AKP ភ្នំពេញ ថ្ងៃទី២៦ ខែកក្កដា ឆ្នាំ២០២៥ -- ឯកឧត្ដម ជា ធីរិទ្ធ អ្នកនាំពាក្យសម្ដេចតេជោបានឱ្យដឹង នៅថ្ងៃទី ២៦ ខែកក្កដា ឆ្នាំ២០២៥ ថា ថ្ងៃទី ៣ នៃសត្រូវឈ្លានពាន តេជោសែន បន្តផ្តល់ប្រឹក្សាយុទ្ធសាស្រ្តយោធាដល់សម្តេចធិបតី និងបណ្តាមេទ័ពដើម្បីវាយខ្មាំងដោយភាពហានក្លា និងកំពុងបំពេញភារៈដ៏សកម្មជាអគ្គភស្តុភារជាន់ខ្ពស់របស់កងទ័ព។ ឯកឧត្ដមបន្តថា  ទោះបី ៣ ថ្ងៃមកនេះ សម្តេចតេជោមិនសូវបានសម្រាក តែលោកនៅតែអាចអង្គុយចាំផ្តល់យុទ្ធវិធីនិងកម្លាំងចិត្តប្រកបដោយថាមពលនិងភាពមុតស្រួចដល់វីរៈកងទ័ពរបស់យើង។ ស្មារតីតេជោសែន នៅជាមួយអ្នកប្រយុទ្ធរបស់យើងគ្រប់ពេល។ 

ឯកឧត្តមបានលើកឡើងថា រដ្ឋបុរសដែលបានឆ្លងកាត់សមរភូមិស្ទើរតែ ៤ ភាគ៥ នៃជីវិតរូបនេះបញ្ជាក់ថា សម្រាប់កងទ័ព ការប្រយុទ្ធក្នុងសមរភូមិដ៏មានមោទកភាពបំផុត គឺការប្រយុទ្ធការពារដីដូនតា ប្រឆាំងបរទេសឈ្លានពាន ដែលវាខុសពីការប្រយុទ្ធរវាងខ្មែរគ្នាឯង៕

ដោយ៖ ជឹម ណារី