AKPភ្នំពេញថ្ងៃទី ០៥ ខែ មីនា ឆ្នាំ ២០២៦– ”ខ្ញុំទន្ទឹងរង់ចាំ គម្រោងស្ពានមិត្តភាពកម្ពុជា-ចិន មេគង្គក្រចេះ នឹងបើកដំណើរការជាផ្លូវការ ហើយចូលរួមចំណែកយ៉ាងវិជ្ជមានក្នុងការលើកកម្ពស់ការអភិវឌ្ឍសេដ្ឋកិច្ចកម្ពុជា និងការធ្វើឱ្យជីវភាពរស់នៅរបស់ប្រជាពលរដ្ឋកាន់តែងាយស្រួល”។នេះគឺជាការលើកឡើងតាមរយៈបណ្តាញសង្គមនាព្រឹកថ្ងៃទី៥ ខែ មីនា ពីសំណាក់ លោកវ៉ាង វិនពីន(Wang Wenbin )ឯកអគ្គរដ្ឋទូតចិនប្រចាំកម្ពុជា។

គួរបញ្ជាក់ថាតាមការឱ្យដឹងពីសំណាក់ ឯកឧត្តម ផន រឹម អ្នកនាំពាក្យក្រសួងសាធារណការនិងដឹកជញ្ជូននាពេលថ្មីនេះថា គម្រោងសាងសង់ស្ពានឆ្លងកាត់ទន្លេមេគង្គខេត្តក្រចេះ ផ្លូវបានតភ្ជាប់សម្រចបាន៩៦,៨៤ភាគរយហើយ ហើយគ្រោងនឹងបើកជូនប្រជាពលរដ្ឋឆ្លងកាត់ចាប់ពីថ្ងៃទី១ ខែមេសា ឆ្នាំ២០២៦ដែលមុនថ្ងៃពិធីបុណ្យចូលឆ្នាំប្រពៃណីខ្មែរមកដល់។

អ្នកនាំពាក្យក្រសួងសាធារណការបានថ្លែងបញ្ជាក់ដែរថាស្ពានមិត្តភាពកម្ពុជា-ចិន មេគង្គក្រចេះ និងហេដ្ឋារចនាសម្ព័ន្ធតភ្ជាប់ ជាគម្រោងយុទ្ធសាស្ត្រមួយដ៏សំខាន់សម្រាប់ការតភ្ជាប់ទំនាក់ទំនង និងជាក្តីសង្ឃឹមរវាងប្រជាពលរដ្ឋដែលរស់នៅត្រើយខាងកើត និងប្រជាពលរដ្ឋដែលរស់នៅត្រើយខាងលិច ទាំងការតភ្ជាប់តំបន់ដាច់ស្រយាលនៅភូមិភាគឦសាន មកកាន់ទីប្រជុំជនតភ្ជាប់ពីខេត្តក្រចេះ ទៅខេត្តកំពង់ធំ ដែលមានភាពប្រទាក់ក្រឡាគ្នាជាមួយផ្លូវជាតិសំខាន់ៗ នៃបណ្តាខេត្តដទៃទៀតនៅប្រទេសកម្ពុជា៕

ដោយ៖ មករា