AKP ភ្នំពេញ ថ្ងៃទី២៩ ខែតុលា ឆ្នាំ២០២៥--ក្រុមភ្នំពេញហ្គាឡាក់ស៊ី និងក្រុមមន្ទីរអប់រំខេត្តកំពតរក្សាលទ្ធផលស្មើគ្នា ២-២ ខណៈក្រុមខេត្តត្បូងឃ្មុំបានយកឈ្នះក្រុមបាត់ដំបងយូណៃធីត ៤-០ នៅក្នុងការប្រកួត១/៤ផ្តាច់ព្រ័ត្រ ជើងទី១ កាលពីល្ងាចថ្ងៃទី២៨ ខែតុលា ឆ្នាំ២០២៥ ពានរង្វាន់សម្តេចតេជោ ហ៊ុន សែន ថ្នាក់ខេត្ត។

នៅក្នុងការប្រកួតវគ្គទី១ ក្រុមភ្នំពេញហ្គាឡាក់ស៊ី និងក្រុមមន្ទីរអប់រំខេត្តកំពត រក្សាលទ្ធផលស្មើគ្នា ០-០ ហើយនៅវគ្គទី២ ក្រុមទាំងពីរធ្វើសម្រចបានលទ្ធផល ២គ្រាប់ដូចគ្នា។ ២គ្រាប់របស់ម្ចាស់ផ្ទះ ភ្នំពេញហ្គាឡាក់ស៊ី រកបាននៅដោយកីឡាករ ម៉ាត់ សេតម៉ូស្លីម នៅនាទី៦១ និងដោយកីឡាករ កឺន ចាន់វិសុទ្ធ នាទី៨៧ ខណៈ២គ្រាប់របស់ក្រុមភ្ញៀវ មន្ទីរអប់រំខេត្តកំពតរកបានដោយកីឡាករ ទេព សាហ្វីអ៊ី នៅនាទី៦៩ និងនាទី៩០បូក៥។

ចំពោះ១ប្រកួតទៀត រវាងក្រុមខេត្តត្បូងឃ្មុំ ដែលបានយកឈ្នះក្រុមបាត់ដំបងយូណៃធីត ៤-០នោះ គឺធ្វើសម្រេចនៅវគ្គទីមួយ ២គ្រាប់ និងវគ្គទីពីរ ២គ្រាប់។ ២ប្រកួតនេះនឹងត្រូវបន្តជួបគ្នានៅជើងទី២ ផ្លាស់ប្តូរទឹកដីវិញម្តង នាថ្ងៃទី១១ ខែវិច្ឆិកា ឆ្នាំ២០២៥ ដើម្បីកាត់សេចក្តីថាតើ២ក្រុមណា ដែលឡើងទៅកាន់វគ្គ១/២ផ្តាច់ព្រ័ត្រ ឬហៅថាវគ្គពាក់កណ្តាលផ្តាច់ព្រ័ត្រ ពានរង្វាន់សម្តេចតេជោ ហ៊ុន សែន ថ្នាក់ខេត្តនេះ។

គួរបញ្ជាក់ថា សម្រាប់វគ្គ១/៤ផ្តាច់ព្រ័ត្រនេះដែរ ក៏មាន២ប្រកួតផ្សេងទៀតត្រូវប្រកួតប្រជែងគ្នា នៅល្ងាចថ្ងៃទី២៩ ខែតុលា ឆ្នាំ២០២នេះ ដែលជាការជួបគ្នារវាងក្រុមខេត្តព្រះសីហនុ និងក្រុមឡាយអ៊ិនឃីងខេត្តសៀមរាប ស្របពេលក្រុមមន្ទីរអប់រំខេត្តកំពង់ចាម ប៉ះ ក្រុមមន្ទីរអប់រំខេត្តកំពង់ស្ពឺ៕

ដោយ ហេង ណាលីន (រូបភាព៖ Hun Sen Cup)