AKP ព្រះសីហនុ ថ្ងៃទី១០ ខែតុលា ឆ្នាំ២០២៥-- នាវាកងទ័ពជើងទឹកអូស្ត្រាលីចំនួន០១គ្រឿង មានឈ្មោះ HMAS Ballarat - FFH155 (Anzac Class FFH) បានចូលចតនៅកំពង់ផែស្វយ័តក្រុងព្រះសីហនុ ប្រកបដោយសុវត្ថិភាព នាព្រឹកថ្ងៃសុក្រ ទី១០ ខែតុលា ឆ្នាំ២០២៥ ក្នុងគោលបំណងដំណើរបំពេញទស្សនកិច្ចនៅព្រះរាជាណាចក្រកម្ពុជារយៈពេល៤ថ្ងៃ គិតចាប់ពីថ្ងៃទី១០ ដល់ថ្ងៃទី១៣ ខែតុលា ឆ្នាំ២០២៥ គឺដើម្បីពង្រឹងកិច្ចសហប្រតិបត្តិការ បង្កើនទំនាក់ទំនង និងរឹតចំណងមិត្តភាព សាមគ្គីភាពឱ្យកាន់តែល្អទ្វេឡើងថែមទៀត រវាងប្រទេសទាំងពីរ (កម្ពុជា-អូស្ត្រាលី)។

ក្នុងដំណើរចូលចតនៅកំពង់ផែស្វយ័តក្រុងព្រះសីហនុប្រកបដោយសុវត្ថិភាព មានការទទួលស្វាគមន៍ពីនាយ នាយរងកងទ័ពជើងទឹកមូលដ្ឋានសមុទ្ររាម ដឹកនាំដោយលោកឧត្តមនាវីត្រី អ៊ិន សុខេមរ៉ា នាយសេនាធិការរងមូលដ្ឋានសមុទ្ររាមនៅកំពង់ផែស្វយ័តក្រុងព្រះសីហនុ។

នាវាឈ្មោះ HMAS Ballarat - FFH155 (Anzac Class FFH) មានបណ្ដោយ១១៨ម៉ែត្រ ទទឹង១៤.៨ម៉ែត្រ ជម្រៅទឹក៦.៤ម៉ែត្រ មានទម្ងន់ផ្ទុក៣៩០០តោន ដឹកនាំដោយលោកមេបញ្ជានាវា វរនាវីទោ Dean Uren មេបញ្ជាការនាវា។

សូមបញ្ជាក់ថា ក្នុងដំណើរទស្សនកិច្ចរបស់នាវា HMAS Ballarat -​ FFH155 (Anzac Class FFH) មេបញ្ជាការនាវាមានគម្រោងចូលជួបសម្តែងការគួរសមជាមួយឯកឧត្តម អភិបាលនៃគណៈអភិបាលខេត្តព្រះសីហនុ មេបញ្ជាការកងទ័ពជើងទឹកមូលដ្ឋានសមុទ្ររាម ថ្នាក់ដឹកនាំក្រសួងការពារជាតិមួយចំនួន និងមានកម្មវិធីឡេងកីឡាមិត្តភាពរវាងកងទ័ពជើងទឹកទាំងពីរផងដែរ៕

ដោយ ងូ សុមុនី