AKP ភ្នំពេញ ថ្ងៃទី០៥ ខែមីនា ឆ្នាំ២០២៦--ឯកឧត្តមបណ្ឌិត អ៊ុង បូរាត រដ្ឋលេខាធិការក្រសួងអប់រំ យុវជន និងកីឡា និងជាតំណាង ជាតិសម្រាប់ក្រុមប្រឹក្សាសហគមន៍សង្គម-វប្បធម៌អាស៊ានរបស់កម្ពុជា នៅថ្ងៃទី០៤ ខែមីនា ឆ្នាំ២០២៦ បានចូលរួមវេទិកាកម្រិតខ្ពស់សហគមន៍សង្គម-វប្បធម៌អាស៊ានឆ្នាំ២០២៦ នៅទីក្រុង ម៉ានីល ប្រទេសហ្វីលីពីន។

​វេទិកាដែលមានការចូលរួមពីរដ្ឋមន្ត្រី នៃក្រុមប្រឹក្សាសហគមន៍សង្គម-វប្បធម៌អាស៊ាន អគ្គលេខាធិការរងអាស៊ានទទួលបន្ទុកសហគមន៍សង្គម-វប្បធម៌អាស៊ាន ឧត្តមមន្ត្រី សហគមន៍សង្គម-វប្បធម៌អាស៊ាន គណៈប្រតិភូនៃរដ្ឋសមាជិកអាស៊ាន មន្ត្រីលេខាធិការ ដ្ឋានអាស៊ាន និងបណ្តាប្រទេសដែលជាដៃគូអភិវឌ្ឍ និងដៃគូសន្ទនាអាស៊ាននេះធ្វើឡើង ក្រោមគោលបំណងចំនួន៤ រួមមាន៖ ១.ឆ្លុះបញ្ចាំង និងគិតឡើងវិញចំពោះសមិទ្ធផលនវានុវត្តន៍ និងមេរៀនល្អៗរបស់សហគមន៍សង្គម-វប្បធម៌អាស៊ាន ដែលទទួលបានពីចក្ខុវិស័យឆ្នាំ២០២៥ និងកំណត់ចំណុចគន្លឹះដើម្បីជំរុញការអនុវត្តផែនការយុទ្ធសាស្ត្រ,២.ផ្តល់អំណាច និងផ្គត់ផ្គង់ដល់ការជំរុញយុទ្ធសាស្ត្រនានា ដែលផ្ដល់អំណាចដល់ប្រជាជនអាស៊ាន ក្នុងការសម្របខ្លួនដឹកនាំ និងមានភាពធន់ចាប់ពីការការពារសង្គម និងការអប់រំ រហូតដល់នវានុវត្តន៍ និងការចូលរួមរបស់ប្រជាពលរដ្ឋ, ៣.ផ្សារភ្ជាប់ និងសហការលើការពង្រឹងការតភ្ជាប់ឆ្លងសសរស្តម្ភ និងឆ្លងវិស័យ ដើម្បីជំរុញកំណើនប្រកបដោយបរិយាបន្ន សន្តិសុខមនុស្ស ការអភិវឌ្ឍ និងស្ថិរភាពសង្គម និង ៤.បំផុសគំនិត និងបង្កើតថ្មីបង្ហាញពីនវានុវត្តន៍ដែលផ្តោតលើប្រជាជន ឧត្តមានុវត្តន៍ដែលជាចក្ខុវិស័យរួមរបស់អាស៊ាន ការផ្តល់សិទ្ធិអំណាចដល់ប្រជាជន និងភាពធន់ជាសមូហភាព។

​ក្នុងវេទិកានេះគណៈប្រតិភូកម្ពុជាបានបង្ហាញពីចំណុចអាទិភាពចំនួន៤ ស្តីពីការ អភិវឌ្ឍធនធានមនុស្សសម្រាប់អនាគតរួមមាន៖ ១.ការពង្រឹងមូលដ្ឋានគ្រឹះ និងសមត្ថភាព ផ្នែកឌីជីថលដោយផ្តោតលើវិធីសាស្ត្របង្រៀនដែលជួយឱ្យសិស្សបង្កើតថ្មី ការផ្តល់ជំនាញ យ៉ាងពិតប្រាកដពីគ្រូបង្រៀនទៅកាន់សិស្សគ្រប់រូប ការអនុវត្តកិច្ចការគម្រោង ការគិតបែបស៊ីជម្រៅ និងការដោះស្រាយបញ្ហាជាក់ស្តែង, ២.ការបណ្តុះសិស្សានុសិស្សសម្រាប់អនាគតការងារ ដោយផ្តោតលើគន្លងវិជ្ជាជីវៈ សហគ្រិនភាព បច្ចេកវិទ្យាឌីជីថល និងជំនាញស្របតាមទីផ្សារការងារ, ៣.ការអភិវឌ្ឍប្រព័ន្ធជំនាញ ដោយផ្តោតលើឧស្សាហកម្ម និងផលិតភាពការងារតាមរយៈការបង្កើនជំនាញ ការបណ្តុះបណ្តាលការងារ និងការពង្រឹងជំនាញឡើងវិញ និង ៤.បំណិនផ្នែកឌីជីថល ដោយផ្តោតលើអក្ខរកម្មឌីជីថល ការវាយតម្លៃព័ត៌មាន ការយល់ដឹងអំពីប្រព័ន្ធសុវត្ថិភាពអ៊ីនធឺណិត ការទំនាក់ទំនង ប្រកបដោយប្រសិទ្ធភាព ការងារក្រុម ការគិតបែបស៊ីជម្រៅនិងការដោះស្រាយបញ្ហា ភាពធន់ទៅនឹងការប្រែប្រួល តម្លៃនៃវប្បធម៌ចម្រុះ ការគ្រប់គ្រងខ្លួនឯង និងពេលវេលា៕

ដោយ៖ ចាន់ សុភឿន (ប្រភព៖ ក្រសួងអប់រំ)