AKP តាកែវ ថ្ងៃទី០៣ ខែមីនា ឆ្នាំ២០២៦-- ក្នុងឱកាសអបអរសាទរទិវាសុខភាពមាតា ទារក និងកុមារ និងក្នុងស្មារតីយកចិត្តទុកដាក់ខ្ពស់ លើសុខុមាលភាពមាតានិងទារក ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ ប្រធានគណៈកម្មាធិការសាខា និងជាប្រធានក្រុមការងារឥស្សរជនឆ្នើមថ្នាក់ជាតិនៃសាខាកាកបាទក្រហមកម្ពុជាខេត្តតាកែវ បានដឹកនាំសមាជិក សមាជិកា ចុះសួរសុខទុក្ខនិងនាំយកអំណោយមនុស្សធម៌ ចែកជូនស្ត្រីមានផ្ទៃពោះ និងស្ត្រីទើបសម្រាលកូនចំនួន ៥០នាក់ នៅមន្ទីរពេទ្យបង្អែកខេត្តតាកែវ ស្ថិតនៅក្នុងក្រុងដូនកែវខេត្តតាកែវ កាលពីថ្ងៃទី០២ ខែមីនា ឆ្នាំ២០២៦។

សកម្មភាពមនុស្សធម៌នេះត្រូវបានរៀបចំឡើងដើម្បីអបអរសាទរ ទិវាជាតិសុខភាពមាតា ទារក និងកុមារ ក្រោមប្រធានបទ រួមគ្នាលើកកម្ពស់គុណភាព សុវត្ថិភាព ប្រសិទ្ធភាពនៃការថែទាំផ្ទៃពោះ មុនសម្រាល រួមទាំងក្នុងបរិបទមានគ្រោះអាសន្ន ឬគ្រោះមហន្តរាយ ដើម្បីធានាថាទាំងម្ដាយ និងទារកមានសុខភាពល្អ។

មានប្រសាសន៍សំណេះសំណាលនាឱកាសនោះ ឯកឧត្តម វ៉ី សំណាង បានពាំនាំនូវការផ្ដាំផ្ញើសួរសុខទុក្ខពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិនៃផែនការសកម្មភាពរួមនៃអគ្គលេខាធិការអង្គការសហប្រជាជាតិ ដើម្បីសុខភាពស្ត្រី និងកុមារ ដែលជានិច្ចកាល សម្តេចតែងតែខ្វល់ខ្វាយ និងយកចិត្តទុកដាក់ខ្ពស់ចំពោះសុខភាពមាតា និងទារកនៅទូទាំងប្រទេស។

ឯកឧត្តម វ៉ី សំណាង ក៏បានកោតសរសើរចំពោះស្មារតី និងព្រហ្មវិហារធម៌ដ៏ឧត្តុង្គឧត្តមរបស់មាតាបិតាគ្រប់រូប ក្នុងការចិញ្ចឹមបីបាច់ថែរក្សាបុត្រធីតា និងបានគូសបញ្ជាក់ថា ទោះបីអត្រាមរណភាពមាតា និងទារកមានការថយចុះគួរឱ្យកត់សម្គាល់ក៏ពិតមែន ប៉ុន្តែសុខភាពមាតា និងកុមារ នៅតែជាអាទិភាពចម្បងរបស់រាជរដ្ឋាភិបាល។

ឯកឧត្តមអភិបាលខេត្តតាកែវ បានមានប្រសាសន៍បន្ថែមថា ខ្ញុំសូមលើកទឹកចិត្តឲ្យអ្នកម្ដាយគ្រប់រូប ត្រូវបន្តយកចិត្តទុកដាក់លើការថែទាំសុខភាព តាមរយៈការពិគ្រោះយោបល់ជាមួយគ្រូពេទ្យជំនាញ ពិនិត្យផ្ទៃពោះឱ្យបានទៀងទាត់ បំបៅដោះកូនដោយទឹកដោះម្ដាយ និងនាំកូនៗទៅចាក់វ៉ាក់សាំងបង្ការ ឱ្យបានគ្រប់ដូសតាមកាលកំណត់។

អំណោយមនុស្សធម៌ដែលបានផ្ដល់ជូនមាតាម្នាក់ៗនាឱកាសនោះ រួមមាន៖ មុងគ្រប១, ឈុតសម្លៀកបំពាក់ទារក១កំប្លេ, ស្រោមដៃស្រោមជើង, សាប៊ូទឹកសម្រាប់ទារក, កន្សែង, ឈុតពូកខ្នើយទារក, ប្រេងកូឡា, កន្ត្រកជ័រ និងថវិកាលើកទឹកចិត្តចំនួន20 000រៀលផងដែរ៕

ដោយ អ៊ុច សៀង