AKP បន្ទាយមានជ័យ ថ្ងៃទី២៨ ខែកុម្ភៈ ឆ្នាំ២០២៦-- ដើម្បីកាត់បន្ថយគ្រោះថ្នាក់ចរាចរណ៍ និងលើកកម្ពស់សុវត្ថិភាពក្នុងការធ្វើដំណើររបស់បងប្អូនកម្មករនិយោជិត នាព្រឹកថ្ងៃសៅរ៍ ទី២៨ ខែកុម្ភៈ ឆ្នាំ២០២៦នេះ ក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករនិយោជិត (ស.ផ.ក) នៃប.ស.ស. បានចុះអប់រំផ្សព្វផ្សាយច្បាប់ស្តីពីចរាចរណ៍ផ្លូវគោក និងសុវត្ថិភាពក្នុងការដឹកជញ្ជូនកម្មករ នៅរោងចក្រ Hi TECH APPAREL (CAMBODIA) CO., LTD ស្ថិតក្នុងសង្កាត់និមិត្ត ក្រុងប៉ោយប៉ែត ក្រោមអធិបតីភាពឯកឧត្តមបណ្ឌិត ហេង សុផាន់ណារិទ្ធិ អគ្គនាយករង ប.ស.ស. និងជាប្រធានក្រុមការងារ ស.ផ.ក និង លោក យឹម សំណាង អភិបាលរងខេត្តបន្ទាយមានជ័យ តំណាងដ៏ខ្ពង់ខ្ពស់ឯកឧត្តម អ៊ុ រាត្រី អភិបាលនៃគណៈអភិបាលខេត្ត ដោយមានការចូលរួមពីសំណាក់ម្ចាស់រោងចក្រ អ្នកបើកបរយានយន្តដឹកជញ្ជូន និងកម្មករនិយោជិតយ៉ាងច្រើនកុះករ។

ក្នុងឱកាសនោះ ឯកឧត្តមបណ្ឌិត ហេង សុផាន់ណារិទ្ធិ បានពាំនាំនូវការផ្តាំផ្ញើសាកសួរសុខទុក្ខពីសំណាក់ថ្នាក់ដឹកនាំក្រសួងការងារ និងបណ្តុះបណ្តាលវិជ្ជាជីវៈ និងបានសង្កត់ធ្ងន់ថា សុវត្ថិភាពរបស់កម្មករនិយោជិតគឺជាអាទិភាពចម្បង។ ឯកឧត្តមបណ្ឌិតបានមានប្រសាសន៍ថា ការយល់ដឹងអំពីច្បាប់ចរាចរណ៍ មិនមែនគ្រាន់តែដើម្បីជៀសវាងការផាកពិន័យនោះទេ ប៉ុន្តែវាគឺជាការការពារអាយុជីវិតខ្លួនឯង និងអ្នកដទៃ។ អ្នកបើកបរយានយន្តដឹកកម្មករទាំងអស់ ត្រូវតែមានស្មារតីទទួលខុសត្រូវខ្ពស់បំផុត ព្រោះជីវិតមនុស្សរាប់សិបនាក់ស្ថិតក្នុងដៃរបស់បងប្អូន។

ឯកឧត្តមបណ្ឌិតក៏បានជំរុញឱ្យអ្នកបើកបរ និងកម្មករនិយោជិតទាំងអស់ត្រូវត្រួតពិនិត្យលក្ខណបច្ចេកទេសយានយន្តឱ្យបានទៀងទាត់។ មិនត្រូវបើកបរលើសល្បឿនកំណត់ និងមិនត្រូវបើកបរក្នុងស្ថានភាពស្រវឹង។ ត្រូវមានការយោគយល់អធ្យាស្រ័យខ្ពស់ក្នុងពេលបើកបរ។

ក្នុងពិធីនោះ លោក យឹម សំណាង អភិបាលរងខេត្តបន្ទាយមានជ័យ បានលើកឡើងពីកិច្ចខិតខំប្រឹងប្រែងរបស់រដ្ឋបាលខេត្ត ក្នុងការសម្របសម្រួល និងបង្កលក្ខណៈងាយស្រួលដល់បងប្អូនកម្មករ។ លោកបានបញ្ជាក់ថា ការចុះអប់រំផ្សព្វផ្សាយដោយផ្ទាល់នៅតាមរោងចក្របែបនេះ គឺជាយន្តការដ៏មានប្រសិទ្ធភាពក្នុងការបញ្ជ្រាបចំណេះដឹងផ្នែកច្បាប់ដល់មូលដ្ឋាន។

លោកអភិបាលរងខេត្តក៏បានអំពាវនាវដល់រោងចក្រ Hi TECH APPAREL និងគ្រប់ភាគីពាក់ព័ន្ធ ត្រូវបន្តសហការជាមួយក្រុមការងារ ប.ស.ស. ដើម្បីតាមដាន និងគ្រប់គ្រងយានយន្តដឹកជញ្ជូនកម្មករឱ្យស្របតាមបទដ្ឋានបច្ចេកទេស និងសុវត្ថិភាព ដើម្បីធានាថា "កម្មករទៅធ្វើការដោយសុវត្ថិភាព និងត្រឡប់មកផ្ទះវិញដោយស្នាមញញឹម"។

អង្គពិធីទាំងមូលបានបង្ហាញពីការប្តេជ្ញាចិត្តខ្ពស់ ក្នុងការចូលរួមចំណែកកាត់បន្ថយគ្រោះថ្នាក់ចរាចរណ៍នៅកម្ពុជា។ តាមរយៈវគ្គអប់រំនេះ បងប្អូនអ្នកបើកបរទទួលបាននូវចំណេះដឹងថ្មីៗបន្ថែមទៀតអំពីស្លាកសញ្ញាចរាចរណ៍ របៀបនៃការបើកបរដោយសុវត្ថិភាព និងការត្រៀមលក្ខណៈបង្ការផ្សេងៗ ដែលជាទុនយ៉ាងសំខាន់ក្នុងការអនុវត្តការងារប្រចាំថ្ងៃរបស់ពួកគេ៕

ដោយ ឈុន សារ៉ាត