AKP កំពង់ស្ពឺ ថ្ងៃទី០៣ ខែតុលា  ឆ្នាំ២០២៥--អាជ្ញាធរជាតិប្រយុទ្ធប្រឆាំងគ្រឿងញៀន ក្រសួងបរិស្ថាន រដ្ឋបាលខេត្តកំពង់ស្ពី រួមគ្នារៀបចំសិក្ខាសាលាផ្សព្វផ្សាយអប់រំពីគ្រោះថ្នាក់នៃគ្រឿងញៀន និងអត្ថប្រយោជន៍នៃកម្មវិធីទូរស័ព្ទដៃ NoDrug នៅសាលប្រជុំរដ្ឋបាលឧទ្យានជាតិព្រះសុរាម្រិត-កុសមៈ(គីរីរម្យ)  នារសៀលថ្ងៃទី០២ ខែតុលា ឆ្នាំ២០២៥។

សិក្ខាសាលានេះ បានប្រព្រឹត្តទៅក្រោមអធិបតីភាព ឯកឧត្តម ចាយ សាមិត្ត រដ្ឋលេខាធិការនិងជាប្រធានគណៈកម្មការប្រយុទ្ធប្រឆាំងគ្រឿងញៀនក្រសួងបរិស្ថាន និងជាដំណាងឯកឧត្ដមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថានដោយមានអ្នកចូលរួមសរុប១០៥នាក់ មកពីមន្ទីរបរិស្ថានទាំង៩រាជធានី/ខេត្ត កងកម្លាំងអនុវត្តន៍ច្បាប់ជុំវិញខេត្ត ប្រតិបត្តិករក្នុងវិស័យទេសចរណ៍ នៅឧទ្យានជាតិព្រះសុរាម្រិត-កុសមៈ(គីរីរម្យ)  និងភាគីពាក់ព័ន្ធនានាក្នុងខេត្ត សរុបជាង ១០០ នាក់ ។

ឯកឧត្តម កៅ សុណ្ណារិទ្ធ អភិបាលរងខេត្តកំពង់ស្ពឺ បានថ្លែងថា គ្រឿងញៀនគឺជាបញ្ហាសង្គមដ៏ស្មុគស្មាញមួយសម្រាប់សង្គមមនុស្សជាតិទាំងមូល ហើយរដ្ឋបាលខេត្តបង្ការ ទប់ស្កាត់ បង្រ្កាបបទល្មើសមិនឱ្យខេត្តកំពង់ស្ពឺក្លាយជាគោលដៅនៃការប្រព្រឹត្តបទល្មើសគ្រឿងញៀនជះឥទ្ធិពលបំផ្លិចបំផ្លាញដល់សុខុមាលភាពប្រជាពលរដ្ឋ សន្តិសុខ និងសណ្តាប់ធ្នាប់សាធារណ:។

ក្នុងឱកាសនោះ ឯកឧត្ដម ឧត្តមសេនីយ៍ឯក ថោង សុគន្ធា អគ្គលេខាធិការរងនៃ អាជ្ញាធរជាតិប្រយុទ្ធប្រឆាំងគ្រឿងញៀនបានពាំនាំនូវការកោតសរសើរនិងអរគុណពីឯកឧត្តមសន្តិបណ្ឌិត នេត សាវឿន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ចំពោះក្រសួងបរិស្ថាន ក៏ដូចជាក្រសួង ស្ថាប័ន និងរដ្ឋបាលថ្នាក់ក្រោមជាតិ ដែលយកចិត្តទុកដាក់ និងម្ចាស់ការចូលរួមយ៉ាងសកម្មតាមតួនាទី និងភារកិច្ចក្នុងដែនសមត្ថកិច្ចរបស់ខ្លួននាពេលកន្លងមក ព្រមទាំងសំណូមពរឱ្យបន្តសកម្មភាពជាបន្តទៀត ព្រមទាំងបានលើកឡើងពីយុទ្ធសាស្ត្រ និងវិធានការឆ្លើយតបនានាលើការងារផ្សព្វផ្សាយអប់រំជាការងារអាទិភាពផ្ដល់ចំណេះដឹងដល់ប្រជាពលរដ្ឋគ្រប់មជ្ឈដ្ឋាន ពិសេសសហគមន៍ ដើម្បីពួកគាត់ចៀសឆ្ងាយ និងចូលរួមកាន់តែសកម្មលើកកម្ពស់បាននូវប្រសិទ្ធភាពការងារប្រយុទ្ធប្រឆាំងគ្រឿងញៀន។ 

ឯកឧត្តម ចាយ សាមិត្ត រដ្ឋលេខាធិការក្រសួងបរិស្ថានបានថ្លែងអំណរគុណអ្នកពាក់ព័ន្ធ អ្នកចូលរួមដោយបានលើកឡើងពីសារៈសំខាន់នៃការចូលរួមការពារបរិស្ថាន អនុវត្តន៍គោលនយោបាយភូមិឃុំ សង្កាត់មានសុវត្ថិភាព ពាក់ព័ន្ធការងារបរិស្ថាន និងការងារប្រយុទ្ធប្រឆាំងគ្រឿងញៀន ដើម្បីសន្តិសុខ សុវត្ថិភាព សុខុមាលភាពរបស់ប្រជាពលរដ្ឋ។ 

ជាមួយគ្នានេះ វាគ្មិន ក្នុងកម្មវិធីនេះ លោកឧត្តមសេនីយ៍ត្រី យិន យឿត អនុប្រធាននាយកដ្ឋានផ្សព្វផ្សាយ អប់រំ និងទំនាក់ទំនងសាធារណៈ បានចែករំលែកពីផលប៉ះពាល់ និងគ្រោះថ្នាក់នៃគ្រឿងញៀន អត្ថប្រយោជន៍និងការទាញយក ប្រើប្រាស់ App NoDrug និងមាត្រាច្បាប់ស្ដីពីការត្រួតពិនិត្យគ្រឿងញៀនពាក់ព័ន្ធ ដើម្បីឱ្យអ្នកចូលរួមបានយល់ដឹង និងការពារខ្លួន គ្រួសារ និងចូលរួមក្នុងការងារប្រយុទ្ធប្រឆាំងគ្រឿងញៀនឱ្យមានប្រសិទ្ធភាពខ្ពស់៕

ដោយ៖ រិទ្ធី ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន