AKP ភ្នំពេញ ថ្ងៃទី១១ ខែកុម្ភៈ ឆ្នាំ២០២៦--បន្ទាប់ពីរកឃើញបេក្ខភាព៣ក្រុមឡើងវគ្គ ៨ក្រុមចុងក្រោយ ពានរង្វាន់សម្ដេចតេជោ ហ៊ុន សែន លើកទី១៩ ថ្នាក់ជាតិ រដូវកាល ២០២៥-២០២៦ នៅរសៀលថ្ងៃពុធ ទី១១ ខែកុម្ភៈ ឆ្នាំ២០២៦នេះ នឹងបន្ដការប្រកួត ៥គូទៀត ដែលជាការប្រកួតជើងទី២ នៃវគ្គ១៦ក្រុមចុងក្រោយ ដើម្បីកាត់សេចក្ដីរកក្រុម៥ក្រុមបង្គ្រប់កៅអីវគ្គ ១/៤ ផ្ដាច់ព្រ័ត្រ។

ចំពោះ៥ប្រកួតនៅរសៀលថ្ងៃពុធនេះ រួមមាន៖ ក្រុមព្រះខ័នរាជស្វាយរៀងនឹងត្រូវបើកទ្វារពហុកីឡដ្ឋានជាតិ ទទួលក្រុមបាត់ដំបងយូណាយធីត បន្ទាប់ពីជើងទី១ បានយកឈ្នះក្រៅដី ៥-២។ ក្រុមអង្គរថាយហ្គឺរ នឹងត្រូវទទួលក្រុមភ្ញៀវគិរីវង់សុខសែនជ័យ លើទឹកដីខេត្តសៀមរាប បន្ទាប់ពីជើងទី១កន្លងទៅបានបានរងបរាជ័យក្រោមថ្វីជើងក្រុមគិរីវង់សុខសែនជ័យ ០-២។

ចំណែកក្រុម ISI ដង្កោសែនជ័យ នឹងត្រូវបើកទ្វារផ្ទះទទួលក្រុម អឹមអូអាយ កំពង់ដេវ៉ា ក្រោយយកឈ្នះក្រៅដី ៣-២ កាលពីជើងទី១ ស្របពេលក្រុមកងយោធពលខេមរភូមិន្ទ នឹងត្រូវជួបក្រុមជើងឯកថ្នាក់ខេត្ត មន្ទីរអប់រំ យុវជន និងកីឡា ខេត្តកំពង់ចាម នៅកីឡដ្ឋានស្ដាតចាស់ បន្ទាប់ពីយកឈ្នះ ៤-០ កាលពីជើងទី១ និងក្រុមណាហ្គាវើលដ៍ ត្រូវទទួលក្រុមឡាយហ្វខេត្តព្រះសីហនុ ក្រោយចាញ់ក្រៅដី ១-០ កាលពីជើងទី១។

នេះគឺជាកម្មវិធីប្រកួតដ៏ជក់ចិត្ត ពិសេសជំនួបរវាងក្រុមសមាជិកលីគកំពូលកម្ពុជាទាំង ៣គូ ដែលទាមទាត្រូវការជ័យជម្នះរៀងៗខ្លួន ដើម្បីឈានទៅវគ្គបន្ដ។ ចំពោះបេក្ខភាព ៣ក្រុម ដែលកំពុងឈរចាំនៅវគ្គ ៨ក្រុមចុងក្រោយ រួមមានក្រុមការពារតំណែងជើងឯកភ្នំពេញក្រោន, វិសាខា និងក្រុមបឹងកេត ដែលបានយកឈ្នះក្រុមថ្នាក់ខេត្តរៀងៗខ្លួន កាលពីថ្មីៗ៕

ដោយ ហេង ណាលីន (រូបភាព៖ CNCC)