AKP ភ្នំពេញ ថ្ងៃទី១៥ ខែមករា ឆ្នាំ២០២៦--ការប្រកួតកីឡាបាល់ទះ ពានរង្វាន់សម្តេចក្រឡាហោម ស ខេង រដូវកាលទី៤ ឆ្នាំ២០២៦ លើវិញ្ញាសាបុរសមានការចូលរួមពីសមាគម-ក្លឹបចំនួន៣២ពី២៥រាជធានីខេត្ត ខណៈវិញ្ញាសានារីមាន៨ក្លឹប សរុប ៤០ក្លឹប ដោយចំនួនកើនឡើង ខណៈប្រាក់រង្វាន់ក៏កើនឡើងដូចគ្នារហូតដល់សរុប ១២៧លានរៀល។

នេះបើតាមការគូសបញ្ជាក់របស់លោកបណ្ឌិត អាំង សិរីពិសិដ្ឋ អនុប្រធាន និងជាអគ្គលេខាធិការ សហព័ន្ធកីឡាបាល់ទះកម្ពុជាតំណាងដ៏ខ្ពង់ខ្ពស់ឯកឧត្តមអភិសន្ដិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានសហព័ន្ធកីឡាបាល់ទះកម្ពុជា នៅក្នុងសន្និសីទសារព័ត៌មាន និងចាប់ឆ្នោតចែកពូក កាលពីល្ងាចថ្ងៃទី១៤ ខែមករា ឆ្នាំ២០២៦ នៅផ្សារទំនើបជីបម៉ុង ២៧១ មេហ្គាម៉ល រាជធានីភ្នំពេញជាមួយអ្នកឧកញ៉ា លាង ម៉េង សហស្ថាបនិក និងជាប្រធានអគ្គនាយកក្រុមហ៊ុន ខ្មែរប៊ែវើរីជីស ព្រមទាំងមន្ត្រីសហព័ន្ធ តំណាងក្លឹបផងដែរ។

លោកបណ្ឌិត អាំង សិរីពិសិដ្ឋ បានគូសបញ្ជាក់ទៀតថា ព្រឹត្តិការណ៍បាល់ទះ ពានរង្វាន់សម្តេចក្រឡាហោម ស ខេង ឆ្នាំ២០២៦នេះ សហព័ន្ធកីឡាបាល់ទះកម្ពុជាអនុញ្ញាតឱ្យសមាគមក្លឹបចូលរួមប្រកួតប្រជែងទាំង៣២ ឱ្យដាក់បញ្ជូលនូវកីឡាករជម្រើសជាតិចូលលេងលើទីលានប្រកួត ២នាក់ និងអនុញ្ញាតឱ្យក្លឹបចូលរួមទាំង៣២អាចដាក់កីឡាករបរទេសចូលលេងបានម្នាក់ ក្នុងគោលដៅសម្រួចគុណភាពនៃការប្រកួតប្រជែងកាន់តែខ្លាំងក្លាជាងមុន។ ចំពោះការប្រកួតបាល់ទះពានរង្វាន់នារី ដែលជាជំហានចាប់ផ្តើមដំបូង ក្នុងការកសាងធនធានកីឡាការិនីលើវិញ្ញាសាបាល់ទះ ក៏មាន៨ក្លឹបចូលរួមប្រកួតប្រជែងផងដែរ។

លោកអនុប្រធានរូបនេះបន្ថែមថា សម្រាប់ប្រាក់រង្វាន់ត្រៀមទុកសម្រាប់រដូវកាលថ្មីនេះសរុប ១២៧លានរៀល ក្នុងនោះជ័យលាភីផ្នែកបុរសជើងឯក ៥០លានរៀល ជើងឯករង ២០លានរៀល លេខ៣ ១២លានរៀល និងលេខ៤ ៨លានរៀល។ ចំពោះជ័យលាភីផ្នែកនារី ក្រុមជើងឯក ប្រាករង្វាន់ ១៥លានរៀល ជើងឯករង ៨លានរៀល លេខ៣ ៤លានរៀល និងលេខ៤ ២លានរៀល។ ជាមួយគ្នានោះ ក៏មានប្រាក់រង្វាន់លើកទឹកចិត្តលើជ័យលាភីឯកត្តជនមួយចំនួនទៀតផងដែរ។

តាមរយៈពានរង្វាន់សម្តេចក្រឡាហោម ស ខេង រដូវកាល ២០២៦ ជាមួយនឹងការប្រកួតថ្នាក់ជាតិជាច្រើនទៀតនោះត្រូវបានលោកបណ្ឌិតអនុប្រធានចាត់ទុកថា ជាការបន្តនិរន្តរភាពនៃដើរឆ្ពោះទៅមុខជានិច្ចនូវដំណើរការអភិវឌ្ឍវិស័យកីឡាបាល់ទះកម្ពុជា។ ជាមួយគ្នានេះ លោកបណ្ឌិត អាំង សិរីពិសិដ្ឋ ក៏បានថ្លែងអំណរគុណយ៉ាងជ្រាលជ្រៅចំពោះអ្នកឧកញ៉ា លាង ម៉េង សហស្ថាបនិក និងជាប្រធានអគ្គនាយកក្រុមហ៊ុន ខ្មែរប៊ែវើរីជីស ដែលតែងតែដាក់ទុនវិនិយោគរួម ក្នុងការជួយជំរុញឱ្យវិស័យកីឡាបាល់ទះកម្ពុជាកាន់តែរីកចម្រើន និងមានភាពល្បីល្បាញស្មើមុខស្មើមាត់ជាមួយបណ្តាប្រទេសជិតខាង។

គួរបញ្ជាក់ថា ពានសម្ដេចក្រឡាហោម ស ខេង រដូវកាលទី៤ ឆ្នាំ២០២៦ គ្រោងនឹងចាប់ផ្ដើមពីថ្ងៃទី០៧ ខែកុម្ភៈ ដល់ថ្ងៃទី០១ ខែមីនា ឆ្នាំ២០២៦ នៅវិមានពហុកីឡដ្ឋានជាតិអូឡាំពិក៕

ដោយ ហេង ណាលីន