AKP ភ្នំពេញ ថ្ងៃទី០២ ខែតុលា ឆ្នាំ២០២៥ --
សម្តេចអគ្គមហាសេនាបតីតេជោ ហ៊ុន សែន បានអរគុណចំពោះតួនាទីដ៏សកម្មរបស់ម៉ាឡេស៊ី នៅក្នុងការសម្របសម្រួលដោះស្រាយបញ្ហាព្រំដែនរវាងកម្ពុជា និងថៃ ជាពិសេស អរគុណចំៗតែម្ដងចំពោះឯកឧត្តម អាន់វ៉ា អ៊ីប្រាអ៊ីម នាយករដ្ឋមន្ត្រីម៉ាឡេស៊ី ដែលបានបំពេញតួនាទីយ៉ាងរហ័ស និងលឿននៅក្នុងការសម្របសម្រួលដោះស្រាយបញ្ហាព្រំដែនរវាងកម្ពុជា និងថៃ នាពេលកន្លងមក ក៏ដូចជាកំពុងតែបន្តមកដល់បច្ចុប្បន្ននេះ។ នេះបើតាមការឱ្យដឹងរបស់ឯកឧត្ដម ជា ធីរិទ្ធ អ្នកនាំពាក្យព្រឹទ្ធសភា បន្ទាប់ពីសម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទី នៃព្រះរាជាណាចក្រកម្ពុជា បានអនុញ្ញាតឱ្យប្រតិភូសមាជិកព្រឹទ្ធសភាសហព័ន្ធម៉ាឡេស៊ី ដឹកនាំដោ យឯកឧត្តម Datuk Wira Dr. Mohd Hatta bin Md Ramli ចូលជួបសម្តែងការគួរសម  នារសៀលថ្ងៃទី០២ ខែតុលា ឆ្នាំ២០២៥ នៅវិមានព្រឹទ្ធសភា។

ក្នុងជំនួបនោះ សម្ដេចតេជោប្រមុខរដ្ឋស្ដីទី បានស្វាគមន៍ចំពោះប្រតិភូរបស់សហព័ន្ធសភាសន្តិភាពពិភពលោកដែលបានអញ្ជើញមកបំពេញទស្សនកិច្ចនៅកម្ពុជា។ សម្ដេចតេជោបានចាត់ទុកវត្តមានរបស់ប្រតិភូសហព័ន្ធសភាសន្តិភាពពិភពលោកមកកាន់កម្ពុជានៅពេលនេះ នឹងញ៉ាំងទំនាក់ទំនងរវាងសហព័ន្ធសភាសន្តិភាពពិភពលោកជាមួយនឹងស្ថាប័ននីតិប្បញ្ញត្តិនៅកម្ពុជាឱ្យកាន់តែរីកចម្រើនផង ហើយនិយាយជារួមគឺពង្រឹងទំនាក់ទំនងបន្ថែមទៀតរវាងកម្ពុជានឹងម៉ាឡេស៊ីឱ្យកាន់តែមានភាពល្អប្រសើរថែមទៀត។ 
ឯកឧត្ដម Datuk Wira Dr. Mohd Hatta bin Md Ramli សមាជិកព្រឹទ្ធសភារបស់ម៉ាឡេស៊ី ដែលជាប្រធានគណៈប្រតិភូបានថ្លែងអំណរគុណចំពោះសម្ដេចតេជោដែលបានអនុញ្ញាតឱ្យឯកឧត្តម និងប្រតិភូបានជួបសម្ដែងការគួរសម។ ឯកឧត្តមក៏បានលើកឡើងនូវភាពរីករាយដែលឯកឧត្ដមបានជួបសម្ដេចតេជោជាថ្មី ហើយឯកឧត្ដមបានកោតសរសើរចំពោះភាពជាអ្នកដឹកនាំរបស់សម្ដេចតេជោនាពេលកន្លងមក ដែលបានដឹកនាំកម្ពុជាឱ្យមានការរីកចម្រើនជាបន្តបន្ទាប់។ ឯកឧត្ដមក៏បានមានប្រសាសន៍ដែរថា ឯកឧត្ដម និងប្រតិភូ រីករាយនឹងរង់ចាំស្ដាប់នូវការចែករំលែកបទពិសោធន៍ ប្រកបដោយគតិបណ្ឌិតពីសម្ដេចតេជោ ដែលមានបទពិសោធន៍ដ៏ច្រើននៅក្នុងអាជីពជាអ្នកនយោបាយ និងភាពជាអ្នកដឹកនាំរបស់សម្ដេច។

