AKP កំពង់ស្ពឺ ថ្ងៃទី៣០ ខែឧសភា ឆ្នាំ២០២៥-- ឯកឧត្តម ស៊្រុន ស្រ៊ន់ អភិបាលរងនៃគណៈអភិបាលខេត្តកំពង់ស្ពឺទទួលបន្ទុកវិស័យកសិកម្ម រុក្ខាប្រមាញ់ និងនេសាទ ដឹកនាំប្រតិភូថ្នាក់ដឹកនាំមន្ទីរ និងមន្ត្រីជំនាញ នៃមន្ទីរកសិកម្ម រុក្ខាប្រមាញ់ និងនេសាទ ក្រុមការងាររដ្ឋបាលស្រុកថ្ពង និងយុវជនសហភាពសហព័ន្ធយុវជនកម្ពុជាខេត្ត ចុះសួរសុខទុក្ខ និងសំណេះសំណាលជាមួយគណៈកម្មការគ្រប់គ្រងសហគមន៍ព្រៃឈើប្រាំបីមុំ ស្ថិតនៅភូមិត្រពាំងក្រើញ ឃុំប្រាំបីមុំ ស្រុកថ្ពង ខេត្តកំពង់ស្ពឺ នាថ្ងៃទី២៩ ខែឧសភា ឆ្នាំ២០២៥។

លោក សឿន ឡាយ ប្រធានសហគមន៍ព្រៃឈើប្រាំបីមុំ បានឱ្យដឹងថា សហគមន៍នេះបានបង្កើតឡើងមានរយៈពេលជិត២០ឆ្នាំមកហើយ ដោយមានការកំណត់ព្រំប្រទល់ដែនសហគមន៍ច្បាស់លាស់ រួមជាមួយឆន្ទៈរបស់គណៈកម្មាការសហគមន៍ទើបសហគម៍មាននិរន្តរភាពដល់បច្ចុប្បន្ននេះ។ សម្រាប់ដីសហគមន៍នេះគឺមានការគ្រប់គ្រងចំនួន២ទីតាំង៖ ទីតាំងទី១បង្កើតតាំងពីឆ្នាំ២០០២ និងទីតាំងទី២បង្កើត និងប្រកាស់ទទួលស្គាល់នៅឆ្នាំ២០២៣ ដែលមានផ្ទៃដីសរុប ១៦០០ហិកតា ហើយក្នុងនោះសត្វទន្សោងមានវត្តមានរស់នៅមានជាង១០០ក្បាល។ ហើយនៅកំពង់ស្ពឺគឺមានសហគមន៍ទៅដល់៥០សហគមន៍ ហើយលក្ខណៈពិសេស វត្តមានប្រភេទសត្វទន្សោងនេះមានតែក្នុងសហគមន៍១នេះទេ។

លោកប្រធានបានអះអាងថា សត្វព្រៃមានប្រើស ទន្សោង ឈ្លូស ជ្រូកព្រៃ ក្ងោក និងសត្វព្រៃជាច្រើនប្រភេទទៀត ដែលនៅសេសសល់ក្នុងព្រៃនេះ កន្លងមករងការវាយប្រហារយ៉ាងធ្ងន់ធ្ងរ  និងប្រឈមផុតពូជ។ ប្រសិនបើអាជ្ញាធរ សមត្ថកិច្ចជំនាញពាក់ព័ន្ធ មិនមានវិធានការទប់ស្កាត់ឱ្យបានតឹងរ៉ឹងទេនោះ។ អន្ទាក់ត្រូវបានកម្លាំងសហគមន៍រកឃើញគេដាក់ពង្រាយនៅតាមទីតាំងដែលសម្បូរព្រៃក្រាស់ៗ និងចម្ការអំពៅដែលមានប្រភពទឹក។

លោកបញ្ជាក់ថា «អន្ទាក់គឺជាអាវុធដ៏សាហាវដែលអាចផ្តាច់ជីវិតសត្វកម្រទាំងនេះបានត្រឹមតែរយៈពេលខ្លី។ ការស្លាប់សត្វទន្សោងច្រើន គឺផ្តើមចេញពីអន្ទាក់ ទោះជាកម្លាំងសហគមន៍ប្រឹងប្រែងដើរដោះ យ៉ាងណាក៏មិនអស់ ដោយអន្ទាក់ត្រូវបានគេដាក់ និងនៅរាយប៉ាយពាសពេញតាមដងអូរ តាមជ្រលងភ្នំ និងនៅតាមចំនុចដែលកម្លាំងសហគមន៍ពិបាកចូលទៅដល់ ហើយពេលវាជាប់ទើបវារត់ចូលមកក្នុងសហគមន៍ ដើម្បីរកការអន្តរាគមន៍ជួយសង្គ្រោះ ខ្លះក៏សង្គ្រោះបានតែពិការ ខ្លះក៏សង្គ្រោះមិនបានបណ្តាលឱ្យវាងាប់»។

លោកបន្តថា «ជាងនេះសត្វដែលងាយរងគ្រោះធ្ងន់ធ្ងរ គឺពេលដែលវាចាកចេញពីព្រៃសហគមន៍ដើម្បីទៅរកទឹកផឹក ព្រោះនៅទីនោះក្រុមព្រានព្រៃតែងតែដាក់ពង្រាយអន្ទាក់ដើម្បីប្រម៉ាញ់ និងចាប់សត្វកម្រទាំងនេះ។ ប៉ុន្តែបច្ចុប្បន្នបទល្មើសទាំងនោះត្រូវបានថយចុះយ៉ាងច្រើននោះដោយសារមានការសហការបានល្អរវាង សហគមន៍ប្រាំបីមុំ ជាមូយអាជ្ញាធរពាក់ព័ន្ធក៏ដូចជាមានការជួយជ្រោមជ្រែងពីរដ្ឋបាលខេត្តកំពង់ស្ពឺផងដែរ។

ក្នុងឱកាសនោះ ឯកឧត្តម ស៊្រុន ស៊្រន់ បានថ្លែងកោតសសើរដល់សហគមន៍ប្រាំបីមុំ  អាជ្ញាធរពាក់ព័ន្ធដែលបានសហការគ្នាបានល្អក្នុងការទប់ស្កាត់បទល្មើសព្រៃឈើ និងសត្វព្រៃពិសេសសត្វទន្សោងឱ្យបាននៅគង់វង្ស។ សត្វទន្សោងគឺជាពូជគោព្រៃដ៏ស្រស់ស្អាតមួយ ហើយត្រូវបានគេចាត់ទុកជាបុព្វបុរសរបស់ពូជគោស្រុកប្រចាំតំបន់អាស៊ីអាគ្នេយ៍។ រាជរដ្ឋាភិបាលកម្ពុជា ដែលមានក្រសួងកសិកម្ម រុក្ខាប្រមាញ់ និងនេសាទ ព្រមទាំងរដ្ឋបាលថ្នាក់ក្រោមជាតិជាសេនាធិការ បានប្តេជ្ញាចិត្តបន្តការការពារធនធានសត្វព្រៃនៅកម្ពុជា ដូចជាសត្វទន្សោង ឱ្យមាននិរន្តរភាពសម្រាប់ជំនាន់ក្រោយ៕

ដោយ លឹម សាន្ត