AKP ត្បូងឃ្មុំ ថ្ងៃទី០៧ ខែឧសភា ឆ្នាំ២០២៦-- រដ្ឋបាលខេត្តត្បូងឃ្មុំបានរៀបចំកិច្ចប្រជុំសាមញ្ញលើកទី២៤ អាណត្តិទី៤ របស់ក្រុមប្រឹក្សាខេត្ត ក្រោមអធិបតីភាពឯកឧត្តម ឡុង ធាម ប្រធានក្រុមប្រឹក្សាខេត្ត និង ឯកឧត្ដម ប៉ែន កុសល្យ អភិបាលនៃគណៈអភិបាលខេត្តត្បូងឃ្មុំ នៅព្រឹកថ្ងៃព្រហស្បតិ៍ ទី០៧ ខែឧសភា ឆ្នាំ២០២៦ ដោយកិច្ចប្រជុំនេះបានប្រព្រឹត្តទៅនៅសាលប្រជុំ (ខ) សាលាខេត្តត្បូងឃ្មុំ ដោយមានការអញ្ជើញចូលរួមពីសំណាក់ សមាជិក-សមាជិកាក្រុមប្រឹក្សាខេត្ត អភិបាលរងខេត្ត, នាយក-នាយករងរដ្ឋបាលសាលាខេត្ត កងកម្លាំងប្រដាប់អាវុធទាំងបីប្រភេទ ថ្នាក់ដឹកនាំមន្ទីរ-អង្គភាពជុំវិញខេត្ត និងមន្ត្រីពាក់ព័ន្ធជាច្រើនរូប។

យោងតាមរបៀបវារៈនៃកិច្ចប្រជុំសាមញ្ញលើកទី២៤ អាណត្តិទី៤ អង្គប្រជុំបានពិភាក្សា និងអនុម័តលើចំណុចសំខាន់ៗ រួមមាន៖ ១- ពិនិត្យ និងអនុម័តលើសេចក្តីព្រាងកំណត់ហេតុ នៃកិច្ចប្រជុំសាមញ្ញលើកទី២៣ អាណត្តិទី៤ របស់ក្រុមប្រឹក្សាខេត្ត។ ២- ពិនិត្យ ពិភាក្សា និងអនុម័តលើសេចក្តីព្រាងរបាយការណ៍បូកសរុបលទ្ធផលការងារប្រចាំខែមេសា ឆ្នាំ២០២៦ របស់រដ្ឋបាលខេត្តត្បូងឃ្មុំ ដែលបង្ហាញពីសមិទ្ធផលនានាក្នុងការអភិវឌ្ឍខេត្ត និងការរក្សាសន្តិសុខសណ្តាប់ធ្នាប់ជូនបងប្អូនប្រជាពលរដ្ឋ។ ៣- បញ្ហាផ្សេងៗ៖ ស្តាប់របាយការណ៍វឌ្ឍនភាពការងារពីសំណាក់គណៈកម្មាធិការនានារបស់ក្រុមប្រឹក្សាខេត្ត ដើម្បីពិនិត្យលើចំណុចខ្វះខាត និងដាក់ចេញនូវដំណោះស្រាយឱ្យចំគោលដៅ។

ក្នុងឱកាសនោះ ឯកឧត្តម ឡុង ធាម ប្រធានក្រុមប្រឹក្សាខេត្ត បានសម្ដែងនូវការកោតសរសើរ និងវាយតម្លៃខ្ពស់ចំពោះមន្ទីរ-អង្គភាពជុំវិញខេត្ត ក៏ដូចជាអាជ្ញាធរគ្រប់លំដាប់ថ្នាក់ ដែលបានខិតខំប្រឹងប្រែងយកចិត្តទុកដាក់បំពេញតួនាទី ភារកិច្ច សម្រេចបានលទ្ធផលគួរជាទីមោទនៈក្នុងខែមេសាកន្លងទៅ។

ឯកឧត្តមប្រធានក្រុមប្រឹក្សា ក៏បានផ្តល់យោបល់បន្ថែម ចំពោះការដោះស្រាយរាល់បញ្ហាជាទុក្ខកង្វល់ របស់ប្រជាពលរដ្ឋ ដើម្បីឱ្យអង្គប្រជុំពិភាក្សាគ្នា ដើម្បីរកដំណោះស្រាយរួមគ្នា ឆ្ពោះទៅការអភិវឌ្ឍមូលដ្ឋាន ក្រុង ស្រុក ឃុំ សង្កាត់ កាន់តែល្អប្រសើរ។

ជាមួយគ្នានោះដេរ ឯកឧត្តម ប៉ែន កុសល្យ អភិបាលនៃគណៈអភិបាលខេត្ត ក៏បានណែនាំដល់មន្ត្រីពាក់ព័ន្ធទាំងអស់ ត្រូវបន្តសហការគ្នាឱ្យបានស្អិតរមួត ក្នុងស្មារតីទទួលខុសត្រូវខ្ពស់ ដើម្បីជំរុញការផ្តល់សេវាសាធារណៈជូនប្រជាពលរដ្ឋឱ្យកាន់តែឆាប់រហ័ស និងមានប្រសិទ្ធភាព សំដៅរួមចំណែកលើកកម្ពស់ជីវភាពរស់នៅរបស់ប្រជាពលរដ្ឋ និងអភិវឌ្ឍន៍ខេត្តត្បូងឃ្មុំ ឱ្យកាន់តែរីកចម្រើនលើគ្រប់វិស័យបន្ថែមទៀត៕

ដោយ AKP