ជាមួយគ្នានេះ សម្ដេចតេជោ ហ៊ុន សែន បានលើកឡើងដោយបានចែករំលែកអំពីស្ថានភាពរបស់ប្រទេសកម្ពុជាកាលពីអតីតកាល ជាពិសេសការដឹកនាំរបស់សម្ដេចដែលបាននាំកម្ពុជាចេញពីរបបប្រល័យពូជសាសន៍ដែលធ្វើឱ្យកម្ពុជាមានសន្តិភាពនៅឆ្នាំ១៩៩៨ ដោយបញ្ចប់ទាំងស្រុងនូវសង្គ្រាមស៊ីវិលដែលកម្ពុជាធ្លាប់បែកបាក់គ្នា ចាប់ពីក្រោយកាលសម័យអង្គរមក ហើយកម្ពុជាអាចបញ្ចប់បាននៅឆ្នាំ១៩៩៨ ដោយមានសន្តិភាព និងការអភិវឌ្ឍប្រទេសរហូតមកដល់បច្ចុប្បន្ន។ សម្ដេចតេជោបានថ្លែងបញ្ជាក់ផងដែរថា បច្ចុប្បន្នកម្ពុជាមានមេដឹកនាំថ្មី ដែលជាអ្នកជំនាន់ក្រោយដែលកំពុងតែដឹកនាំប្រទេសយ៉ាងស្វាហាប់ និងដើរយ៉ាងលឿនក្នុងការបំពេញនូវតួនាទីដឹកនាំកម្ពុជា ឱ្យកាន់តែរីកចម្រើនថែមទៀត។ សម្ដេចតេជោ ប្រមុខរដ្ឋស្ដីទី ក៏បានចែករំលែកពីបញ្ហាប្រឈមនាពេលបច្ចុប្បន្នដែលកម្ពុជា កំពុងមានបញ្ហាព្រំដែនជាមួយថៃ ដោយសម្តេចតេជោបានពន្យល់អំពីសារបាននៃការកើតឡើង ហើយនិងបញ្ហាប្រឈមពេលបច្ចុប្បន្ននិងកំពុងតែឈានទៅរកការធ្វើយ៉ាងណាឱ្យមានដំណោះស្រាយវិលមករកប្រក្រតីភាពឡើងវិញ ដែលជាជំហររបស់កម្ពុជា។ សម្តេចតេជោបានសង្កត់ធ្ងន់ថា អ្វីដែលកម្ពុជាចង់បាន គឺការថែរក្សានូវបទឈប់បាញ់ឱ្យបាន ហើយដោះស្រាយបញ្ហាឈានទៅរកដំណោះស្រាយមួយវិលមកប្រក្រតីដែលប្រទេសទាំងពីរធ្លាប់មានជាមួយគ្នាកន្លងមក។ 

ក្នុងឱកាសនោះ ឯកឧត្តមប្រធានប្រតិភូបានអរគុណចំពោះសម្តេចតេជោ ដែលបានចែករំលែកដោយពន្យល់យ៉ាងក្បោះក្បាយ និងគ្រប់ជ្រុងជ្រោយពីទិដ្ឋភាពនៅកម្ពុជា កាលពីអតីតកាល និងទិដ្ឋភាពនៃបញ្ហាវិវាទព្រំដែនរវា ងកម្ពុជា និងថៃ នាពេលបច្ចុប្បន្ន។ ឯកឧត្តមក៏បានបង្ហាញពីភាពរីករាយដែលបានឃើញកម្ពុជាមានការរីកចម្រើនឥតឈប់ឈរ ពិសេសគឺរាជធានីភ្នំពេញតែម្ដង ដែលមានភាពលូតលាស់ជាលំដាប់ ដោយនៅរៀងរាល់ពេលដែលឯកឧត្តមអញ្ជើញមកកាន់កម្ពុជាម្ដងៗ តែងឃើញការវិវត្តថ្មីៗជានិច្ច ពិសេសព្រលានយន្តហោះអន្តរជាតិតេជោ ដែលធំ និងទំនើប។ 
ឯកឧត្ដម Datuk Wira Dr. Mohd Hatta bin Md Ramli ក៏បានកោតសរសើរចំពោះភាពរីកចម្រើនផ្នែកសេដ្ឋកិច្ចរបស់កម្ពុជាផងដែរ៕

ដោយ៖ ជឹម ណារី