអគ្គរដ្ឋទូតនៃប្រទេសរុស្ស៊ីប្រចាំនៅកម្ពុជាបានថ្លែងបញ្ជាក់ថា រុស្ស៊ីកំពុងរំពឹងទុកថា កិច្ចសន្ទនាប្រពៃណីក្នុងវិស័យការអប់រំមានលក្ខណៈកាន់តែស៊ីជម្រៅរវាងរុស្ស៊ី និងកម្ពុជា ដោយក្នុងរយៈពេលជាច្រើនទសវត្សរ៍នៃទំនាក់ទំនងរបស់ប្រទេសទាំងពីរ ប្រជាពលរដ្ឋកម្ពុជាជាង ៨ ពាន់នាក់ បានសិក្សានៅក្នុងសាកលវិទ្យាល័យរុស្ស៊ី និងអតីតសហភាពសូវៀត។ ការថ្លែងបញ្ជាក់របស់ឯកអគ្គរដ្ឋទូតរុស្ស៊ីបែបនេះ ក្នុងពិធីជប់លៀងរដ្ឋនាឱកាសទិវានៃប្រទេសរុស្ស៊ី កាលពីយប់ថ្ងៃទី១១ ខែមិថុនា ឆ្នាំ២០២៥ នៅសណ្ឋាគារសូហ្វីតែល ភ្នំពេញ ដោយមានការអញ្ជើញចូលរួមពីលោកជំទាវ អ៊ាត សោភា រដ្ឋមន្ត្រីស្តីទីក្រសួងការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា។
ឯកឧត្ដម Anatoly Bororik មានប្រសាសន៍សម្ដែងនូវសេចក្តីរីករាយដោយឃើញអតីតនិស្សិត ជាច្រើន ដែលបានបញ្ចប់ការសិក្សានៅរុស្ស៊ី  ក្នុងចំណោមភ្ញៀវថ្ងៃនេះ។ យើងបន្តអភិវឌ្ឍន៍វិស័យនេះ ដោយបង្កើនចំនួនអាហារូបករណ៍ដល់ ៥៥ សម្រាប់ពលរដ្ឋនៃព្រះរាជាណាចក្រកម្ពុជា ដែលមានបំណងសិក្សានៅប្រទេសរុស្ស៊ី។ ឯកឧត្ដមឯកអគ្គរដ្ឋទូតបានបញ្ជាក់ថា៖ «យើងវាយតម្លៃខ្ពស់ ចំពោះចំណាប់អារម្មណ៍របស់ដៃគូរបស់យើងក្នុងការពង្រីកទំនាក់ទំនងក្នុងវិស័យវប្បធម៌។ យើងរំពឹងថាទិវាវប្បធម៌រុស្ស៊ីនៅកម្ពុជា ដែលគ្រោងរៀបចំនៅឆ្នាំ២០២៥ នឹងជំរុញបន្ថែមនូវអន្តរកម្មក្នុងវិស័យនេះ»។

ជាមួយគ្នានេះ ឯកឧត្ដមឯកអគ្គរដ្ឋទូតជឿជាក់ថា បទពិសោធន៍ប្រវត្តិសាស្ត្រដ៏សម្បូរបែប ប្រពៃណីល្អ និងអាកប្បកិរិយាស្ថាបនា នឹងជួយយើងស្វែងរកឱកាសថ្មីៗ ដើម្បីពង្រីកកិច្ចសហប្រតិបត្តិការជាក់ស្តែង និងការផ្លាស់ប្តូរជាផលប្រយោជន៍ទៅវិញទៅមក ដើម្បីជាប្រយោជន៍ដល់ប្រជាជននៃប្រទេស យើងទាំងពីរ។

