AKP កំពង់ធំ ថ្ងៃទី០២ ខែតុលា ឆ្នាំ២០២៥

អាជ្ញាធរជាតិប្រយុទ្ធប្រឆាំងគ្រឿងញៀន និងគណៈកម្មាធិការត្រួតពិនិត្យគ្រឿងញៀនខេត្តកំពង់ធំបានរួមគ្នាផ្សព្វផ្សាយបញ្ហាគ្រឿងញៀននិងជំរុញការប្រើប្រាស់ App NoDrug ជូនដល់ប្រជាពលរដ្ឋនៅក្នុងឃុំសានគរ និងប្រជាសហគមន៍នេសាទបឹងស្ពង់ និងប្រជាសហគមន៍កសិកម្មសានគរមានជ័យដោយមានការចូលរួមពីអាជ្ញាធរថ្នាក់ខេត្ត ស្រុក ឃុំ នៅវត្តសានគរ ឃុំសានគរ ស្រុកកំពង់ស្វាយ ខេត្តកំពង់ធំ នារសៀលថ្ងៃទី០១ ខែតុលា ឆ្នាំ២០២៥ សរុបជាង៣០០នាក់។ 

លោក  ដួង ច័ន្ទដារ៉ា អភិបាលរងតំណាងលោកអភិបាលស្រុកកំពង់ស្វាយបានរាយការណ៍ពីស្ថានភាពភូមិសាស្រ្ត សេដ្ឋកិច្ច និងសន្តិសុខសណ្តាប់ធ្នាប់ពិសេសការបង្ការ ទប់ស្កាត់ បញ្ហាគ្រឿងញៀន ក្នុងមូលដ្ឋានស្រុកជាប់ផ្លូវជាតិ និងបឹងទន្លេសាបមួយនេះ។ 

ក្នុងនាម នាយឧត្តមសេនីយ៍ មាស វីរិទ្ធ អគ្គលេខាធិការ ឯកឧត្ដម ឧត្តមសេនីយ៍ឯក លឹម តុងហួត ប្រធាននាយកដ្ឋានផ្សព្វផ្សាយ អប់រំ និងទំនាក់ទំនងសាធារណៈ នៃអាជ្ញាធរជាតិប្រយុទ្ធប្រឆាំងគ្រឿងញៀនបានពាំនាំនូវការកោតសរសើរ ថ្លែងអំណរគុណពីឯកឧត្តមសន្តិបណ្ឌិត នេត សាវឿន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀនដល់អាជ្ញាធរ និងប្រជាពលរដ្ឋដែលបានសហការរួមគ្នាថែរក្សាបាននូវសន្តិសុខ  សណ្តាប់ធ្នាប់ និងបង្ការ ទប់ស្កាត់ បញ្ហាគ្រឿងញៀននិយាយជារួមខេត្តកំពង់ធំ និងនិយាយដោយឡែកស្រុកកំពង់ស្វាយ ។ 

ជាមួយគ្នានេះ ឯកឧត្ដមឧត្តមសេនីយ៍ឯកបានស្នើសុំដល់អាជ្ញាធរគ្រប់ថ្នាក់ ប្រជាពលរដ្ឋ និងប្រជាសហគមន៍នេសាទបឹងស្ពង់ និងប្រជាសហគមន៍កសិកម្មសានគរមានជ័យ សូមបន្តរួមគ្នាចូលរួមចំណែកក្នុងការងារប្រយុទ្ធប្រឆាំងគ្រឿងញៀន និងផ្សព្វផ្សាយលើកកម្ពស់ការទាញយកប្រើប្រាស់ App NoDrug សំដៅរក្សាសុវត្ថិភាពមូលដ្ឋានសហគមន៍៕

ដោយ៖ រិទ្ធី ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន