AKP ព្រះសីហនុ ថ្ងៃទី៥ ខែមីនា ឆ្នាំ២០២៦--
លោក តឹក ជីវ៉ាយ អនុប្រធានមន្ទីរកសិកម្មរុក្ខាប្រមាញ់ និងនេសាទខេត្តព្រះសីហនុ និងលោកស្រី ហែម ផល្លា ប្រធានការិយាល័យផលិតកម្ម និងបសុព្យាបាល ដោយមានការចូលរួមសហការជាមួយថ្នាក់ដឹកនាំភូមិ និងមន្រ្តីកសិកម្មឃុំ បានចុះចាក់ថ្នាំការពារជំងឺសារទឹកគោ ក្របី ជូនប្រជាពលរដ្ឋស្ថិតនៅភូមិអុង សង្កាត់រាម ក្រុងកំពង់សោម ខេត្តព្រះសីហនុ នៅថ្ងៃទី៥ ខែមីនា ឆ្នាំ២០២៦ ‎។ 
យោងតាមរបាយការណ៍របស់ការិយាល័យផលិតកម្ម និងបសុព្យាបាលបានឱ្យដឹងថា ចំពោះលទ្ធផលការចុះចាក់ថ្នាំជំងឺសាទឹកគោ ក្របី សរុបបានចំនួន ៦៣ក្បាល ក្នងនោះ គោចំនួន ៤០ក្បាល និងក្របីសរុបចំនួន ២៣ក្បាល ព្រមទាំងបានធ្វើការចែក ជូននូវថ្នាំព្យាបាល និងសម្ភារៈ បរិក្ខារបសុពេទ្យជូនដល់ភ្នាក់ងារសុខភាពសត្វភូមិ ដើម្បីធ្វើការចាក់បន្ត ។

សូមរម្លឹកថា ការិយាល័យបសុព្យាបាល នៃមន្ទីរកសិកម្មរុក្ខាប្រមាញ់ និងនេសាទខេត្តព្រះសីហនុ តែងតែសហការជាមួយអាជ្ញាធរភូមិ ឃុំ សង្កាត់ និងភ្នាក់ងារពេទ្យ សត្វភូមិ ឃុំនៅទូទាំងខេត្តព្រះសីហនុ ធ្វើការចុះចាក់វ៉ាក់សាំងការពារជំងឺសាទឹកគោ ក្របី ក៏ដូចជាជំងឺអុជក្តាមគោ ក្របី ជូនប្រជាពលរដ្ឋនៅក្នុងខេត្តព្រះសីហនុ ជាបន្តបន្ទាប់ ព្រមទាំងបានធ្វើការបណ្តុះបណ្តាលដល់ភ្នាក់ងារពេទ្យសត្វភូមិ ឃុំ ឱ្យចេះវិធីព្យាបាលជំងឺសត្វនៅតាមភូមិថែមទៀតផង ដើម្បីឱ្យសុខភាពសត្វបងប្អូនប្រជាពលរដ្ឋមានសុខភាពល្អ ៕

ដោយ៖ ងូ សុមុនី