AKP ថ្ងៃទី៣០ ខែឧសភា ឆ្នាំ២០២៥--ពិធីចុះហត្ថលេខាលើអនុសញ្ញាស្តីពីការបង្កើតអង្គការអន្តរជាតិសម្រាប់ការសម្រុះសម្រួល បាននិងកំពុងប្រព្រឹត្តទៅនៅតំបន់រដ្ឋបាលពិសេសហុងកុងនៃប្រទេសចិននៅព្រឹកថ្ងៃទី៣០ ខែឧសភា ឆ្នាំ២០២៥ នេះ ដោយមានការចូលរួមពីសមាជិកការិយាល័យនយោបាយនៃគណៈកម្មាធិការមជ្ឈិមបក្សចិន CPC និងជារដ្ឋមន្ត្រីការបរទេសចិន លោក វ៉ាង យី (Wang Yi) ព្រមទាំងមន្រ្តីជាន់ខ្ពស់ និងគណប្រតិភូជាង ៦០ប្រទេសមកពីអាស៊ី អាហ្រ្វិក អាមេរិកឡាទីន និងអឺរ៉ុប និងអង្គការអន្តរជាតិប្រហែល២០ រួមទាំងតំណាងអង្គការសហប្រជាជាតិ។

លោក វ៉ាង យី បានចុះហត្ថលេខាលើអនុសញ្ញានៃការបង្កើតអង្គការអន្តរជាតិសម្រាប់ការសម្រុះសម្រួល (IOMed) ហើយតំណាងប្រទេសហត្ថលេខីទាំងអស់ដោយនៅក្នុងនោះ លោកជំទាវ ចម និមល រដ្ឋមន្រ្តីក្រសួងពាណិជ្ជកម្មនៃព្រះរាជាណាចក្រកម្ពុជា ក៏បានចូលរួមតំំណាងប្រទេសកម្ពុជា និងបានចុះហត្ថលេខាលើអនុសញ្ញានោះផងដែរ។

អង្គការអន្តរជាតិសម្រាប់ការសម្រុះសម្រួលនេះត្រូវបានបង្កើតឡើងក្រោមគំនិតផ្តួចផ្តើមរបស់ប្រទេសចិន និងបណ្តាប្រទេសផ្សេងទៀតជិត ២០ប្រទេសដែលមានគោលជំហរស្រដៀងគ្នា បន្ទាប់ពីកិច្ចចរចាស្តីពីអនុសញ្ញាស្តីពីការបង្កើតអង្គការអន្តរជាតិសម្រាប់ការសម្រុះសម្រួលនេះត្រូវបានបញ្ចប់ ហើយភាគីទាំងអស់បានយល់ព្រមដាក់ទីស្នាក់ការកណ្តាលរបស់ខ្លួននៅទីក្រុងហុងកុង ប្រទេសចិន។

អង្គការអន្តរជាតិសម្រាប់ការសម្រុះសម្រួលនេះ គឺជាវេទិកាសកលលោក ស្តីពីការសម្របសម្រួលអន្តរជាតិ ដើម្បីធ្វើការពិភាក្សាទៅលើការសម្របសម្រួលជម្លោះរវាងរដ្ឋ និងរដ្ឋនិងការសម្រុះសម្រួលជម្លោះរវាងរដ្ឋមួយ និងអ្នកវិនិយោគបរទេស និងជម្លោះពាណិជ្ជកម្ម ក្នុងចំណោមបញ្ហាផ្សេងៗទៀត។

ការសម្រុះសម្រួល គឺជាវិធានការសំខាន់មួយដើម្បីដោះស្រាយវិវាទដែលមានចែងក្នុងធម្មនុញ្ញអង្គការសហប្រជាជាតិ ខណៈដែលវាជាមធ្យោបាយមួយដែលមានលក្ខណៈមិត្តភាពជាងគេក្នុងការដោះស្រាយវិវាទ ហើយការសម្រុះសម្រួល គឺជាការគោរពយ៉ាងពេញលេញនូវឆន្ទៈរបស់ភាគីពាក់ព័ន្ធ ហើយមានគុណសម្បត្តិពិសេសនៃភាពបត់បែន មានភាពងាយស្រួល មានការចំណាយទាប និងធ្វើឱ្យការអនុវត្តកាន់តែមានប្រសិទ្ធភាព។ មិនតែប៉ុណ្ណោះ វាជាការឆ្លុះបញ្ចាំងពីប្រពៃណីនៃមិត្តភាព និងភាពសុខដុមរមនាដ៏មានតម្លៃ។

ជាមួយនឹងគោលបំណងនៃការដោះស្រាយការខ្វែងគំនិត និងការដោះស្រាយវិវាទតាមរយៈការសម្រុះសម្រួល អង្គការអន្តរជាតិសម្រាប់ការសម្រុះសម្រួលនេះ នឹងក្លាយជាអង្គការផ្លូវច្បាប់អន្តររដ្ឋាភិបាលដំបូងគេរបស់ពិភពលោក ដែលផ្តល់នូវការដោះស្រាយវិវាទអន្តរជាតិតាមរយៈការសម្រុះសម្រួល ហើយនឹងដើរតួនាទីជាយន្តការដ៏សំខាន់មួយក្នុងការការពារគោលបំណង និងគោលការណ៍នៃធម្មនុញ្ញអង្គការសហប្រជាជាតិ។

មួយវិញទៀត ការបង្កើតអង្គការអន្តរជាតិសម្រាប់ការសម្រុះសម្រួលនេះ គឺជាការឆ្លើយតបទៅនឹងតម្រូវការរួមរបស់ប្រទេសនានាក្នុងពិភពលោកសម្រាប់សន្តិភាព ស្ថិរភាព និងការអភិវឌ្ឍ ហើយនិងការអំពាវនាវរបស់ពិភពលោកនាពេលបច្ចុប្បន្នសម្រាប់កិច្ចសហប្រតិបត្តិការ និងផលប្រយោជន៍ទៅវិញទៅមក៕

ដោយ៖ យា ចិន្តាខន្តី