AKP ភ្នំពេញ ថ្ងៃទី២១ ខែមករា ឆ្នាំ២០២៦--ការប្រកួតកីឡាវាយសីដណ្តើមពានរង្វាន់៧មករាមិនត្រឹមតែជាការចូលរួមអបអរសាទរ និងរម្លឹកដល់ថ្ងៃប្រវត្តិសាស្រ្តរំដោះប្រជាជនកម្ពុជាឱ្យរស់រានមានជីវិតទី២ពីរបបប្រល័យពូជសាសន៍ប៉ុលពតប៉ុណ្ណោះទេ ប៉ុន្តែថែមទាំងជាវេទិកាប្រកួតប្រជែងបង្កើតនូវមិត្តភាព និងសាមគ្គីភាពផងដែរ។

នេះជាការគូសបញ្ជាក់របស់ឯកឧត្តម លី កុសល រដ្ឋលេខាធិការ ក្រសួងការពារជាតិ និងជាប្រធានសហព័ន្ធកីឡាវាយសីកម្ពុជា នៅក្នុងឱកាសបិទបញ្ចប់ដោយជោគជ័យនៃការប្រកួតកីឡាវាយសីដណ្តើមពានរង្វាន់៧មករា ឆ្នាំ១៩៧៩-៧មករា ឆ្នាំ២០២៦ នៅចុងសប្តាហ៍នេះ ក្រោមវត្តមានឯកឧត្តម លី កុសល និងឯកឧត្តម ម៉ាង ស៊ីណេត អភិបាល នៃគណៈអភិបាល ខេត្តព្រះសីហនុ នៅក្លឹប TR Hope Badminton ក្រុងព្រះសីហនុ ខេត្តព្រះសីហុន។

ឯកឧត្តម លី កុសល បានមានប្រសាសន៍ថា ព្រឹត្តិការណ៍កីឡាវាយសីដណ្តើមពានរង្វាន់៧មករា ធ្វើឡើងក្នុងគោលបំណងរម្លឹកដឹងគុណចំពោះទិវាជ័យជម្នះ៧មករា១៩៧៩-២០២៦ ហើយក៏ជាវេទិកាប្រកួតប្រជែងគ្នា ដែលបង្កើតបានជាចំណងមិត្តភាព និងសាមគ្គីភាពរវាងសម្ព័ន្ធក្លឹបវាយសីមកពីបណ្តាខេត្តនានាផងដែរ។ តាមរយៈការប្រកួតនេះក៏បានផ្តល់ឱកាសដល់កីឡាករ កីឡាការិនីម្នាក់ៗបានបញ្ចេញទេពកោសល សមត្ថភាព ក៏ដូចជាវាស់ស្ទង់គុណផលបច្ចេកទេសដែលបានហ្វឹកហាត់កន្លងមក។ ការប្រកួតប្រជែងនេះបានផ្តល់ឱកាសដល់កីឡាករកីឡាការិនីវ័យក្មេង ដែលជាធនធានដ៏សំខាន់ក្នុងការត្រៀមខ្លួនក្នុងព្រឹត្តិការណ៍កីឡាយុវជនអាស៊ីឆ្នាំ២០៣១ ដែលកម្ពុជាទទួលធ្វើជាម្ចាស់ផ្ទះបានប្រកួតបញ្ចេញនូវសមត្ថភាពបច្ចេកទេស ដើម្បីឱ្យសហព័ន្ធបាន ជ្រើសរើសយកមកបំពាក់បំប៉នក្លាយជាកីឡាវាយសីសក្តានុពល និងប្រកួតប្រជែងប្រកបដោយគុណភាព។

ឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុបានកោតសរសើរ និងវាយតម្លៃខ្ពស់ចំពោះថ្នាក់ដឹកនាំ និងក្រុមការងារ នៃសហព័ន្ធកីឡាវាយសីកម្ពុជា ព្រមទាំងគណៈកម្មការរៀបចំការប្រកួត និងអ្នកពាក់ព័ន្ធទាំងអស់ដែលបានខិតខំយកអស់កម្លាំងកាយ កម្លាំងចិត្ត ប្រាជ្ញាស្មារតី រួមទាំងបច្ចេកទេសដើរតួនាទីយ៉ាងសំខាន់ ក្នុងការដោះស្រាយនូវរាល់បញ្ហាប្រឈមនានា និងបានធ្វើឱ្យដំណើរការ នៃការប្រកួតកីឡាវាយសីនាពេលនេះបានប្រពឹ្រត្តិទៅកាន់តែមានភាពសុក្រឹត និងទទួលបាននូវលទ្ធផលជាវិជ្ជមាន។ ឯកឧត្តមសង្ឈឹមយ៉ាងមុតមាំថា ការប្រកួតនេះនឹងបន្តបំផុសចលនាកីឡាវាយសីនៅខេត្តព្រះសីហនុកាន់តែផុសផុលទាក់ទាញមនុស្សគ្រប់វ័យមកលេងកីឡាវាយសីដើម្បីទទួលបានសុខភាព និងការអភិវឌ្ឍធនធានកីឡាវាយសីសម្រាប់ខេត្តផងដែរ។

បើតាមរបាយការណ៍ជម្រាបជូនដោយឯកឧត្តម កែវ រស់ អគ្គលេខាធិការ សហព័ន្ធកីឡាវាយសីកម្ពុជាបាន ឱ្យដឹងថា ការប្រកួតកីឡាវាយសីដណ្តើមពានរង្វាន់៧មករា ដែលខេត្តព្រះសីហនុទទួលធ្វើជាម្ចាស់ផ្ទះនេះ មានសមាសភាពសម្ព័ន្ធក្លឹបកីឡាវាយសីចូលរួមប្រកួតចំនួន១២ សរុបប្រតិភូ គ្រូបង្វឹកកីឡាករកីឡាការិនីចូលរួម ១៩៥នាក់ ប្រកួតលើ ១០វិញ្ញាសា ស្មើនឹង ៧៨ប្រកួត។ ចំពោះលទ្ធផលជ័យលាភី រួមមាន៖ ចំណាត់ថ្នាក់លេខ១ សម្ព័ន្ធក្លឹបវាយសី TR Hope Badminton ចំណាត់ថ្នាក់លេខ២ សម្ព័ន្ធក្លឹបកីឡាវាយសី ខនណិច និងចំណាត់ថ្នាក់លេខ៣ សម្ព័ន្ធក្លឹបកីឡាវាយសីយុវជននគរបាលជាតិ៕

ដោយ ហេង ណាលីន