AKP ភ្នំពេញ ថ្ងៃទី១៩ ខែសីហា ឆ្នាំ២០២៥-- លោកជំទាវ អ៊ឹម រចនា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី១៨ ខែសីហា ឆ្នាំ២០២៥ បានដឹកនាំក្រុមការងារជំនាញទៅកាន់ទីស្នាក់ការប៉ុស្តិ៍ឆ្មាំទន្លេអភិក្សសត្វផ្សោតត្បូងខ្លានៃខេត្តស្ទឹងត្រែង ដើម្បីចែករំលែកបទពិសោធន៍នៃការគ្រប់គ្រងអភិរក្សសត្វផ្សោតទឹកសាបនៅប្រទេសចិន ជូនដល់ឆ្មាំទន្លេនៅក្នុងខេត្តស្ទឹងត្រែង បន្ទាប់ពីលោកជំទាវបានដឹកនាំដំណើរទស្សនកិច្ចសិក្សាការងារអភិរក្សផ្សោតនៅប្រទេសចិន កាលពីខែមិថុនា ឆ្នាំ២០២៥កន្លងទៅ។ 

ការចែករំលែកបទពិសោធន៍មានការចូលរួមផងដែរពីសំណាក់លោក អ៊ុក វិបុល ប្រធាននាយកដ្ឋានអភិរក្សជលផល នៃរដ្ឋបាលជលផល លោក ផៃ សុមានី អនុប្រធាននាយកដ្ឋានអភិរក្សជលផល លោក ភួង ទីណា នាយរងអធិការដ្ឋានរដ្ឋបាលជលផលមេគង្គ លោក ស្រី សមវិចិត្រ នាយខណ្ឌរដ្ឋបាលជលផលស្ទឹងត្រែង លោក អៀម សំអ៊ន់ ប្រធានកម្មវិធីតំណាងអង្គការ WWF នៅខេត្តក្រចេះនិងស្ទឹងត្រែង។

តាមរយៈបទបង្ហាញរបស់លោក ផៃ សុមានី អនុប្រធាននាយកដ្ឋានអភិរក្សជលផល លោកជំទាវ អ៊ឹម រចនា បានគូសបញ្ជាក់បន្ថែមថា ប្រទេសចិនគឺជាប្រទេសតែមួយគត់លើលោក ដែលទទួលបានជោគជ័យនៅក្នុងការអភិរក្សសត្វផ្សោតទឹកសាប Finless Porpoise នៅទន្លេយ៉ាងហ្សេ ឱ្យមានចំនួនកើនឡើងវិញប្រកបដោយស្ថិរភាព។

បើតាមលោកជំទាវ ជោគជ័យនៃការអភិរក្ស និងគ្រប់គ្រងសត្វផ្សោតទឹកសាបនៅទន្លេយ៉ាងហ្សេនៅប្រទេសចិន សម្រេចបានតាមរយៈការប្រើប្រាស់បច្ចេកវិទ្យាទំនើប ដែលកម្ពុជាកំពុងពិនិត្យលទ្ធភាព ថាតើអាចធ្វើបានលើចំណុចណាខ្លះ ទៅតាមធនធាន និងសមត្ថភាពដែលខ្លួនមាន។ 

លោកជំទាវ អ៊ឹម រចនា បាន ថ្លែងអំណរគុណចំពោះការប្ដេជ្ញាចិត្តខ្ពស់របស់មន្ដ្រីឆ្មាំទន្លេ និងក្រុមការងារជំនាញអភិរក្សផ្សោតនៃអង្គការ WWF កម្ពុជា ដែលបានបំពេញភារកិច្ចប្រកបដោយការទទួលខុសត្រូវខ្ពស់ ក្នុងការការពារសត្វផ្សោតទន្លេមេគង្គដែលជារតនសម្បត្តិរបស់ជាតិ ការបង្ក្រាបបទល្មើសនេសាទខុសច្បាប់ តាមរយៈការល្បាតចល័ត ២៤ម៉ោងលើ២៤ម៉ោង ជារៀងរាល់ថ្ងៃ  សង្ឃឹមថា មន្ដ្រីឆ្មាំទន្លេនឹងបន្តបំពេញតួនាទីភារកិច្ចរបស់ខ្លួន ដើម្បីថែរក្សានិងអភិរក្សធនធានជលផលកម្រ ជាពិសេសសត្វផ្សោតទន្លេមេគង្គនៅកម្ពុជាឱ្យកើនឡើងបន្ថែមទៀត៕

ដោយ៖ ពេជ្រ សំអឿន (ប្រភព៖ ក្រសួងកសិកម្ម រុក្ខាប្រមាញ់ និងនេសាទ)