បើតាមឯកឧត្ដម Anatoly Bororik ឯកអគ្គរដ្ឋទូតនៃប្រទេសរុស្ស៊ីប្រចាំនៅកម្ពុជា ការរៀបចំកម្មវិធីនេះជាខួបលើកទី៣៥ នៃការប្រកាសសេចក្តីថ្លែងការណ៍ស្តីពីអធិបតេយ្យភាពរដ្ឋនៃសាធារណរដ្ឋសង្គមនិយមសហព័ន្ធសូវៀតរុស្ស៊ី ហើយថ្ងៃទី១២ ខែមិថុនា ឆ្នាំ១៩៩០ បានក្លាយទៅជាចំណុចចាប់ផ្តើមនៃដំណាក់កាលថ្មីមួយនៅក្នុងប្រវត្តិសាស្ត្ររាប់សតវត្សរ៍ នៃប្រទេសរុស្ស៊ី។ ឯកឧត្ដមបន្ដថា ចាប់តាំងពីពេលនោះមក យើងបានពុះពារការលំបាកទាំងអស់នៃការផ្លាស់ប្តូរ ដោយជោគជ័យ ពង្រឹងអធិបតេយ្យភាព និងសេដ្ឋកិច្ចរបស់យើង។ 
ក្នុងឱកាសនោះ ឯកឧត្ដមឯកអគ្គរដ្ឋទូតបានបន្ដទៀតថា រុស្ស៊ី តែងតែជាសម្ព័ន្ធមិត្ត ដ៏ស្មោះត្រង់របស់ប្រទេសកំពុងអភិវឌ្ឍន៍។ សព្វថ្ងៃនេះ យើងបន្តការពារ សមភាព អធិបតេយ្យភាព ការមិនជ្រៀតជ្រែកក្នុងកិច្ចការផ្ទៃក្នុង និងប្រឆាំងនឹងការអនុវត្តរបបអាណា និគមនិយមថ្មី។
ឯកឧត្ដម ឯកអគ្គរដ្ឋទូតក៏បានបញ្ជាក់បន្ថែមថា៖ «កម្ពុជា ពិតជាប្រទេសមួយ ក្នុងចំណោមមិត្តដ៏ជិតស្និទ្ធរបស់រុស្ស៊ី ហើយម៉ូស្គូ និងភ្នំពេញតភ្ជាប់ដោយ ចំណងមិត្តភាពជាប្រពៃណី។ សហភាពសូវៀតបានផ្តល់ការគាំទ្រដ៏ធំធេងដល់ប្រទេសកម្ពុជា ដោយដើរតួនាទីសំខាន់បំផុតក្នុងការស្តារប្រទេសឡើងវិញ បន្ទាប់ពីការផ្តួលរលំរបបប្រល័យ ពូជសាសន៍ ខ្មែរក្រហម។ ថ្ងៃនេះ យើងនៅតែបន្តកិច្ចសហប្រតិបត្តិការដ៏សកម្មនេះ។»

ឯកឧត្ដម Anatoly Bororik បានកត់សម្គាល់ផងដែរថា កិច្ចសន្ទនា នយោបាយ ទំនាក់ទំនងអន្តរសភា និងអន្តរបក្ស កំពុងតែរីកចម្រើន។ នៅខែវិច្ឆិកា ឆ្នាំ២០២៤ គណបក្សរួបរួមរុស្ស៊ីបានចូលរួមក្នុងមហាសន្និបាតសន្និសីទអន្តរជាតិនៃបណ្ដាគណបក្សនយោបាយនៅអាស៊ី លើកទី១២។ នៅចុងខែ ឧសភា គណៈប្រតិភូគណបក្សប្រជាជនកម្ពុជា  បានចូលរួមក្នុងកិច្ចប្រជុំ លើកទី៤៣ នៃគណៈកម្មាធិការអចិន្ត្រៃយ៍មហាសន្និបាតសន្និសីទអន្តរជាតិនៃបណ្ដាគណបក្ស នយោ បាយនៅអាស៊ី នៅទីក្រុង Perm។ ទន្ទឹមនេះ ដៃគូរបស់យើងបានយកចិត្តទុកដាក់ដល់វេទិកាស្ត្រីអឺរ៉ាស៊ីលើកទី៤ កិច្ចប្រជុំនៃគណៈកម្មាធិការអចិន្ត្រៃយ៍នៃសភាអាស៊ីស្តីពីបញ្ហាសង្គម និងវប្បធម៌ និងសមាជអេកូឡូស៊ី អន្តរជាតិ Nevsky លើកទី១១។

