AKP ភ្នំពេញ ថ្ងៃទី០៣ ខែតុលា ឆ្នាំ២០២៥-- ក្រុមការងារកែទម្រង់ការគ្រប់គ្រងហិរញ្ញវត្ថុសាធារណៈនៃក្រសួងកិច្ចការនារី បានរៀបចំសិក្ខាសាលាពិគ្រោះយោបល់បញ្ចប់ «គោលការណ៍ណែនាំស្តីពីការគ្រប់គ្រងហិរញ្ញវត្ថុសាធារណៈ (FMM) របស់ក្រសួងកិច្ចការនារី» នៅសណ្ឋាគាររ៉េស៊ីដង់សុខាភ្នំពេញ ក្រោមអធិបតីភាពដ៏ខ្ពង់ខ្ពស់ លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្រ្តីក្រសួងកិច្ចការនារី កាលពីថ្ងៃទី០២ ខែតុលា ឆ្នាំ២០២៥ ដោយមានការចូលរួមពីថ្នាក់ដឹកនាំជារដ្ឋលេខាធិការ អនុរដ្ឋលេខាធិការ អគ្គនាយក អគ្គាធិការ អគ្គលេខាធិការនៃ ក.ជ.ក.ស ប្រធាននាយកដ្ឋាន និងមន្ត្រីជំនាញនាយកដ្ឋានហិរញ្ញវត្ថុនិងផ្គត់ផ្គង ព្រមទាំងថ្នាក់ដឹកនាំនិងមន្ត្រជំនាញនៃមន្ទីរកិច្ចការនារីរាជធានី ខេត្តទាំង២៥ និងតំណាងរបស់គណៈកម្មាធិការដឹកនាំការងារកែទម្រង់ការគ្រប់គ្រងហិរញ្ញវត្ថុសាធារណៈ សរុបចំនួន១២០រូប។

សិក្ខាសាលាពិគ្រោះយោបល់ត្រូវបានរៀបចំឡើងក្នុងគោលបំណង៖ ១. សិក្សាស្វែងយល់បន្ថែមនូវមតិយោបល់លើខ្លឹមសារ «គោលការណ៍ណែនាំ ស្តីពីការគ្រប់គ្រងហិរញ្ញវត្ថុសាធារណៈ (FMM) របស់ក្រសួងកិច្ចការនារី» ដែលទទួលបានពីអគ្គលេខាធិការដ្ឋានគណៈកម្មាធិការដឹកនាំការងារកែទម្រង់ការគ្រប់គ្រងហិរញ្ញវត្ថុសាធារណៈ (អ.គ.ហ)។ ២. ពិនិត្យ និងពិភាក្សាបញ្ចប់សៀវភៅគោលការណ៍ណែនាំ (FMM) ដើម្បីក្លាយជាឯកសារដែលប្រមូលផ្តុំនូវបទដ្ឋានគតិយុត្តពាក់ព័ន្ធនឹងការគ្រប់គ្រងថវិកា។

ជាលទ្ធផល សិក្ខាសាលាទទួលបាននូវធាតុចូលបន្ថែម ពី អ.គ.ហ និងគ្រប់អង្គភាពថវិកា ដើម្បីក្រុមការងារកែសម្រួលបញ្ចប់គោលការណ៍ណែនាំស្តីពីការគ្រប់គ្រងហិរញ្ញវត្ថុសាធារណៈ (FMM) របស់ក្រសួងកិច្ចការនារី និងបោះពុម្ពផ្សព្វផ្សាយដាក់ឱ្យគ្រប់អង្គភាពក្រោមឱវាទវាទអនុវត្ត៕

ដោយ៖ ពេជ្រ សំអឿន (ប្រភព៖ ក្រសួងកិច្ចការនារី)