AKP បន្ទាយមានជ័យ ថ្ងៃទី០២ ខែតុលា ឆ្នាំ២០២៥-- ស្ថានភាពនៅតំបន់ព្រំដែនភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ មានភាពធម្មតា និងស្ងប់ស្ងាត់គិតត្រឹមរសៀលថ្ងៃទី០២ ខែតុលា ឆ្នាំ២០២៥នេះ។ ទោះបីជាយ៉ាងណាក៏ដោយ ក៏កងកម្លាំងទាហានកម្ពុជា និងប្រជាពលរដ្ឋនៅតែបន្តរក្សាការត្រៀមលក្ខណៈក្នុងកម្រិតខ្ពស់ ដើម្បីត្រៀមរារាំងជាបន្ទាន់ ប្រសិនបើមានទាហានថៃចេញមកធ្វើសកម្មភាពរាយបន្លាលួសឈ្លានពានចូលទឹកដីកម្ពុជាបន្ថែមទៀត។

ព្រះសង្ឃ និងប្រជាពលរដ្ឋបន្តជួយឧបត្ថម្ភដល់កងកម្លាំង និងពលរដ្ឋនៅសមរភូមិមុខ ដើម្បីជាការលើកទឹកចិត្ត និងជួយសម្រួលដល់ការខ្វះខាតរបស់កងកម្លាំងយោធា និងប្រជាពលរដ្ឋដែលរងគ្រោះ និងកំពុងការពារបូរណភាពទឹកដី ព្រះសង្ឃ និងប្រជាពលរដ្ឋមកពីសមរភូមិក្រោយ បានបន្តនាំយកនូវគ្រឿងឧបភោគបរិភោគ និងសម្ភារចាំបាច់ផ្សេងៗទៀត ផ្ដល់ជូនដល់កងកម្លាំង និងប្រជាពលរដ្ឋនៅភូមិព្រៃចាន់ ឃុំអូរបីជាន់។ សកម្មភាពដ៏គួរឱ្យកក់ក្ដៅនេះ មិនត្រឹមតែបង្ហាញពីការគ្រប់គ្រងស្ថានការណ៍បានយ៉ាងល្អរបស់អាជ្ញាធរពាក់ព័ន្ធប៉ុណ្ណោះទេ ប៉ុន្តែថែមទាំងបានបង្កប់នូវទឹកចិត្តសាមគ្គីភាព និងការរួបរួមដ៏រឹងមាំពីប្រជាពលរដ្ឋកម្ពុជាគ្រប់ស្រទាប់វណ្ណៈផងដែរ ក្នុងការចូលរួមចំណែកការពារជាតិមាតុភូមិ។

ក្នុងឱកាសចុះចែកអំណោយនេះ ព្រះសង្ឃមួយអង្គបានមានសង្ឃដីកាបញ្ជាក់ថា «ក្នុងនាមជាកូនខ្មែរ ឃើញបងប្អូនកងកម្លាំង និងប្រជាពលរដ្ឋកំពុងជួបការលំបាក និងមានរបួសស្នាមក្នុងការការពារទឹកដី អាត្មាភាពនិងពុទ្ធបរិស័ទទាំងអស់មិនអាចឈរមើលបានឡើយ។ ទោះតិចក្ដីច្រើនក្ដី យើងខ្ញុំសូមចូលរួមចំណែកជួយឧបត្ថម្ភ ដើម្បីលើកទឹកចិត្ត និងផ្ដល់កម្លាំងចិត្តដល់វីរកងទ័ព និងបងប្អូនប្រជាពលរដ្ឋដែលកំពុងឈរជើងនៅទីនេះ»។

តំណាងប្រជាពលរដ្ឋដែលបាននាំយកអំណោយក៏បានថ្លែងថា «យើងខ្ញុំបានឃើញពីការលះបង់ និងការឈឺចាប់របស់បងប្អូននៅជួរមុខ ដូច្នេះយើងមកពីក្រោយក៏សូមចូលរួមចំណែកតាមលទ្ធភាព ដោយនាំយកបាយទឹក គ្រឿងបរិភោគខ្លះៗ មកជូនបងប្អូនដើម្បីបានជាកម្លាំង ព្រមទាំងបង្ហាញថាយើងទាំងអស់គ្នាគឺនៅពីក្រោយបងប្អូនជានិច្ច»។

សូមបញ្ជាក់ថា កាលពីរសៀលថ្ងៃទី១៧ ខែកញ្ញា ឆ្នាំ២០២៥ ហេតុការណ៍តានតឹងមួយបានកើតឡើងនៅតំបន់នេះ បន្ទាប់ពីយោធាថៃបានរំលោភចូលទឹកដីកម្ពុជា និងបានរាយបន្លាលួសនៅតំបន់ភូមិព្រៃចាន់ ដោយបានបង្ខំឱ្យប្រជាពលរដ្ឋខ្មែរចំនួន ១៩គ្រួសារ ចាកចេញពីលំនៅឋាន និងដីចម្ការរបស់ខ្លួន។ សកម្មភាពឈ្លានពាននេះ បានបង្កឱ្យមានការប៉ះទង្គិចគ្នារវាងកងទ័ព ក៏ដូចជាប្រជាពលរដ្ឋខ្មែរជាមួយយោធាថៃ ដែលបណ្ដាលឱ្យមានប្រជាពលរដ្ឋ កងកម្លាំងនគរបាល ទាហាន និងព្រះសង្ឃសរុប ២៩ អង្គ/រូប បានរងរបួសធ្ងន់និងស្រាល។ យោធាថៃបានអនុវត្តនូវអ្វីដែលខ្លួនហៅថា "ច្បាប់ថៃនៅលើទឹកដីខ្មែរ" ដោយបានបាញ់ឧស្ម័នបង្ហូរទឹកភ្នែក ប្រើចំពាមកៅស៊ូ និងឧបករណ៍សំឡេងរំខានផ្សេងទៀត ដែលថែមទាំងបង្កឱ្យមានរបួសដល់ត្រចៀកផងដែរ៕

ដោយ ឈុន សារ៉ាត