AKP ភ្នំពេញ ថ្ងៃទី២២ ខែមិថុនា ឆ្នាំ២០២៦ -- សហរដ្ឋអាមេរិកកំពុងធ្វើការជាមួយប្រទេសកាតាលើផែនការមួយ ដើម្បីផ្តល់សិទ្ធិឱ្យអ៊ីរ៉ង់ទទួលបានទ្រព្យសម្បត្តិដែលត្រូវបានបង្កកចំនួន ៦ពាន់លានដុល្លារអាម៉េរិកសម្រាប់ការចំណាយផ្នែកមនុស្សធម៌។ នេះបើយោងតាមការចុះផ្សាយរបស់សារព័ត៌មាន The Wall Street Journal កាលពីពេលថ្មីៗនេះ ដោយបានដកស្រង់ប្រភពព័ត៌មានរបស់ខ្លួន។

សារព័ត៌មាននោះបានរាយការណ៍ថា គំនិតផ្តួចផ្តើមនេះកំពុងត្រូវបានចាត់ទុកថាជាការលើកទឹកចិត្តសម្រាប់អ៊ីរ៉ង់ក្នុងការបញ្ចប់កិច្ចព្រមព្រៀងដ៏ទូលំទូលាយជាមួយសហរដ្ឋអាមេរិកសម្រាប់ដំណោះស្រាយចុងក្រោយ។

ក្រោមកិច្ចព្រមព្រៀងដែលបានស្នើឡើង មូលនិធិដែលត្រូវបានបង្កកនៅក្នុងប្រទេសកាតានាពេលបច្ចុប្បន្ននឹងត្រូវបានប្រើប្រាស់ដើម្បីទិញអាហារ ថ្នាំពេទ្យ និងទំនិញមនុស្សធម៌ផ្សេងៗទៀត។

ប្រភពព័ត៌មានបានប្រាប់សារព័ត៌មាននោះថា យន្តការនេះអាចបម្រើជាក្របខ័ណ្ឌសម្រាប់សម្បទាននាពេលអនាគតទាក់ទងនឹងទ្រព្យសម្បត្តិអ៊ីរ៉ង់ដែលត្រូវបានបង្កកបន្ថែមទៀត។ អ៊ីរ៉ង់មិនទាន់បានយល់ព្រមទៅលើសំណើនេះនៅឡើយទេ។

នៅថ្ងៃទី១៤ ខែមិថុនា អ៊ីរ៉ង់ និងសហរដ្ឋអាមេរិកបានបញ្ជាក់ថា ការងារលើអនុស្សរណៈនៃការយោគយល់គ្នាត្រូវបានបញ្ចប់។ ពេញមួយយប់ចូលថ្ងៃទី១៨ ខែមិថុនា ប្រទេសទាំងពីរបានចុះហត្ថលេខាពីចម្ងាយលើឯកសារដែលចែងអំពីការបញ្ចប់ជម្លោះយោធាដែលបានចាប់ផ្តើមនៅថ្ងៃទី២៨ខែកុម្ភៈ។

អនុស្សរណៈនេះនឹងផ្តល់ពេល ៦០ថ្ងៃដល់ប្រទេសទាំងពីរ ដើម្បីចរចាកិច្ចព្រមព្រៀងចុងក្រោយ ស្តីពីបញ្ហានុយក្លេអ៊ែរអ៊ីរ៉ង់ និងទណ្ឌកម្មរបស់សហរដ្ឋអាមេរិក។ លើសពីនេះទៀត វាកំណត់ពេលវេលាសម្រាប់សហរដ្ឋអាមេរិកដើម្បីដកចេញនូវការបិទផ្លូវកងទ័ពជើងទឹករបស់ខ្លួន និងសម្រាប់អ៊ីរ៉ង់ដើម្បីស្តារការដឹកជញ្ជូនតាមច្រកសមុទ្រហ័រមុសឡើងវិញ៕

ដោយ៖ យា ចិន្ដាខន្ដី (ប្រភព៖ ស្ពុតនីក)