AKP ភ្នំពេញ ថ្ងៃទី១៦ ខែសីហា ឆ្នាំ២០២៥– លោកជំទាវបណ្ឌិត គឹម សេដ្ឋានី រដ្ឋលេខាធិការប្រចាំការក្រសួងអប់រំ យុវជន និងកីឡា បានថ្លែងថា កម្ពុជាបានយកចិត្តទុកដាក់យ៉ាងខ្លាំងទៅលើការលើកកម្ពស់ និងពង្រីកនូវសេវាក៏ដូចជាគុណភាពនៃការអប់រំចាប់ពីកម្រិតមតេ្តយ្យសិក្សារហូតដល់មធ្យមសិក្សា និងផ្តោតសំខាន់ទៅលើការផ្តល់ឱកាសដល់កុមារតូចទទួលបាននូវការអប់រំ ដែលចាប់ផ្តើមចេញពីមតេ្តយ្យសិក្សាទៅ ហើយថាបច្ចុប្បន្ននេះនៅក្នុងបរិវត្តឧស្សាហកម្មទី៤.០ និងសម័យឌីជីថល ការអប់រំមានការប្រែប្រួលជាច្រើន។ ការលើកឡើងរបស់លោកជំទាវបណ្ឌិត គឹម សេដ្ឋានី យ៉ាងដូច្នេះក្នុងពិធីប្រគល់វិញ្ញាបនបត្របញ្ចប់ការសិក្សាថ្នាក់មត្តេយ្យ ឆ្នាំសិក្សា ២០២៤-២០២៥ នៃសាលាវេស្ទើនអន្តរជាតិ នាថ្ងៃទី១៦ ខែសីហា ឆ្នាំ២០២៥។  

លោកជំទាវរដ្ឋលេខាធិការប្រចាំការបានគូសបញ្ជាក់ថា ការអប់រំកុមារតូចគឺជាមូលដ្ឋានគ្រឹះដ៏សំខាន់សម្រាប់សិស្សានុសិស្សឱ្យទទួលបានទាំងជំនាញរឹង និងជំនាញទន់ ការសិក្សាពេញមួយជីវិត និងបំណិនសតវត្សរ៍ទី២១ ដូចជាការគិតស៊ីជម្រៅ និងជំនាញដោះស្រាយបញ្ហាជាដើម ដែលទាំងអស់នេះគឺជាស្ពានដើម្បីឱ្យក្មួយៗត្រៀមខ្លួនរួចរាល់ក្នុងដំណើរសិក្សាបន្តបន្ទាប់ទៀត។ បន្ថែមពីនេះ លោកជំទាវបណ្ឌិតរដ្ឋលេខាធិការប្រចាំការបានលើកឡើងពីវិធីសាស្ត្របង្រៀនកុមារតូចគឺ "ការរៀនតាមរយៈការលេង" ដោយការលេងនេះគឺគោរពទៅតាមគោលការណ៍នៃការអភិវឌ្ឍកុមារទាំងប្រាជ្ញា បំណិនសង្គម និងការអភិវឌ្ឍរាងកាយជាដើម ដោយទាំងអស់នេះនឹងជួយឱ្យពួកគេមានបំណិនក្នុងការសិក្សាពេញមួយជីវិត និងបំណិនសង្គមដូចជាមានភាពក្លាហាន ចេះចែករំលែក ចេះធ្វើការងារជាក្រុម ឈានទៅរកភាពជោគជ័យក្នុងការសិក្សាបន្តបន្ទាប់ទៀត ទាំងក្នុងកម្រិតថ្នាក់មតេ្តយ្យសិក្សា បឋមសិក្សា មធ្យមសិក្សា ឧត្តមសិក្សា ក៏ដូចជាការសិក្សាពេញមួយជីវិតផងដែរ។ តាងនាមក្រសួងអប់រំ យុវជន និងកីឡា លោកជំទាវបណ្ឌិត រដ្ឋលេខាធិការប្រចាំការ សូមចូលរួមអបអរសាទរដល់ក្មួយៗសិស្សានុសិស្សជ័យលាភីទាំងអស់ដែលបានខិតខំប្រឹងប្រែងរហូតសម្រេចបាននូវសមិទ្ធផលនេះ និងមានការជឿជាក់ថាក្មួយៗនឹងបន្តភាពជោគជ័យក្នុងការសិក្សាបន្ថែមទៀតនាពេលអនាគត៕

ដោយ៖ ចាន់ សុភឿន (ប្រភព៖ ក្រសួងអប់រំ)