AKP ភ្នំពេញ ថ្ងៃទី២២ ខែតុលា ឆ្នាំ២០២៥--ព្រះខ័នរាជស្វាយរៀង ដែលជាក្រុមជើងឯករង AFC Challenge League រដូវកាល ២០២៤-២០២៥កំពុងត្រៀមខ្លួនធ្វើម្ចាស់ផ្ទះ AFC Challenge League វគ្គចែកពូល D រដូវកាលថ្មី ២០២៥-២០២៥ ដោយត្រូវបើកទ្វារស្វាគមន៍ក្រុមភ្ញៀវ SP FALCONS FC របស់ប្រទេសម៉ុងហ្គោលី មុនគេ នាចុងសប្តាហ៍នេះ។

មន្ត្រីព័ត៌មានក្លឹបព្រះខ័នរាជស្វាយរៀងបញ្ជាក់ថា ការប្រកួតវគ្គជម្រុះពូល D មាន៤ក្រុម ពីថ្ងៃទី២៦ខែតុលា ដល់ថ្ងៃទី១ ខែវិច្ឆិកា ឆ្នាំ២០២៥ នឹងត្រូវធ្វើសន្និសីទសារព័ត៌មានមុនការប្រកួតរួមគ្នា នាថ្ងៃទី២៥តុលា ដើម្បីបើកឱកាសដល់គ្រូបង្គោល និងប្រធានក្រុមនៃក្លឹបទាំង៤បានបញ្ចេញការយល់ឃើញ និងការត្រៀមខ្លួនរបស់ក្លឹបនីមួយៗ។

៤ក្រុមក្នុងពូល D នឹងត្រូវប្រកួតនៅពហុកីឡដ្ឋានជាតិមរតកតេជោ ដោយមានម្ចាស់ផ្ទះ ព្រះខ័នរាជស្វាយរៀង ក្រុម SP FALCONS FC របស់ប្រទេសម៉ុងហ្គោលី, ក្រុម EZRA FC របស់ប្រទេសឡាវ និងក្រុម MANILA DIGGER FC មកពីប្រទេសហ្វីលីពីន។ គួរបញ្ជាក់ថា វគ្គចែកពូលនេះ មាន២០ក្រុមចូលរួមចែកជា៥ពូល។ ដោយឡែក ១ក្រុមទៀតរបស់កម្ពុជា គឺភ្នំពេញក្រោនលេងនៅក្នុងពូល E ដោយក្រុម Dewa United Banten របស់ឥណ្ឌូណេស៊ីធ្វើម្ចាស់ផ្ទះ៕

ដោយ ហេង ណាលីន (រូបភាព៖ ព្រះខ័នរាជស្វាយរៀង)