AKP ភ្នំពេញ ថ្ងៃទី៥ ខែមីនា ឆ្នាំ២០២៦ -- ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការនិងជាប្រធានក្រុមប្រឹក្សាជាតិស្តីពីអាហារូបត្ថម្ភជាតិ បានជួបពិភាក្សាការងារជាមួយលោក Shawn K. Baker នាយកប្រតិបត្តិសកលរងទទួលបន្ទុកផ្នែកកម្មវិធី និងទំនាក់ទំនងអន្តរជាតិនៃអង្គការ ហេទ្បែន ខេលល័រ អន្តរជាតិ(Helen Keller) លើការអនុវត្តយុទ្ធសាស្ត្រជាតិស្តីពីការបញ្ចូលមីក្រូសារជាតិក្នុងចំណីអាហារឆ្នាំ២០២៥-២០៣០ និងសិក្សាស្វែងយល់ពីតួនាទី និងភារកិច្ចគន្លឹះរបស់ក្រុមប្រឹក្សាជាតិស្តីពីអាហារូបត្ថម្ភជាតិ ដោយរួមគ្នាពិនិត្យលើវឌ្ឍនភាព និងបញ្ហាប្រឈមស្តីពីការបញ្ចូលមីក្រូសារជាតិក្នុងចំណីអាហារនៅកម្ពុជា ជាពិសេសលើការពង្រឹងកិច្ចសហការរវាងអង្គការ Helen Keller ក្រុមប្រឹក្សាជាតិស្តីពីអាហារូបត្ថម្ភ និងក្រសួងផែនការ។ ជំនួបនេះ បានធ្វើឡើងនារសៀលថ្ងៃទី៤ ខែមីនា ឆ្នាំ២០២៦ នៅទីស្តីការក្រសួងផែនការ។  

ក្នុងជំនួបនោះ ឯកឧត្តម ប៊ិន ត្រឈៃ បានសម្តែងនូវការស្វាគមន៍ និងបានជម្រាបជូនគណៈប្រតិភូនូវកិច្ចដំណើរការងារ វឌ្ឍនភាពការងារមួយចំនួនរបស់ក្រុមប្រឹក្សាជាតិស្តីពីអាហារូបត្ថម្ភជាតិ(ក.ជ.អ.ជ.) ដែលបានបង្កើតក្រុមការងារបច្ចេកទេសចំនួនបី គឺ៖ ១- គណៈកម្មការបច្ចេកទេសអន្តរក្រសួង, ២-អនុគណៈកម្មការជាតិបញ្ចូលមីក្រូសារជាតិក្នុងចំណីអាហារនៅកម្ពុជា និង ៣- អនុគណៈកម្មការជាតិលុបបំបាត់បញ្ហាកង្វះជាតិអ៊ីយ៉ូដនៅកម្ពុជា និងថ្នាក់ក្រោមជាតិ ដែលមានគណៈកម្មាធិការសម្របសម្រួលការងារអាហារូបត្ថម្ភរាជធានី ខេត្ត ដែលកំពុងអនុវត្តការងារដោយសម្រេចបានសកម្មភាពសំខាន់ៗចំនួន ៤ រួមមាន កម្មវីធីបញ្ចូលជាតិអ៊ីយ៉ូដក្នុងអំបិលជាសកល, កម្មវិធីបញ្ចូលជាតិដែកក្នុងទឹកត្រី ទឹកស៊ីអ៊ីវ, កម្មវិធីបញ្ចូលមីក្រូសារជាតិក្នុងអង្ករ និង កំពុងធ្វើការសិក្សាការបញ្ចូលវីតាមីន បេ១ (B1) ក្នុងអំបិលអ៊ីយ៉ូដ និងកំពុងស្វែងរកការគាំទ្រពីដៃគូអភិវឌ្ឍន៍នានា ដើម្បីសិក្សាស្រាវជ្រាវនូវអាហារមូលដ្ឋានពាក់ព័ន្ធផ្សេងទៀតធ្វើការបញ្ចូលមីក្រូសារជាតិសមស្របចាំបាច់បន្ថែម ដើម្បីឆ្លើយតបទៅនឹងគោលនយោបាយ និងយុទ្ធសាស្រ្តជាតិនានា ចូលរួមអន្តរាគមន៍លើកកម្ពស់សុខភាពសាធារណៈនិងអាហារូបត្ថម្ភ ជាពិសេសស្រ្តីនិងកុមារ និងឈានទៅអភិវឌ្ឍមូលធនមនុស្សនិងការអភិវឌ្ឍសង្គមជាតិ។

