AKP ភ្នំពេញ ថ្ងៃទី២៨ ខែកុម្ភ: ឆ្នាំ២០២៦-- ក្នុងស្មារតីយកចិត្តទុកដាក់ខ្ពស់លើសុខទុក្ខរបស់ប្រជាពលរដ្ឋ នៅព្រឹកថ្ងៃទី២៨ ខែកុម្ភៈ ឆ្នាំ២០២៦នេះ លោក ហឿន វីរៈ អភិបាលនៃគណៈអភិបាលស្រុកព្រះនេត្រព្រះ ខេត្តបន្ទាយមានជ័យ បានដឹកនាំកងកម្លាំងប្រដាប់អាវុធទាំង ៣ ប្រភេទ រួមជាមួយអាជ្ញាធរឃុំ-ភូមិ ចុះសួរសុខទុក្ខ និងនាំយកអំណោយសង្គ្រោះបន្ទាន់ ចែកជូនដល់បងប្អូនប្រជាពលរដ្ឋចំនួន ១៦គ្រួសារ ដែលផ្ទះសម្បែងរបស់ពួកគាត់ត្រូវបានរងការខូចខាតដោយសារគ្រោះធម្មជាតិខ្យល់កន្ត្រាក់។

     
ហេតុការណ៍ខ្យល់កន្ត្រាក់នេះ បានកើតឡើងកាលពីល្ងាចថ្ងៃទី២៧ ខែកុម្ភៈ ឆ្នាំ២០២៦ បណ្តាលឱ្យប៉ះពាល់ផ្ទះសម្បែងប្រជាពលរដ្ឋចំនួន ១៦ខ្នង (ទាំងខូចខាតធ្ងន់ និងស្រាល) ស្ថិតនៅក្នុង ភូមិឡោទេ ឃុំភ្នំលៀប ស្រុកព្រះនេត្រព្រះ ខេត្តបន្ទាយមានជ័យ។
    
ក្នុងឱកាសនោះ លោកអភិបាលស្រុក បានសម្តែងនូវការសោកស្តាយជាខ្លាំងចំពោះការបាត់បង់ និងការខូចខាតទ្រព្យសម្បត្តិ ផ្ទះសម្បែងរបស់បងប្អូនប្រជាពលរដ្ឋ។ ដោយលោកបានបញ្ជាក់ថា រាជរដ្ឋាភិបាល ក៏ដូចជាអាជ្ញាធរមូលដ្ឋាន តែងតែនៅជាប់ជាមួយបងប្អូនគ្រប់កាលៈទេសៈ ជាពិសេសក្នុងពេលជួបគ្រោះអាសន្នបែបនេះ។ "យើងមិនទុកឱ្យបងប្អូនណាម្នាក់រងគ្រោះដោយមិនមានការជួយជ្រោមជ្រែងនោះឡើយ។ ការចុះមកនៅពេលនេះ គឺដើម្បីផ្តល់កម្លាំងចិត្ត និងនាំយកជំនួយសង្គ្រោះបឋម ដើម្បីសម្រាលការលំបាកចំពោះមុខមួយគ្រា"។ 

      
ទន្ទឹមនឹងការផ្តល់អំណោយ លោកអភិបាលស្រុក ក៏បានឆ្លៀតឱកាសផ្ដាំផ្ញើ និងក្រើនរម្លឹកដល់បងប្អូនប្រជាពលរដ្ឋទាំងអស់ ឱ្យបង្កើនការប្រុងប្រយ័ត្នឱ្យបានខ្ពស់បំផុត ដោយហេតុថាបច្ចុប្បន្នជារដូវកាលភ្លៀងកក់ខែ ដែលងាយបង្កជាបាតុភូតខ្យល់កន្ត្រាក់ ផ្គរ រន្ទះ។
ស្វែងរកទីកន្លែងសុវត្ថិភាព ភ្លាមៗនៅពេលមានសញ្ញាខ្យល់ខ្លាំង ឬភ្លៀងធ្លាក់។ តាមដានព័ត៌មានធាតុអាកាស ឱ្យបានជាប់ជាប្រចាំពីក្រសួង ឬមន្ទីរធនធានទឹក និងឧតុនិយម ដើម្បីត្រៀមលក្ខណៈការពារខ្លួន និងក្រុមគ្រួសារ។

     
ការចុះជួយសង្គ្រោះនេះ មិនត្រឹមតែបង្ហាញពីការយកចិត្តទុកដាក់របស់អាជ្ញាធរប៉ុណ្ណោះទេ ប៉ុន្តែថែមទាំងឆ្លុះបញ្ចាំងពីសាមគ្គីភាពដ៏រឹងមាំរវាងកងកម្លាំងប្រដាប់អាវុធ និងប្រជាពលរដ្ឋនៅក្នុងមូលដ្ឋានផងដែរ៕

ដោយ ឈុនសារ៉ាត