ឯកឧត្ដមឯកអគ្គរដ្ឋទូតក៏បានអះអាងថា ការពង្រឹងទំនាក់ទំនងពាណិជ្ជកម្ម សេដ្ឋកិច្ច និងធុរកិច្ច មានសារៈសំខាន់ដែរ។ ភស្តុតាងនៃអន្តរកម្មនេះ គឺជាកិច្ចប្រជុំលើកទី១១ នៃគណៈកម្មការអន្តររដ្ឋាភិបាលរុស្ស៊ី-កម្ពុជា ស្តីពីកិច្ចសហប្រតិបត្តិការពា ណិជ្ជ កម្ម សេដ្ឋកិច្ច វិទ្យាសាស្ត្រ និងបច្ចេកទេស ដែលត្រូវបានធ្វើឡើងកាលពីខែមេសា ឆ្នាំ២០២៥។ នៅខែឧសភា នៅម៉ូស្គូ តំណាងធុរកិច្ចរុស្ស៊ី និងកម្ពុជាបានពិភាក្សាអំពីលទ្ធភាពនៃការពង្រីកកិច្ចសហ ប្រតិបត្តិការក្នុងវិស័យកសិកម្ម ភស្តុភារ ទេសចរណ៍ សំណង់ និងឱសថ។ ជាមួយគ្នានេះ អន្តរកម្មក្នុងវិស័យសន្តិសុខកំពុងកើនឡើង។ ស្ថាប័នសាមីខ្លួនកម្ពុជាបានអញ្ជើញចូលរួមក្នុងវេទិកា ច្បាប់អន្តរជាតិ នៅទីក្រុង St. Petersburg កិច្ចប្រជុំអន្តរជាតិនៃអ្នកតំណាងជាន់ខ្ពស់ទទួលបន្ទុក សន្តិសុ ខនិងព្រឹត្តិការណ៍នានាក្នុងវិស័យ បច្ចេកវិទ្យាព័ត៌មាននិងទំនាក់ទំនង។ លើសពីនេះទៀត ដំណាក់កាលដ៏សំខាន់មួយក្នុងកិច្ចសហប្រតិបត្តិការយោធា គឺជាការសំចតរបស់នាវារុស្ស៊ីនៅ ខេត្តព្រះសីហនុ។ ឯកឧត្ដមឯកអគ្គរដ្ឋទូតក៏សង្ឃឹមថា យើងនឹងបន្តប្រពៃណីដ៏ល្អនេះនៅថ្ងៃអនាគត។

ឯកឧត្ដម Anatoly Bororik ឯកអគ្គរដ្ឋទូតរុស្ស៊ីប្រចាំកម្ពុជាបានអះអាងដែរថា៖ «អន្តរកម្មរវាងភ្នាក់ងារអនុវត្តន៍ច្បាប់នៃប្រទេសយើងទាំងពីរកម្ពុជា និងរុស្ស៊ី កំពុងតែអភិវឌ្ឍន៍ជាលំដាប់។ ដំណើរទស្សនកិច្ចលើកដំបូងរបស់ឯកឧត្តម Igor Krasnov អគ្គរដ្ឋអាជ្ញានៃប្រទេសរុស្ស៊ី មកកាន់ព្រះរាជាណាចក្រកម្ពុជាបានក្លាយទៅជាព្រឹត្តិការណ៍ដ៏សំខាន់មួយ នៅក្នុងប្រវត្តិសាស្ត្រនៃទំនាក់ទំនងរបស់យើង»៕

ដោយ៖ រិទ្ធី