AKP បន្ទាយមានជ័យ ថ្ងៃទី១៤ ខែតុលា ឆ្នាំ២០២៥-- លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល បានមានប្រសាសន៍ជំរុញឱ្យមន្រ្តីសុខាភិបាលលោកគ្រូ អ្នកគ្រូពេទ្យ និងអ្នកពាក់ព័ន្ធទាំងអស់ត្រូវបន្តពង្រឹងគុណភាពសេវាថែទាំសុខភាពបឋមនៅមូលដ្ឋាន ដើម្បីបម្រើពលរដ្ឋឱ្យកាន់តែល្អប្រសើរថែមទៀតនោះ។ ការថ្លែងយ៉ាងដូច្នេះក្នុងឱកាសលោកជំទាវ វេជ្ជបណ្ឌិតឱ វណ្ណឌីន បានអញ្ជើញជាអធិបតីបើកសិក្ខាសាលាស្តីពី «ការពិនិត្យវឌ្ឍនភាពការអនុវត្តក្របខ័ណ្ឌការជំរុញបង្កើនការងារថែទាំសុខភាពបឋម ប្រចាំ៩ខែ ដើមឆ្នាំ២០២៥ និងការរៀបចំផែនការប្រចាំឆ្នាំ២០២៦» កាលពីព្រឹកថ្ងៃទី១៤ ខែតុលា ឆ្នាំ២០២៥ នៅសាលប្រជុំ (ផ្ការំដួល) មន្ទីរសុខាភិបាលខេត្តបន្ទាយមានជ័យ ដោយមានការចូលរួមពីឯកឧត្តម លោកជំទាវ គណៈប្រតិភូក្រសួង ប្រធាន-អនុប្រធាន មន្ទីរអង្គភាពពាក់ព័ន្ធ អភិបាលក្រុង-ស្រុក និងជាពិសេស លោកគ្រូ អ្នកគ្រូពេទ្យ ទាំង៩ក្រុង-ស្រុក ក្នុងខេត្តបន្ទាយមានជ័យ ដែលជាកម្លាំងស្នូលក្នុងការអនុវត្តការងារសុខាភិបាលនៅមូលដ្ឋាន។

លោកជំទាវវេជ្ជបណ្ឌិត ឱ វណ្ណឌីន បានគូសបញ្ជាក់យ៉ាងច្បាស់ថា ការថែទាំសុខភាពបឋម  នៅតាមមូលដ្ឋាន គឺជាម៉ាស៊ីនដ៏មានឥទ្ធិពល និងជាមូលដ្ឋានគ្រឹះ ក្នុងការសម្រេចបាននូវការគ្របដណ្ដប់សុខភាពជាសកល និងបានជំរុញយ៉ាងទទូចដល់លោកគ្រូ អ្នកគ្រូពេទ្យ និងអ្នកពាក់ព័ន្ធទាំងអស់ត្រូវរួមគ្នាពង្រឹង និងបង្កើនគុណភាពសេវាសុខាភិបាល ដើម្បីបម្រើជូនប្រជាពលរដ្ឋកាន់តែល្អប្រសើរ តាមរយៈចំណុចគន្លឹះមួយចំនួន។ ពង្រឹងគុណភាព និងសុវត្ថិភាពសេវាជំរុញឱ្យមន្ត្រីសុខាភិបាលទាំងនៅមូលដ្ឋានសាធារណៈ និងឯកជន ត្រូវបន្តរក្សាបាននូវសាមគ្គីភាពផ្ទៃក្នុង និងរួមគ្នាលើកកម្ពស់គុណភាព សុវត្ថិភាព និងប្រសិទ្ធភាព នៃសេវាសុខាភិបាល។ ត្រូវតាមដានត្រួតពិនិត្យ និងវាយតម្លៃគុណភាពសេវាឱ្យបានទៀងទាត់ និងចាត់វិធានការកែលម្អរាល់ចំណុចខ្វះខាត ដើម្បីឱ្យការព្យាបាលមានប្រសិទ្ធភាព និងទទួលបានការជឿទុកចិត្តពីប្រជាពលរដ្ឋ។ ពង្រឹងតួនាទីមណ្ឌលសុខភាព  ត្រូវខិតខំជំរុញឱ្យមណ្ឌលសុខភាពអាចផ្តល់សេវាថែទាំសុខភាពបឋមបានកាន់តែគ្រប់ជ្រុងជ្រោយ ជាពិសេសគឺការផ្តល់សេវាទាន់ពេលវេលា និងឆ្លើយតបទៅនឹងតម្រូវការជាក់ស្តែងរបស់ប្រជាជន។ ពង្រឹងសមត្ថភាពធនធានមនុស្ស បន្តខិតខំរៀបចំ និងអនុវត្តយុទ្ធសាស្ត្រអភិវឌ្ឍន៍ធនធានមនុស្ស ក្នុងនោះត្រូវពង្រឹងសមត្ថភាពជំនាញវិជ្ជាជីវៈ ក្រមសីលធម៌វិជ្ជាជីវៈ និងឥរិយាបទនៃការផ្តល់សេវា ឱ្យបានត្រឹមត្រូវ ប្រកបដោយមនសិកាវិជ្ជាជីវៈខ្ពស់។