ឯកឧត្តមរដ្ឋមន្ត្រីបានលើកឡើងថា អ្វីដែលជាការកត់សម្គាល់ ថ្មីៗនេះ កាលពីថ្ងៃទី៣ ខែមីនា ឆ្នាំ២០២៦ ក.ជ.អ.ជ. បានប្រកាសផ្សព្វផ្សាយដាក់ឱ្យប្រើប្រាស់ជាផ្លូវការនូវយុទ្ធសាស្ត្រជាតិស្តីពីការបញ្ចូលមីក្រូសារជាតិក្នុងចំណីអាហារឆ្នាំ២០២៥-២០៣០ ដែលជាឯកសារគោល និងបានឆ្លុះបញ្ចាំងពីការខិតខំប្រឹងប្រែងក្នុងការកសាងសុខុមាលភាពសង្គម ភាពធន់ និងប្រកបដោយបរិយាបន្ន ដោយមិនទុកនរណាម្នាក់ចោល នោះឡើយ។ ឯកឧត្ដមរដ្ឋមន្រ្ដីបានបញ្ជាក់ថា  ក.ជ.អ.ជ. បានជួបប្រទះនូវបញ្ហាប្រឈមមួយចំនួន ដែលត្រូវការភាគីពាក់ព័ន្ធរួមគ្នាដោះស្រាយ និងស្នើដល់អង្គការ Helen Keller Intl ពង្រីកវិសាលភាពឧបត្ថម្ភគាំទ្រទាំងថវិកា និងបច្ចេកទេស ដើម្បីរួមគ្នាលើកកម្ពស់សុខភាពសាធារណៈនិងអាហារូបត្ថម្ភ ជាពិសេសស្រ្តីនិងកុមារ។

ឯកឧត្តមរដ្ឋមន្ត្រីបានថ្លែងអំណរគុណដល់អង្គការ Helen Keller Intl ដែលបានឧបត្ថម្ភគាំទ្រលើការរៀបចំយុទ្ធសាស្ត្រជាតិស្តីពីការបញ្ចូលមីក្រូសារជាតិក្នុងចំណីអាហារឆ្នាំ២០២៥-២០៣០ និងបានចូលរួមចំណែកដឹកនាំសម្របសម្រួលការងារលើកកម្ពស់អាហារូបត្ថម្ភ  តាមរយៈ ការបញ្ចូលមីក្រូសារជាតិក្នុងចំណីអាហារ។

ជាមួយគ្នានេះ លោក Shawn K. Baker បានសម្តែងនូវការអរគុណចំពោះឯកឧត្តមរដ្ឋមន្ត្រីដែលបានផ្តល់នូវជំនួបពិភាក្សាដ៏មានតម្លៃដើម្បីបន្តធ្វើការរួមគ្នាកសាងកែលម្អលើកកម្ពស់គុណភាពជីវិតប្រជាជនកម្ពុជា និងមនុស្សជុំវិញពិភពលោកទាំងមូលឱ្យកាន់តែប្រសើរឡើង។ ទន្ទឹមនេះ គីភាគីទាំងពីរ សន្យានឹងបន្តពង្រឹងពង្រីកកិច្ចសហការជាមួយគ្នា ដើម្បីធានានិងលើកកម្ពស់សុខុមាលភាពប្រជាពលរដ្ឋ និងការឈានទៅសម្រេចបានក្របខ័ណ្ឌគោលដៅអភិវឌ្ឍប្រកបដោយចីរភាពកម្ពុជា ឆ្នាំ២០១៦-២០៣០។

សូមបញ្ជាក់ផងដែរថា Helen Keller Intl ត្រូវបានបង្កើតឡើងរួមគ្នានៅឆ្នាំ១៩១៥ ដោយបុគ្គលវិសាមញ្ញពីររូបគឺ Helen Keller និង George Kessler ដើម្បីជួយទាហានពិការភ្នែកក្នុងអំឡុងពេលបម្រើការងាររបស់ពួកគេក្នុងសង្គ្រាមលោកលើកទី១។ បេសកម្ម Helen Keller Intl គឺធ្វើការដើម្បីកែលម្អជីវិតរបស់មនុស្សជុំវិញពិភពលោក ដោយការពារចក្ខុវិស័យ បង្កើនអាហារូបត្ថម្ភ និងប្រយុទ្ធប្រឆាំងនឹងជំងឺ។ ចាប់ពីឆ្នាំ១៩៩២ អង្គការ Helen Keller Intl  បានធ្វើការដើម្បីលើកកម្ពស់អាហារូបត្ថម្ភ បង្កើនសន្តិសុខស្បៀង និងការពារជំងឺ ដោយធ្វើការយ៉ាងជិតស្និទ្ធជាមួយប្រទេសកម្ពុជា ក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ, ទីស្តីការគណៈរដ្ឋមន្ត្រី និងក្រសួងសុខាភិបាល ក្នុងការជួយធានាបាននូវអាហារូបត្ថម្ភល្អបំផុតសម្រាប់មនុស្សរាប់លាននាក់ដោយការតស៊ូមតិសម្រាប់គោលនយោបាយអាហារូបត្ថម្ភប្រកបដោយតម្លាភាព ការគាំទ្រម្តាយដែលមានវីតាមីនមុនសម្រាល និងបំបៅដោះកូន និងផ្តល់សារធាតុចិញ្ចឹមសំខាន់ៗដូចជាវីតាមីនA ដល់កុមារតូចៗ៕

ដោយ៖ ពេជ្រ សំអឿន( ប្រភព៖ក្រសួងផែនការ )