AKP កំពង់ស្ពឺ ថ្ងៃទី១៧ ខែធ្នូ ឆ្នាំ២០២៥​ -- «ការអប់រំគុណតម្លៃអូឡាំពិក» ដែលបញ្ជ្រាបផ្សព្វផ្សាយពីមន្រ្តីគណៈកម្មាធិការជាតិអូឡាំពិកកម្ពុជា (NOCC) ជូនដល់សិស្សានុសិស្សនៃវិទ្យាល័យកំពង់ស្ពឺបានផ្តល់អត្ថប្រយោជន៍យ៉ាងខ្លាំង ក្នុងការរួមចំណែកបំផុសដល់សិស្សានុសិស្សឱ្យបានយល់ដឹងកាន់តែស៊ីជម្រៅអំពីគុណតម្លៃនៃកីឡា ស្របតាមគោលនយោបាយអប់រំ ការយកចិត្តទុកដាក់ពង្រឹងក្នុងផ្នែកសុខភាពសិក្សារបស់សិស្ស។

នេះជាការលើកឡើងរបស់លោក អេង ថាវុធ នាយកវិទ្យាល័យកំពង់ស្ពឺ កាលពីថ្ងៃទី១៦ ខែធ្នូ ឆ្នាំ២០២៥ នៅវិទ្យាល័យកំពង់ស្ពឺ ខេត្តកំពង់ស្ពឺ ក្នុងកម្មវិធីការអប់រំគុណតម្លៃអូឡាំពិក ក្រោមការរៀបចំរបស់ NOCC ដោយមានការចូលរួមចែករំលែកបទពិសោធន៍ និងចំណេះដឹងពីឯកឧត្តម ប៊ុយ សុភ័ណ្ឌ ទីប្រឹក្សា NOCC និងក្រុមការងារជាច្រើនរូបទៀត។

លោកនាយកវិទ្យាល័យបានគូសបញ្ជាក់ថា ចំណេះដឹងតាមរយៈការបញ្ជ្រាបផ្សព្វផ្សាយពីមន្រ្តីជំនាញកីឡា ក្នុងវគ្គការអប់រំគុណតម្លៃអូឡាំពិកនេះបានផ្តល់ជូននូវពុទ្ធិជាច្រើនពាក់ព័ន្ធនៃគុណតម្លៃនៃការលេងកីឡា។ លោកថា ការទទួលបាននូវចំណេះកីឡាទាំងអស់នេះ មិនត្រឹមតែជួយឱ្យសិស្សចូលចិត្តលេងកីឡាជួយឱ្យសុខភាពរឹងមាំ រិតចំណងមិត្តភាព សាមគ្គីភាពប៉ុណ្ណោះនោះទេ ប៉ុន្តែថែមទាំងបានរួមចំណែកជួយឱ្យសិស្សជៀសឆ្ងាយពីការប្រព្រឹត្តអំពើមិនល្អ ជាពិសេសគឺជៀសឆ្ងាញពីគ្រឿងញៀនទៀតផង។

ជាមួយគ្នានេះ លោក សោម សុទ្ធរិទ្ធិពង្ស មន្រ្តីជំនាញផ្នែកកីឡានៃគណៈកម្មាធិការជាតិអូឡាំពិកកម្ពុជាបាន លើកឡើងថា នៅក្នុងបទបង្ហាញដល់សិស្សានុសិស្សអំពីការអប់រំគុណតម្លៃអូឡាំពិកនេះ មន្រ្តីជំនាញបានលើកយកប្រវត្តិនៃការកកើតកីឡាអូឡាំពិក និងចលនាកីឡាអូឡាំពិកអន្តរជាតិ តាំងពីសម័យបុរាណដល់សម័យបច្ចុប្បន្ន។ បន្ថែមពីលើនេះ យើងក៏បានលើកយកនៃសារៈសំខាន់មួយរបស់អូឡាំពិក ដែលមានតាំងពីសម័យបុរាណមកនោះដែរ គឺបទឈប់បាញ់ ដែលប្រទេសណាក៏ដោយមុនព្រឹត្តិការណ៍ប្រកួតកីឡាអូឡាំពិក រដ្ឋទាំងអស់ដែលត្រូវចូលរួមត្រូវទទួលយកបទឈប់បាញ់មួយ ដែលបង្កើតឡើងដោយអ្នករៀបចំព្រឹត្តិការណ៍អូឡាំពិក ហើយបទឈប់បាញ់នោះតម្រូវឱ្យរដ្ឋ ដែលមានសង្គ្រាមគ្នានឹងគ្នាផ្អាកសង្រ្គាម ដើម្បីឱ្យកីឡាករ និងទស្សនិកជនបានមកចូលរួមប្រកួត និងទស្សនា ដោយមានអារម្មណ៍សុខសុវត្ថិភាពទាំងផ្លូវកាយ និងផ្លូវចិត្ត។

គួរបញ្ជាក់ថា យុទ្ធនាការបញ្ជ្រាបផ្សព្វផ្សាយគុណតម្លៃអូឡាំពិកចុះតាមសាលារដ្ឋចំនួន៤តាមបណ្តាខេត្ត បានចុះរួចរាល់ចំនួន២សាលាហើយ គឺវិទ្យាល័យ ហ៊ុន សែន តាខ្មៅ និងវិទ្យាល័យកំពង់ស្ពឺ ខេត្តកំពង់ស្ពឺ ខណៈ២សាលាទៀត គ្រោងនឹងធ្វើឡើងនៅវិទ្យាល័យ ខេត្តកំពង់ឆ្នាំង និងវិទ្យាល័យខេត្តព្រះសីហុន៕

ដោយ ហេង ណាលីន (រូបភាព៖ NOCC)