AKP កំពង់ធំ ថ្ងៃទី១៥ ខែធ្នូ ឆ្នាំ២០២៥--លោក ឧត្តមសេនីយ៍ទោ ហេង សុផល ស្នងការនគរបាលខេត្ត កាលពីរសៀលថ្ងៃទី១៤ ខែធ្នូ ឆ្នាំ២០២៥ នៅស្នងការដ្ឋាននគរបាលខេត្តកំពង់ធំ បានអញ្ជើញទទួលអំណោយពីសប្បុរសជនដើម្បីឧបត្ថម្ភដល់ជនរងគ្រោះដោយសារសង្គ្រាមឈ្លានពានពីសំណាក់កងទ័ពថៃមកលើដែនអធិបតេយ្យភាពកម្ពុជា។

លោក ឧត្តមសេនីយ៍ទោ ហេង សុផល ក្នុងនាមថ្នាក់ដឹកនាំស្នងការដ្ឋាននគរបាលខេត្ត និងនាយនគរបាលនាយនគរបាលរង មន្ត្រីនគរបាលនៃស្នងការដ្ឋាននគរបាលខេត្ត សូមថ្លែងអំណរគុណយ៉ាងជ្រាលជ្រៅបំផុតចំពោះសប្បុរសជន៖ ១. តាមរយៈលោកស្រី លឹម អៀងចេង ២. លោកស្រី ឆុន សុរ៉ាវី ម្ចាស់អាហារដ្ឋានផ្ទះក្រអូប នៅស្រុកសន្ទុក ៣. អធិការដ្ឋាននគរបាលស្រុកស្ទោង ដែលបានឧបត្ថម្ភ  គ្រឿងឧបភោគបរិភោគ និងថវិកាមួយចំនួនដល់អង្គភាពនាឱកាសនេះស្របតាមតម្រូវការចាំបាច់ ដើម្បីលោកនាំយកទៅឧបត្ថម្ភបន្តជូនជនភៀសសឹកដែលចាកចោលផ្ទះសម្បែង ទ្រព្យសម្បត្តិ សត្វចិញ្ចឹមភៀសខ្លួន មកស្នាក់នៅបណ្ដោះអាសន្ន ក្នុងភូមិសាស្ត្រខេត្តកំពង់ធំ ដោយសារការឈ្លានពានពីកងទ័ពថៃតាមព្រំដែនកម្ពុជា-ថៃ។

លោកឧត្តមសេនីយ៍ទោស្នងការបានជូនពរជូនចំពោះសប្បុរសជន ព្រមទាំងមនុស្សជាទីស្រឡាញ់ សូមជួបប្រទះតែពុទ្ធពរទាំង៤ប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។

ទន្ទឹមនឹងនេះ លោកឧត្តមសេនីយ៍ទោ ហេង សុផល និងលោកស្រី លឹម អៀងចេង បានចាត់ចែងដឹកនាំកងកម្លាំងរៀបចំសម្ភារគ្រឿងឧបភោគបរិភោគ និងថវិកាមួយចំនួនជាច្រើនកញ្ចប់ សម្រាប់ចែកជូនបងប្អូនជនភៀសសឹក នាពេលឆាប់ៗខាងមុខនេះ ដើម្បីចូលរួមសម្រាលការចំណាយដោះស្រាយជីវភាពជាប្រចាំថ្ងៃរបស់បងប្អូនផងដែរ៕

ដោយ ស៊ុម វណ្ណា