AKP ភ្នំពេញ ថ្ងៃទី០២ ខែមិថុនា ឆ្នាំ២០២៥--ផ្លូវថ្មើរជើង (Walk Street) នៅសប្តាហ៍ទី១៦ គឺនៅថ្ងៃសៅរ៍ ទី៣១ ខែឧសភា និងថ្ងៃអាទិត្យ ទី០១ ខែមិថុនា នៅតែបន្ដទទួលបានការគាំទ្រច្រើនពីបងប្អូនប្រជាពលរដ្ឋ ខណៈខែវស្សាចូលមកហើយក្ដី។ ភាគច្រើនបងប្អូនប្រជាពលរដ្ឋចូលមកទស្សនាសិល្បៈល្ខោនខោល ល្ខោនបាសាក់ និងល្បែងផ្សេងៗជាច្រើនទៀត មិនខុសពីសប្តាហ៍កន្លងទៅឡើយ។ នេះបើតាម លោកស្រី ដោ សម្ផស្ស នាយិការងរដ្ឋបាល និងជាអ្នកនាំពាក្យសាលារាជធានីភ្នំពេញ បានឱ្យដឹងនៅថ្ងៃចន្ទ ទី០២ ខែមិថុនា ឆ្នាំ២០២៥។

លោកស្រីបានបញ្ជាក់ថា សម្រាប់សប្តាហ៍ទី១៦នេះនៅលើផ្លូវថ្មើរជើង (Walk Street) បានលើកយកនូវផ្ទាំងទស្សនីយភាពសិល្បៈចំនួនពីរ ដើម្បីយកមកសម្ដែងជូនភ្ញៀវជាតិ អន្តរជាតិ និងពុក ម៉ែ បងប្អូន ទាំងអស់គ្នា បានទស្សនា ក្នុងនោះទស្សនីយភាពសិល្បៈល្ខោនខោល និងទស្សនីយភាពសិល្បៈ ល្ខោនបាសាក់។

ផ្លូវថ្មើរជើង (Walk Street) គ្រោងនឹងបើកសម្ពោធជាផ្លូវការ នាថ្ងៃទី២១ ខែមិថុនា ឆ្នាំ២០២៥ខាងមុខនេះ ក្រោមអធិបតីភាពដ៏ខ្ពង់ខ្ពស់ពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ក្រោយពីផ្លូវថ្មើរជើងនេះបានបើកឱ្យដំណើរការជាបណ្តោះអាសន្នអស់រយៈពេលជាង៤ខែ ហើយទទួលបានការគាំទ្រ និងពេញនិយមយ៉ាងខ្លាំងពីសំណាក់ប្រជាពលរដ្ឋ និងភ្ញៀវជាតិ-អន្តរជាតិ ដោយពួកគេមកដើរលងកម្សាន្តយ៉ាងកុះករ ក្នុងទឹកមុខសប្បាយរីករាយ ជាមួយនឹងចំណីអាហារ ត្រូវបានរៀបចំកាន់តែសម្បូរបែបពីមួយសប្តាហ៍ទៅមួយសប្តាហ៍។

បច្ចុប្បន្នផ្លូវថ្មើរជើង (Walk Street) គឺជាកន្លែងដ៏ពេញនិយមរបស់ប្រជាជនខ្មែរ រួមទាំងភ្ញៀវជាតិ និងអន្ដរជាតិ  ពីមួយសប្តាហ៍ ទៅមួយសប្តាហ៍ មានអ្នកទៅលេងកម្សាន្តរាប់ពាន់នាក់ ព្រមទាំងមានការបង្ហាញពីវប្បធម៌ខ្មែរ ជាច្រើនរួមទាំងការកម្សាន្ត និងម្ហូបអាហារចម្រុះ ជាពិសេស នំបញ្ចុកខ្មែរ ជាអាហារដ៏ពេញនិយម នៅទីនោះមានរាប់សិបកន្លែងផងដែរ៕

ដោយ សួស សំរិត