AKP ហាណូយ វៀតណាម, ថ្ងៃទី០២ ខែតុលា ឆ្នាំ២០២៥ -- 
លោក Dinh Dac Vinh អគ្គនាយករងស្ថានីយ៍ទូរទស្សន៍វៀតណាម VTV បានលើកឡើងថា ទូរទស្សន៍វៀតណាម VTV គឺជាទីភ្នាក់ងាររដ្ឋាភិបាល មានភារកិច្ចចម្បងគឺ៖ ផ្តល់ព័ត៌មាន ផ្សព្វផ្សាយទិសដៅ និងគោលការណ៍ណែនាំរបស់រដ្ឋាភិបាល គោលនយោបាយ និងច្បាប់របស់រដ្ឋ ដើម្បីចូលរួមចំណែកក្នុងការអប់រំប្រជាជន និងលើកកម្ពស់បញ្ញា ស្មារតី របស់ប្រជាជនជាមួយនឹងកម្មវិធីទូរទស្សន៍ និងប្រព័ន្ធផ្សព្វផ្សាយផ្សេងទៀតលើវេទិកាទំនាក់បទំនងពហុប្រព័ន្ធផ្សព្វផ្សាយ។ ការលើកឡើងរបស់លោកបែបនេះ ក្នុងឱកាសអញ្ជើញធ្វើបទបង្ហាញស្វាគមន៍ និងចែករំលែកបទពិសោធន៍លើកាងារផ្នែកសារព័ត៌មានជូនដល់ប្រតិភូអ្នកសារព័ត៌មានកម្ពុជា ដឹកនាំដោយ ឯកឧត្តម អ៊ិន ឆាយ អនុរដ្ឋលេខាធិការក្រសួងព័ត៌មាននៃព្រះរាជាណាចក្រកម្ពុជា ដែលបានអញ្ជើញទៅធ្វើទស្សនកិច្ចនៅស្ថានីយទូរទស្សន៍ VTV បន្ទប់ស្ទូឌីយោ និង Vietnam Today Channel Studio នារសៀលថ្ងៃទី០២ ខែតុលា ឆ្នាំ២០២៥ នៅរដ្ឋធានីហាណូយ សាធារណរដ្ឋសង្គមនិយមវៀតណាម។

       
លោក Dinh Dac Vinh បានមានប្រសាសន៍ថា បរិវត្តកម្មឌីជីថលលើវិស័យសារព័ត៌មាន ធ្វើឱ្យដំណើរការនៃការផលិត និងការផ្សាយព័ត៌មានបានលឿន ត្រឹមត្រូវ ប្រកបដោយខ្លឹមសារ និងការអនុវត្តប្រព័ន្ធស្វ័យប្រវត្តិកម្ម។លោកអគ្គនាយករងបានបញ្ជាក់ថា ចំពោះការប្រយុទ្ធប្រឆាំងនឹងព័ត៌មានក្លែងក្លាយ ក្នុងនាមជាស្ថាប័នរដ្ឋ VTV មានយុទ្ធសាស្ត្រគឺធ្វើយ៉ាងណាផ្ដល់ព័ត៌មានដែលត្រឹមត្រូវ ច្បាស់លាស់ ឱ្យទាន់ពេលវេលានៅគ្រប់បណ្ដាញសារព័ត៌មានទាំងអស់ ដើម្បីឱ្យប្រជាជនដឹងពីព័ត៌មានក្លែងក្លាយនោះ ព្រោះមានតែព័ត៌មានដែលផ្សព្វផ្សាយពីស្ថាប័នរបស់ជាតិទេដែលទទួលបានការជឿជាក់ពីប្រជាជន។

ក្នងឱកាសនោះដែរ ឯកឧត្តម អ៊ិន ឆាយ អនុរដ្ឋលេខាធិការក្រសួងព័ត៌មាននៃព្រះរាជាណាចក្រកម្ពុជា និងជាប្រធានគណៈប្រតិភូអ្នកសារព័ត៌មានកម្ពុជាបានមានប្រសាសន៍កោតសរសើរ និងវាយតម្លៃខ្ពស់ចំពោះភាពរីកចម្រើន និងការអភិវឌ្ឍផ្នែកបច្ចេកវិទ្យាឌីជីថលដ៏ទំនើបរបស់ស្ថានីយទូរទស្សន៍ VTV ក្នុងនាមជាស្ថាប័នរបស់រដ្ឋដែលបានពង្រីកវិសាលភាពនៃការផ្សព្វផ្សាយព័ត៌មាន លើពហុប្រព័ន្ធផ្សព្វផ្សាយតាមវេទិកាឌីជីថល ដែលធ្វើឱ្យពលរដ្ឋទទួលបានព័ត៌មានឆាប់រហ័ស គ្រប់ពេលវេលា គ្រប់ទីកន្លែង យ៉ាងមានប្រសិទ្ធភាព៕

ដោយ៖ ទូច វលក័្ខណ, រូបថត៖ ខឹម សុវណ្ណារ៉ា