AKP ភ្នំពេញ ថ្ងៃទី១២ ខែធ្នូ ឆ្នាំ២០២៥---
គិតមកដល់ថ្ងៃទី១២ ខែធ្នូ ឆ្នាំ២០២៥នេះ គឺមានរយៈពេល៦ថ្ងៃហើយដែលយោធាថៃបានធ្វើការរំលោភបទឈប់បាញ់ក្នុងការរំលោភបំពានទឹកដីដែនអធិបតេយ្យកម្ពុជា និងបានបាញ់ប្រហារលើភូមិសាស្ត្រជនស៊ីវិលកម្ពុជា បណ្តាលឱ្យស្លាប់ចំនួន១១នាក់ និងរងរបួសជាច្រើននាក់។ នេះបើតាមការបញ្ជាក់របស់អ្នកនាំពាក្យក្រសួងការពារជាតិក្នុងសន្នីសីទសារព័ត៌មានរសៀលថ្ងៃទី១២ ខែធ្នូ ឆ្នាំ២០២៥  លោកជំទាវឧត្ដមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនំាំពាក្យក្រសួងការពារជាតិក្នុងសេចក្ដីថ្លែងការណ៍ ស្តីពី «បច្ចុប្បន្នភាពស្តីពីស្ថានការណ៍ព្រំដែនកម្ពុជា-ថៃ បន្ទាប់ពីកងទ័ពថៃបានបើកការ វាយប្រហារមុនមកលើកងទ័ពនិងជនស៊ីវិលកម្ពុជា» នារសៀលថ្ងៃទី១២ ខែធ្នូ ឆ្នាំ២០២៥។

លោកជំទាវឧត្ដមសេនីយ៍ឯក ម៉ាលី សុជាតា បានបញ្ជាក់យ៉ាងដូច្នេះថា៖ «មកដល់ពេលនេះរយៈពេល ៦ថ្ងៃ ហើយដែលយោធាថៃបានធ្វើការំលោភដែនអធិបតេយ្យភាពកម្ពុជានៅភូមិភាគទី៤ និងទី៥  និងបានរំលោភកិច្ចព្រមព្រៀងសន្តិភាពរវាងកម្ពុជា-ថៃ ដែលភាគីទាំងពីរបានចុះហត្ថលេខាកាលពីថ្ងៃទី២៥ ខែកក្កដា ឆ្នាំ២០២៥ ដោយបានធ្វើសកម្មភាពដោយប្រដាប់អាវុធឈ្លានពានលើកដែនបូរណភាពទឹកដី ចាប់តាំងពីថ្ងៃទី៧ ដល់ថ្ងៃទី១២ ខែធ្នូនេះ» ។ លោកជំទាវ ឧត្ដមសេនីយ៍ឯក អ្នកនាំពាក្យបានលើកឡើងថា ភាគីថៃបានធ្វើការបាញ់ប្រហារលើស្ថានការណ៍ជួរមុខនៅសមរភូមិទិសយោធភូមិភាគទី៤ ភាគីថៃបានបន្តបាញ់ប្រហារមកលើកម្ពុជា គិតចាប់ពីម៉ោង ១៣:00នាទី ដល់ម៉ោង ១៥:០០នាទី ថ្ងៃទី១២ ខែធ្នូ ឆ្នាំ២០២៥ ហើយ នៅម៉ោង ១៣:២៧នាទី យោធាថៃបានប្រើប្រាស់យន្តហោះទម្លាក់គ្រាប់នៅភូមិសាស្ត្រវាលឥន្ទ្រី។ លោកជំទាវឧត្ដមសេនីយ៍ឯកបានបន្ដថា ចំពោះស្ថានការណ៍នៅក្នុងភូមិសាស្រ្តផ្សេងទៀតមានសភាពស្ងប់ស្ងាត់ ស្ថានការណ៍ជួរមុខនៅសមរភូមិទិសយោធភូមិភាគទី៥ ភាគីថៃបានបន្តបាញ់ប្រហារមកលើកម្ពុជា គិតចាប់ពីម៉ោង ១៣:០០នាទីព្រឹក ដល់ម៉ោង ១៥:០០នាទីរសៀល ថ្ងៃទី១២ ខែធ្នូ ឆ្នាំ២០២៥ ហើយនៅម៉ោង ១៣:២៧នាទី យោធាថៃបានបាញ់ផ្លោងជ្រុំចូលភូមិសាស្ត្រភូមិព្រៃចាន់។ ទន្ទឹមនេះ ម៉ោង ១៣:៤៥នាទី យោធាថៃបាញ់ផ្សែងពុលនៅភូមិសាស្ត្រភូមិព្រៃចាន់។ ម៉ោង ១៣:៥៨នាទី កម្លាំងថ្មើរជើងរបស់យោធាថៃអមដោយរថក្រោះបានរុលចូលភូមិសាស្ត្របឹង ត្រកួន។ លោកជំទាវឧត្ដមសេនីយ៍ឯកបានបន្ថែមថា នៅម៉ោង ១៤:១៩នាទី យោធាថៃបានប្រើប្រាស់ដ្រូនស៊ើបការណ៍ហោះ ក្តាប់សភាពការណ៍ខាង ក្រោយភូមិសាស្ត្រភូមិព្រៃចាន់ ហើយ ចំពោះស្ថានការណ៍នៅក្នុ ងភូមិសាស្រ្តផ្សេងទៀតមានសភាពស្ងប់ស្ងាត់៕

ដោយ៖ ប៊ុនរិទ្ធ