AKP ភ្នំពេញ ថ្ងៃទី៤ ខែមីនា ឆ្នាំ២០២៦--ក្នុងរយៈពេលចុងក្រោយនេះ យើងសង្កេតឃើញនូវការប៉ុនប៉ងយកមរតកវប្បធម៌របស់ជាតិយើងទៅបកស្រាយខុសពីប្រភពដើមពីសំណាក់ប្រទេសជិតខាងយើង។ នេះមិនមែនជាបញ្ហាថ្មីទេ ប៉ុន្តែជាការដាស់តឿនឱ្យយើងទាំងអស់គ្នាយល់ថា ការការពារ អភិរក្ស លើកស្ទួយ និងអភិវឌ្ឍន៍វប្បធម៌ជាតិ មិនមែនជាកាតព្វកិច្ចរបស់ក្រសួងតែមួយនោះទេ តែជាភារកិច្ចរួមរបស់ប្រជាជនកម្ពុជា។ នេះជាការថ្លែងបញ្ជាក់របស់លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ក្នុងឱកាស “ទិវាវប្បធម៌ជាតិ ៣មីនា លើកទី២៨ ឆ្នាំ២០២៦ និង ពិធីសំណេះសំណាលជាមួយសិល្បករសិល្បការិនីទូទាំងប្រទេសលើកទី៧ នៅសាលសន្និសីទចតុម្មុខ រាជធានីភ្នំពេញ នាថ្ងៃទី៣ ខែមីនា ឆ្នាំ២០២៦ ។

លោកជំទាវបណ្ឌិតសភាចារ្យ ភឿង សកុណា បានគូសបញ្ជាក់ថា៖ «សព្វថ្ងៃយុវជនយើងកំពុងប្រឈមមុខនឹងឥទ្ធពលដ៏ខ្លាំងក្លានៃចរន្តវប្បធម៌សកល ដែលហូរចូលមកយ៉ាងគំហុកតាមរយៈបច្ចេកវិទ្យាឌីជីថល។ យើងត្រូវតែទទួលស្គាល់ថា ការអភិវឌ្ឍនេះមានទាំងផលវិជ្ជមាន និងផលអវិជ្ជមាន»។ លោកជំទាវបណ្ឌិតសភាចារ្យបានលើកឡើងថា ខណៈដែលយុវជនអាចរៀនសូត្រពីពិភពលោកបានយ៉ាងទូលំទូលាយ វប្បធម៌បរទេសក៏បាននិងកំពុង ជះឥទ្ធិពលលើអត្តសញ្ញាណជាតិរបស់យើងផងដែរ ហើយក្នុងនាមជាអ្នកបន្តវេន យុវជនមានតួនាទីយ៉ាងសំខាន់ ក្នុងការជ្រើសរើស ត្រងត្រាប់ និងកែច្នៃវប្បធម៌បរទេសឱ្យស្របតាមគន្លងវប្បធម៌ជាតិដ៏ថ្លៃថ្លារបស់យើង។ លោកជំទាវបណ្ឌិតសភាចារ្យ រដ្ឋមន្រ្ដីបានសង្កត់ធ្ងន់ថា៖ «យើងត្រូវលើកទឹកចិត្តយុវជនឱ្យចេះបែងចែករវាងការទទួលយកអ្វីដែលថ្មី និងការបាត់បង់អត្តសញ្ញាណដើមរបស់ខ្លួន។ យើងត្រូវរួមគ្នាបង្កើតបរិយាកាសមួយដែលយុវជនមានមោទនភាពចំពោះវប្បធម៌ខ្មែរ ហើយប្រើប្រាស់វាជាមូលដ្ឋានដ៏រឹងមាំសម្រាប់ការច្នៃប្រឌិតថ្មីៗ ជាពិសេសយុវជនបន្តវេន។ យើងត្រូវបន្តធ្វើការយ៉ាងជិតស្និទ្ធជាមួយស្ថាប័នជាតិ និងអន្តរជាតិដើម្បីការពារនិងអភិរក្សបេតិកភណ្ឌវប្បធម៌របស់យើងតាមរយៈច្បាប់ និងឯកសារផ្លូវការនានា។»

ជាមួយគ្នានេះដែរ លោកជំទាវបណ្ឌិតសភាចារ្យ ភឿង សកុណា បានឱ្យដឹងទៀតថា ក្នុងបរិបទនៃបរិវត្តកម្មឌីជីថល ក្រសួងវប្បធម៌ និងវិចិត្រសិល្បៈ បានផ្តោតលើការកសាងសមត្ថភាពយុវជន ក្នុងការប្រើប្រាស់បច្ចេកវិទ្យាដើម្បីអភិរក្ស និងលើកស្ទួយវប្បធម៌ជាតិ ហើយក្រសួងលើកទឹកចិត្តយុវជនឱ្យក្លាយជាអ្នកផលិតមាតិកាវប្បធម៌ ជាសិល្បករឌីជីថល និងជាអ្នកផ្សព្វផ្សាយអំពីតម្លៃ វប្បធម៌ខ្មែរនៅលើឆាកអន្តរជាតិ។ លោកជំទាវបណ្ឌិតសភាចារ្យបានបញ្ជាក់បន្ថែមថា៖ «វត្តមានរបស់យុវជនក្នុងឧស្សាហកម្មវប្បធម៌ និងច្នៃប្រឌិត គឺមានសារៈសំខាន់កាន់តែខ្លាំងឡើង ដែលជំរុញឱ្យមានកិច្ចសហការដើម្បី ជំរុញភាពជាសហគ្រិន និងឱកាសអាជីវកម្មនៅក្នុងវិស័យសិល្បៈច្នៃប្រឌិតនេះ»៕

ដោយ៖ មករា