AKP ភ្នំពេញ ថ្ងៃទី០១ ខែសីហា ឆ្នាំ២០២៥--កម្ពុជានឹងទិញយន្ដហោះ Boeing 737 mx 8 ចំនួន ១០ គ្រឿង ពីសហរដ្ឋអាមេរិក ហើយមានជម្រើសអាចបង្កើនទិញ ១០ គ្រឿង បន្ថែមទៀត នាពេលអនាគត ដែលនឹងអាចដឹកមកដល់កម្ពុជានៅឆ្នាំ២០៣១ខាងមុខ។ នេះបើតាមការបញ្ជាក់របស់ឯកឧត្តមឧបនាយករដ្ឋមន្រ្តី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ក្នុងសន្នីសីទសារព័ត៌មាន ស្តីពីលទ្ធផលនៃអត្រាពន្ធគយបដិការរវាងកម្ពុជា និងសហរដ្ឋអាមេរិក នាព្រឹកថ្ងៃទី ០១ ខែសីហា ឆ្នាំ២០២៥ នៅក្រុមប្រឹក្សាអភិវឌ្ឍន៍កម្ពុជា។

ឯកឧត្តម ឧបនាយករដ្ឋមន្រ្ដី ស៊ុន ចាន់ថុល បានបញ្ជាក់យ៉ាងដូច្នេះថា៖«ទិញយន្ដហោះ Boeing 737 mx8 ចំនួន ១០គ្រឿង ពីអាម៉េរិក ហើយមានជម្រើសអាចបង្កើនទិញ១០គ្រឿងបន្ថែមទៀត។ នៅខែសីហានេះ អាចនឹងចុះកិច្ចព្រមព្រៀងមួយបញ្ជាក់ពីការទិញ  ប៉ុន្តែចំពោះការទិញយន្តហោះនេះមិនអាចងាយមកទេ ព្រោះថានៅរោងចក្រ Boeing បានពេញអស់ ហើយនៅឆ្នាំ២០៣១ ទើបមានយន្តហោះថ្មីនេះ យើងបានចុះកិច្ចព្រមព្រៀងគ្នាមែន តែដល់ឆ្នាំ២០៣១ ទើបយន្តហោះថ្មីនេះ អាចចូលមកកម្ពុជាបាន»។ ឯកឧត្តមឧបនាយករដ្ឋមន្រ្ដី ស៊ុន ចាន់ថុល បានលើកឡើងថា ក្រៅពីនោះមិនមានលក្ខខ័ណ្ឌអ្វីទេ ក្រៅពីនិយាយកុំឱ្យមាននីតិវិធីស្មុគស្មាញ។

ជាមួយគ្នានេះ ឯកឧត្តម ឧបនាយករដ្ឋមន្រ្ដី ស៊ុន ចាន់ថុល បានបន្ថែមថា កម្ពុជាបានធ្វើការសិក្សា និងសម្រួលឱ្យមានភាពងាយស្រួលដល់អ្នកវិនិយោគទុនដែលមានបំណងចង់ធ្វើការបណ្តាក់ទុនរកស៊ី និងបង្កើតរោងចក្រនៅក្នុងប្រទេសកម្ពុជារួចហើយ។ ឯកឧត្ដមឧបនាយករដ្ឋមន្រ្ដីក៏បានអះអាងថា កម្ពុជាបានសម្រេចកាត់បន្ថយពន្ធសូន្យភាគរយ ហើយរាល់មុខទំនិញរបស់សហរដ្ឋអាមេរិកដែលនាំចូលមកកម្ពុជាគឺមិនមានយកពន្ធទេគឺអត្រាពន្ធសូន្យក្នុងនោះក៏មានរថយន្តមួយទឹកផងដែរ។

ដោយ៖ ប៊ុនរិទ្ធ