AKP ភ្នំពេញ ថ្ងៃទី១០ ខែកុម្ភៈ ឆ្នាំ២០២៦--ការប្រកួតកីឡាវាយកូនបាល់អន្តរជាតិអាស៊ី វគ្គជម្រុះប្រចាំតបន់អាស៊ីអាគ្នេយ៍ និងអាស៊ីខាងកើតអាយុក្រោម១៤ឆ្នាំ ឆ្នាំ២០២៦ (ITF ASIA 14 & UNDER DEVELOPMENT CHAMPION SHIPS 2026)  បានឈានចូលសប្តាហ៍ទី២ហើយ ខណៈកីឡាការិនីម្ចាស់ផ្ទះកម្ពុជា ស៊្រុន ជំនិតអេសធើ ប្តេជ្ញាប្រឹងប្រែងឱ្យអស់ពីសមត្ថភាព ក្នុងការប្រកួតសប្តាហ៍ទី២នេះ។

ស្ថិតក្នុងវ័យ១១ឆ្នាំ កីឡាការិនី ស៊្រុន ជំនិតអេសធើ បានបង្ហាញក្តីរីករាយយ៉ាងខ្លាំង ដែលសហព័ន្ធកីឡាវាយកូនបាល់កម្ពុជាបានផ្តល់ឱកាសជូនដល់រូបនាងជាលើកដំបូងឱ្យចូលរួមប្រកួតអន្តរជាតិ ឆ្នាំ២០២៦ ក្នុងនាមជាម្ចាស់ផ្ទះ។ កីឡាការិនី ស្រ៊ុន ជំនិតអេសធើ បានឆ្លងកាត់៣ប្រកួត ឈ្នះ១ប្រកួតជាមួយកីឡាការិនីឡាវ ដោយលទ្ធផល ៦-៤ និង៦-២។ យ៉ាងណាកីឡាការិនីម្ចាស់ផ្ទះកម្ពុជារូបនេះនៅសល់ប្រកួតជាច្រើនទៀត ក្រោយការចាប់ឆ្នោតការប្រកួតបន្តនៅសប្តាហ៍ទី២នេះ។ នៅក្នុងឱកាសដ៏ល្អក្នុងការប្រកួតអន្តរជាតិ កីឡាការិនី ស៊្រុន ជំនិតអេសធើ ដែលចូលហ្វឹកហាត់បានរយៈពេល៣ឆ្នាំមកនេះក៏បានបង្ហាញពីការប្តេជ្ញាចិត្តខ្ពស់ថា នាងនឹងបន្តប្រឹងប្រែងប្រកួត និងការហ្វឹកហាត់ឱ្យបានកាន់តែខ្លាំងក្លាជាងមុនបន្ថែមទៀត ដើម្បីសម្រួចគុណភាពឱ្យកាន់តែប្រសើរ នាថ្ងៃខាងមុខ។

ចំពោះសមាសភាពកីឡាករ កីឡាការិនីម្ចាស់ផ្ទះកម្ពុជាមាន៤នាក់ គឺកីឡាករកាន់កូនកាត់ខ្មែរ-រស្ស៊ី មីហេអ៊ីឆេវ អាឡិចសេនឌឺ កីឡាករ មានសុផានិត និងកីឡាការិនី ម៉ន មករា និងកីឡាការិនី ស៊្រុន ជំនិតអេសធើ ដឹកនាំដោយគ្រូបង្វឹកកម្ពុជា លោក ឃ្លាំង ពន្លក។ កីឡាករ កីឡាការិនីម្ចាស់ផ្ទះកម្ពុជាត្រូវប្រកួតលើ៤វិញ្ញាសា គឺវិញ្ញាសាឯកត្តជនក្មេងប្រុស-ក្មេងស្រី និងវាយគូក្មេងប្រុស-ក្មេងស្រីក្រោម១៤ឆ្នាំ។

ការប្រកួតកីឡាវាយកូនបាល់អន្តរជាតិអាស៊ី វគ្គជម្រុះប្រចាំតបន់អាស៊ីអាគ្នេយ៍ និងអាស៊ីខាងកើតអាយុក្រោម១៤ឆ្នាំ (ITF ASIA 14 & UNDER DEVELOPMENT CHAMOPIONSHIPS 2026-Regional Qualifying Event South, Southeast, & East Asia) ត្រូវចាប់ផ្តើមប្រកួតជម្រុះពីថ្ងៃទី០៣-១៤ ខែកុម្ភៈ ឆ្នាំ២០២៦ នៅទីលានវាយកូនបាល់នៃពហុកីឡដ្ឋានជាតិមរតកតេជោ រាជធានីភ្នំពេញ ដោយមាន១២ប្រទេសចូលរួម ដោយក្នុង១ប្រទេសមានកីឡាករ២នាក់ និងកីឡារិនី២នាក់ ខណៈម្ចាស់ផ្ទះកម្ពុជាមានកីឡាករ កីឡាការិនី៤នាក់ចូលរួមប្រកួតប្រជែងដែរ។

បើតាមការគូសបញ្ជាក់របស់កញ្ញា ស៊ុម ចិន្តា អ្នកសម្របសម្រួលព្រឹត្តិការណ៍នៃសហព័ន្ធកីឡាវាយកូនបាល់កម្ពុជាបានឱ្យដឹងថា នេះជាការប្រកួតប្រជែងក្រុមសន្សំពិន្ទុ ដើម្បីស្វែងរកក្រុមជ័យលាភីដែលមានពិន្ទុៗជាងគេ (២ប្រទេស) សម្រាប់ការប្រកួតនៅជុំផ្តាច់ព្រ័ត្រ នាឆ្នាំ២០២៧ខាងមុខ។ កញ្ញា ស៊ុម ចិន្តា គូសបញ្ជាក់បន្ថែមថា តាមរយៈការទទួលបានសិទ្ធិរៀបចំធ្វើម្ចាស់ផ្ទះ ព្រឹត្តិការណ៍វាយកូនបាល់អន្តរជាតិវគ្គជម្រុះតំបន់មួយនេះនឹងជួយផ្តល់ឱកាសដល់កីឡាករ កីឡាការិនីវ័យក្មេងកម្ពុជាបានចូលរួមប្រកួតប្រជែង ដកស្រង់បទពិសោធន៍បច្ចេកទេសបន្ថែមជាមួយកីឡាករ កីឡាការិនីអន្តរជាតិមកពី១១ប្រទេសផ្សេងៗទៀត។ ព្រឹត្តិការណ៍ប្រកួតវាយកូនបាល់អន្តរជាតិវគ្គជម្រុះប្រចាំតំបន់អាស៊ីខាងកើត និងតំបន់អាស៊ីអាគ្នេយ៍ នៅប្រទេសកម្ពុជា ឆ្នាំ២០២៦នេះ មានគ្រូបង្វឹក និងកីឡាករ កីឡាការិនីចូលរួមសរុប ៦០នាក់ (ក្នុងប្រទេសមានកីឡាករ២នាក់ និងកីឡាការិនី២នាក់ គ្រូបង្វឹកម្នាក់)៕

ដោយ ហេង ណាលីន