AKP ភ្នំពេញ ថ្ងៃទី២៣ ខែសីហា ឆ្នាំ២០២៥--

ព្រឹទ្ធសភានៃព្រះរាជាណាចក្រកម្ពុជាសូមសម្តែងនូវការគាំទ្រយ៉ាងពេញទំហឹងចំពោះការ សម្រេចចិត្តជាគោលការណ៍របស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃ ព្រះរាជាណាចក្រកម្ពុជា ក្នុងការបោះបង់ចោលសញ្ញាបត្រកិត្តិយសទាំងអស់ដែលសម្តេច ទទួលបាន ពីសាកលវិទ្យាល័យថៃ ដូចដែលបានប្រកាសនៅលើទំព័រហ្វេសប៊ុកផ្លូវការរបស់សម្តេច នៅថ្ងៃទី២២ ខែសីហា ឆ្នាំ២០២៥។

យោងតាមសេចក្តីប្រកាសព័ត៌មានរបស់ព្រឹទ្ធសភានៅថ្ងៃទី២២សីហា ឆ្នាំ២០២៥បានលើកឡើងថាការសម្រេចចិត្តនេះឆ្លុះបញ្ចាំងឱ្យឃើញពីសុចរិតភាព និងការប្តេជ្ញាចិត្តឥតងាករេររបស់ សម្តេចតេជោ នៅក្នុងការការពារសេចក្តីថ្លៃថ្នូរ ឯករាជ្យភាព និងអធិបតេយ្យរបស់កម្ពុជា។ គុណតម្លៃ ទាំងអស់នេះ គឺមិនអាច និងមិនត្រូវបានកំណត់និយមន័យជាដាច់ខាតដោយសញ្ញាបត្រកិត្តិយសដែល ផ្តល់ដោយគ្រឹះស្ថានសិក្សាដែលជុំរុញដោយឱកាសនិយម និងការគណនានយោបាយនោះទេ។

ព្រឹទ្ធសភាកម្ពុជាសូមសម្តែងការសោកស្តាយយ៉ាងខ្លាំងដែលមេដឹកនាំថៃនៅតែបន្តធ្វើ សកម្មភាពប្រកបដោយអរិភាពនៅតាមព្រំដែនប្រឆាំងនឹងកម្ពុជា បើទោះបីជាមានការចុះហត្ថលេខាលើ កិច្ចព្រមព្រៀងបទឈប់បាញ់ក៏ដោយ។ ក្នុងពេលតែមួយ ពួកគេបានព្យាយាមបំភ្លៃការពិត និងបំភាន់ មតិសាធារណៈ ដែលស្តែងចេញឱ្យឃើញតាមរយៈប្រយោគមួយដែលប្រជាជនក្នុងតំបន់ពេញនិយម ប្រើគឺ “កុំមកបោកប្រាស់ខ្ញុំ ឬកុំមកកុហកខ្ញុំ” (Don't thai to me!) ព្រមទាំងបានវាយប្រហារដោយ គ្មានមូលដ្ឋានប្រឆាំងនឹង សម្តេចតេជោ ដែលជាបិតាសន្តិភាពរបស់កម្ពុជា។

កេរដំណែលពិតប្រាកដរបស់សម្តេចតេជោគឺត្រូវបានចារទុកនៅក្នុងជីវិតរបស់ប្រជាជនខ្មែរ រាប់លាននាក់ដែលបាននិងកំពុងទទួលបានផ្លែផ្កាពីសន្តិភាព ស្ថិរភាព កំណើន និងវឌ្ឍនភាពក្រោមការ ដឹកនាំប្រកបដោយគតិបណ្ឌិត និងចក្ខុវិស័យវែងឆ្ងាយរបស់សម្តេច។ សមិទ្ធផលរបស់សម្តេចមិនអាច រលាយបាត់ដោយសារតែការដកហូតគោរមងារ ឬសញ្ញាបត្រកិត្តិយសដែលបង្កប់ទៅដោយភាពមិន ស្មោះត្រង់នោះទេ។

ព្រឹទ្ធសភាសូមអំពាវនាវដល់ប្រជាពលរដ្ឋខ្មែរ និងមិត្តភក្តិបរទេសរបស់កម្ពុជាទាំងអស់នៅ ជុំវិញពិភពលោក សូមទទួលស្គាល់ថា កិត្តិយសពិតរបស់ សម្តេចតេជោ មិនមែនស្ថិតនៅលើក្រដាសមួយសន្លឹករបស់គ្រឹះស្ថានអប់រំថៃនោះទេ ប៉ុន្តែគឺស្ថិតនៅលើការប្តូរផ្តាច់របស់សម្តេចដើម្បី ប្រជាជនកម្ពុជា និងតួនាទីជាប្រវត្តិសាស្ត្ររបស់សម្តេចនៅក្នុងការការពារអធិបតេយ្យជាតិ និងក្នុងការ លើកកម្ពស់សន្តិភាព សន្តិសុខ ស្ថិរភាព និងវិបុលភាពក្នុងតំបន់។។

ព្រឹទ្ធសភាសូមបញ្ជាក់ជាថ្មីថា កម្ពុជានឹងមិនធ្វើសម្បទានឯករាជ្យភាព ឬសេចក្តីថ្លៃថ្នូររបស់ ជាតិជាដាច់ខាត នៅចំពោះមុខអរិភាពពីខាងក្រៅ។ ការសម្រេចចិត្តរបស់សម្តេចតេជោ ហ៊ុន សែន គឺ ជាការរំឭកដ៏មានឥទ្ធិពលមួយដែលថា ការគោរពចំពោះមេដឹកនាំម្នាក់មិនមែនកើតចេញពីការផ្តល់ឱ្យ ដោយអ្នកដទៃនោះទេ តែវាកើតចេញពីការបម្រើជាតិ និងប្រជាជនរបស់ខ្លួន ព្រមទាំងតាមរយៈការរួម ចំណែកដ៏មានអត្ថន័យដល់ប្រទេស និងប្រជាពលរដ្ឋជាមិត្ត៕

ដោយ៖ប៊ុនរិទ្ធ