លោកជំទាវបានសង្កត់ធ្ងន់ថា ការចូលរួមរបស់សហគមន៍ ក្នុងការថែទាំសុខភាពផ្ទាល់ខ្លួនបានត្រឹមត្រូវ គឺជាកត្តាចាំបាច់ដែលធ្វើឱ្យសហគមន៍មានសុខភាពល្អ និងរួមចំណែកដល់កំណើនសេដ្ឋកិច្ចគ្រួសារ និងសេដ្ឋកិច្ចជាតិ។ អាជ្ញាធរមូលដ្ឋាន និងអ្នកពាក់ព័ន្ធត្រូវបង្កើនការទទួលខុសត្រូវ និងគណនេយ្យភាពក្នុងការដោះស្រាយកត្តាសង្គមកំណត់សុខភាព។  ការត្រៀមលក្ខណៈឆ្លើយតប ត្រូវពង្រឹងប្រព័ន្ធអង្កេតតាមដានជំងឺឆ្លង និងជំងឺមិនឆ្លង ដើម្បីត្រៀមលក្ខណៈឆ្លើយតបទៅនឹងគ្រោះអាសន្នផ្នែកសុខភាពសាធារណៈឱ្យបានឆាប់រហ័ស និងស្របតាមលក្ខខណ្ឌច្បាប់សុខភាព។

លោក វេជ្ជបណ្ឌិត ឡេ ច័ន្ទសង្វាត ប្រធានមន្ទីរសុខាភិបាលខេត្តបន្ទាយមានជ័យ បានគាំទ្រយ៉ាងពេញទំហឹងចំពោះអនុសាសន៍របស់លោកជំទាវ ឱ វណ្ណឌីន ហើយបានសង្កត់ធ្ងន់ទៅលើសារៈសំខាន់នៃការអនុវត្តផែនការដែលបានរៀបចំឡើង ដោយត្រូវពង្រឹងពីថ្នាក់ក្រោមឡើងលើ ស្របតាមទិសដៅយុទ្ធសាស្ត្ររបស់ក្រសួងសុខាភិបាល ដើម្បីធានាថាធនធានទាំងអស់ត្រូវបានប្រើប្រាស់ប្រកបដោយប្រសិទ្ធភាព និងតម្លាភាព។

សិក្ខាសាលានេះគឺជាព្រឹត្តិការណ៍ដ៏សំខាន់មួយក្នុងការជំរុញទឹកចិត្ត និងកំណត់ទិសដៅច្បាស់លាស់សម្រាប់គ្រប់តួអង្គពាក់ព័ន្ធ ឱ្យបន្តខិតខំប្រឹងប្រែងលើការងារថែទាំសុខភាពបឋម ដើម្បីលើកកម្ពស់ខឿនសុខភាព និងសង្គ្រោះអាយុជីវិតប្រជាពលរដ្ឋនៅក្នុងខេត្តបន្ទាយមានជ័យ ប្រកបដោយគុណភាពខ្ពស់ និងភាពជឿជាក់៕

ដោយ ឈុន សារ៉ាត