AKP ភ្នំពេញ ថ្ងៃទី០៦ ខែមីនា ឆ្នាំ២០២៦ -- ក្រុមព្រះខ័នរាជស្វាយរៀងបានវាយបកឈ្នះក្រុមរួមជាតិ ភ្នំពេញក្រោន ដោយលទ្ធផលបច្ចេកទេស ៤ទល់១ នៅក្នុងការប្រកួតពានរង្វាន់កម្រិតទី៣ទ្វីបអាស៊ី-AFC Challenge League រដូវកាល ២០២៥-២០២៦ វគ្គ១/៤ ជើងទី១ កាលពីយប់ថ្ងៃទី០៥ ខែមីនា ឆ្នាំ២០២៦ នៅពហុកីឡដ្ឋានជាតិអូឡាំពិក។

ស្ថិតនៅក្រោមក្រសែភ្នែកទស្សនិកជនចូលរួមទស្សនាផ្ទាល់នៅពហុកីឡដ្ឋានជាតិជាង ២ម៉ឺននាក់ ការប្រកួតអន្តរជាតិពានរង្វាន់កម្រិតទី៣ ទ្វីបអាស៊ី AFC Challenge League 2025/26 ធ្វើឱ្យក្រុមរួមជាតិទាំងពីរនេះបង្កើនបានការទាក់ទាញដ៏ជក់ចិត្ត និងស្វិតស្វាញ។ ការប្រកួតរវាងក្រុមខ្លាំងៗទាំង២របស់កម្ពុជាក្នុងពានរង្វាន់អន្ដរជាតិនេះ បានធ្វើទទួលការចាប់អារម្មណ៍ជាខ្លាំងពីអ្នកទស្សនា បន្ទាប់ពីក្រុមនីមួយៗបានប្រើប្រាស់កីឡាករបរទេសស្ទើរទាំងស្រុង ក្នុងជម្រើស១១នាក់ដំបូង ហើយបានវាយសម្រុកគ្នាពេញ ៩០នាទី ចំពោះមុខអ្នកទស្សនាផ្ទាល់ចំនួន ២០,២៤៩នាក់។

នៅក្នុងការប្រកួតត្រឹម៣នាទី កីឡាករ Moses Dyer របស់ក្រុមភ្នំពេញក្រោន បានបើកការនាំមុខលើក្រុមភ្ញៀវ ព្រះខ័នរាជស្វាយរៀង ហើយនៅនាទី២៩ កីឡាករ Peprah Kwame របស់ព្រះខ័នរាជស្វាយរៀង ធ្វើសម្រេចបាន១គ្រាប់តាមស្មើវិញ ដោយលទ្ធផល ១ទល់១នេះរក្សាដល់ចប់វគ្គទី១។ ចូលវគ្គទី២ ព្រះខ័នរាជស្វាយរៀងធ្វើសម្រេចគ្រាប់បាល់បន្ថែមបាន៣គ្រាប់ទៀត ដោយរកបានដោយ Peprah Kwame នៅនាទី៦៧ និងនាទី៨២ និងមិត្ដរួមក្រុម Patrick Robson នៅនាទី៧៥ ដោយបាល់ពិន័យ ១១ម៉ែត្រ។

ជ័យជម្នះរបស់ព្រះខ័នរាជស្វាយរៀង ៤-១ លើក្រុមភ្នំពេញក្រោនបានក្លាយជាដើមទុនដ៏សំខាន់សម្រាប់ក្រុមជើងឯករងឆ្នាំចាស់ ព្រះខ័នរាជស្វាយរៀង ក្នុងការប្រកួតកាត់សេចក្ដីជើងទី២ តែជាសម្ពាធមួយដ៏ធំ សម្រាប់ភ្នំពេញក្រោន ដែលត្រូវប្រកួតក្រៅដី។ ជំនួបកាត់សេចក្ដីជើងទី២ ក្នុងវគ្គ ១/៤ ផ្ដាច់ព្រ័ត្រពានកម្រិតទី៣ ទ្វីបអាស៊ី រវាងក្រុមកម្ពុជាទាំងពីរនេះ គ្រោងនឹងធ្វើឡើងនៅពហុកីឡដ្ឋានជាតិមរតកតេជោ នាយប់ថ្ងៃទី១២ ខែមីនា ឆ្នាំ២០២៦ ដោយព្រះខ័នរាជស្វាយរៀងជាក្រុមម្ចាស់ផ្ទះ៕

ដោយ ហេង ណាលីន (រូបភាព៖ ព្រះខ័នរាជស្វាយរៀង)