AKPbសៀមរាប ថ្ងៃទី១៥ ខែសីហា ឆ្នាំ២០២៥--

ក្នុងស្មារតីខ្មែររួបរួមសាមគ្គីគ្នា លើកទឹកចិត្តដល់បងប្អូនកងទ័ពដែលកំពុងឈរជើងតាមបន្ទាត់ព្រំដែន ព្រះគ្រូចៅអធិការវត្តមុនធ្យាន ស្ថិតនៅភូមិគោកឬស្សីខាងជើង ឃុំដានរុន ស្រុកសូទ្រនិគមខេត្តសៀមរាប នៅថ្ងៃទី១៥ ខែសីហា ឆ្នាំ២០២៥នេះ បានរៀបចំឱ្យញាតិញោម វេចនំអន្សម កន្តំ អន្សមក្បុង បាយក្រៀមបំពង សរុបប្រមាណចំនួន ៥០០០ នំ និងរៀបចំអំបុកឆាចំនួន៥០០គីឡូក្រាម ដើម្បីយកទៅជូនដល់បងប្អូនកងទ័ពដែលកំពុងបំពេញភារកិច្ច ការពារបូរណភាពទឹកដី នៅតាមខ្សែបន្ទាត់ព្រំដែនក្នុងភូមិសាស្ត្រខេត្តឧត្ដរមានជ័យ។

ព្រះតេជគុណ លន់ សំប៊ី ព្រះចៅអធិការវត្តមុនធ្យាន បានមានសង្ឃដីកាថា  ការរៀបចំការវេចនំអន្សមនេះឡើង គឺដើម្បីបង្ហាញនូវទឹកចិត្ត ក្នុងស្មារតីខ្មែររួបរួមសាមគ្គីគ្នាលើកទឹកចិត្តដល់បងប្អូនកងទ័ពយើង ដែលកំពុងឈរជើងការពារបូរណភាពទឹកដីពីការឈ្លានពានពីប្រទេសថៃហើយក៏ដូចជាបញ្ជាក់ពីទឹកចិត្តរបស់ជនរួមជាតិ ខ្មែរជួយខ្មែរ ដែលជាការចូលរួមចំណែកលើកម្លាំងចិត្តក្នុងការការពារទឹកដី និងជាតិមាតុភូមិ។

ព្រះតេជគុណបន្តថា ក្រៅពីនំអន្សមចំនួនប្រមាណ៥០០០ នំ ព្រះអង្គក៏មានគ្រឿងឧបភោគបរិភោគមួយចំនួនទៀត ដូចបាយសាច់ផាត់ ទឹកបរិសុទ្ធចំនួន១០០០យួរ  រួមជាមួយសម្ភារៈផ្សេងៗទៀត ដែលនឹងយកទៅជូនបងប្អូនកងទ័ពយើង ដែលឈរជើងនៅតាមបន្ទាត់ព្រំដែនក្នុងភូមិសាស្ត្រខេត្តឧត្ដរមានជ័យ នៅថ្ងៃទី១៦ ខែសីហា ឆ្នាំ២០២៥នេះ៕
ដោយ៖ ឃុត សៅ