AKP រតនគិរី ថ្ងៃទី០៧ ខែមិថុនា ឆ្នាំ២០២៥–សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានគូសបញ្ជាក់ថា ការអភិវឌ្ឍនៅតាមខ្សែបន្ទាត់ព្រំដែន​ គឺជាយុទ្ធសាស្រ្តដ៏សំខាន់បំផុត សម្រាប់ការពារទឹកដីប្រទេសកម្ពុជា មិនអាចឱ្យបរទេសរំលោភបំពានបានឡើយ ។

ការថ្លែងរបស់សម្តេចធិបតី ខាងលើនេះ ធ្វើឡើងក្នុងឱកាសអញ្ជើញជាអធិបតី ក្នុងពិធីសម្ពោធអគារសិក្សា អគារទីចាត់ការ អគារសយនដ្ឋាន អគារពិសោធន៍ និង សមិទ្ធផលនានា​ ក្នុងវិស័យអប់រំខេត្តរតនគិរី ដែលជាអំណោយដ៏ថ្លៃថ្លារបស់ សម្តេចតេជោ ហ៊ុន សែន ប្រធានព្រឹទ្ធសភា ជូនជាចំណងដៃ ដល់ប្រជាពលរដ្ឋនៅខេត្តរតនគិរី នាព្រឹកថ្ងៃទី៧ ខែមិថុនា ឆ្នាំ២០២៥ ។

ក្នុងឱកាសនោះ សម្តេចធិបតី បានរំលឹកថា ក្រោយចប់សង្គ្រាម សម្តេចតេជោ បានរៀបចំផែនការធ្វើយ៉ាងណា រុញការអភិវឌ្ឍខេត្តនៅទិសឦសាន ឱ្យមានការអភិវឌ្ឍក្នុងល្បឿនលឿន ដើម្បីបិទនូវគម្លាតនៅក្នុងការអភិវឌ្ឍប្រទេស ដោយក្នុងគោលនយោបាយមួយ​ ភ្ជាប់ទៅនឹងគម្រោង CLV DTA ខណៈដែលសម្តេចបញ្ជាក់សាជាថ្មីថា គម្រោង CLV ដែលបានដាក់បញ្ចូលខេត្ត៤ របស់កម្ពុជា ក្នុងគម្រោងនេះ មិនមែនជាការប្រគល់ខេត្តឱ្យទៅប្រទេសគេនោះទេ ។

ជាមួយគ្នា សម្តេចធិបតី បានសង្គត់ធ្ងន់ថា ប្រជាពលរដ្ឋកម្ពុជាទូទាំងប្រទេស ជាពិសេសពលរដ្ឋ ដែលរស់នៅក្នុងខេត្តទាំង៤​ នៃទិសឦសានបានយល់ច្បាស់ជាងគេ ថាចាប់តាំងពីគម្រោងនេះបង្កើតឡើងនៅឆ្នាំ២០០៤ មកដល់ឆ្នាំ២០២៤ ប្រទេសកម្ពុជា ក៏ដូចជាខេត្តទាំងនេះ មិនមានបាត់អ្វីនោះទេ ហើយក៏គ្មានប្រជាជនប្រទេសណាមួយ ចូលមករស់នៅនោះដែរ ផ្ទុយទៅវិញប្រជាពលរដ្ឋ ដែលរស់នៅក្នុងខេត្តទាំង៤ រួមមាន ខេត្តរតនគីរី មណ្ឌលគីរី ស្ទឹងត្រែង និងក្រចេះ កាន់តែរីកចម្រើន និងទទួលបានការតភ្ជាប់ជាមួយបណ្តាលខេត្តនានា កាន់តែងាយស្រួល រួមទាំងជនជាតិភាគតិចទៀតសោត សុទ្ធតែទទួលបានផល ពីការអភិវឌ្ឍផងដែរ​ ។

បន្ថែមលើនេះ សម្តេចធិបតី​ ហ៊ុន ម៉ាណែត បានបញ្ចាក់ថា ការធានាឱកាស សម្រាប់កូនចៅប្រជាពលរដ្ឋខ្មែរ មិនថាសាសនាអ្វី ឬជនជាតិភាគតិចណាទេ ឱ្យតែរស់នៅក្នុងដីខ្មែរ គឺបានផលទាំងអស់ ហើយថែមទាំងបានរួមគ្នា ការពារអធិបតេយ្យភាពជាតិរបស់កម្ពុជា តាមរយៈការអភិវឌ្ឍនៅក្នុងខេត្ត កសាងផ្លូវព្រំដែន និងរៀបចំបង្កបង្កើនប្រជាជនឱ្យបានច្រើន កាន់តែខ្លាំងរឹងមាំនៅក្នុងនេះ ។

ក្នុងនោះ សម្តេចធិបតី ក៏បានគូសបញ្ជាក់ថា បើធ្វើរបងតាមបន្ទាត់ព្រំដែនជាមួយប្រទេសជិតខាង កម្ពុជាគ្មានភាពចាំបាច់ក្នុងការធ្វើរនោះទេ ហើយការធ្វើរបងទៀតសោត ក៏នៅតែបិទមនុស្សមិនជាប់នោះដែរ ។

សម្តេចធិបតី​ មានប្រសាសន៍ថា «ផ្ទុយទៅវិញ គឺការការអភិវឌ្ឍនៅតាមព្រំដែន អភិវឌ្ឍខេត្តនៅជាប់ព្រំដែន គឺជាការយុទ្ធសាស្ត្រដែលល្អបំផុត នៅក្នុងការការពារទឹកដី បូរណភាពទឹកដីរយៈពេលវែង គឺយើងយកប្រជាពលរដ្ឋ យកការអភិវឌ្ឍនៅទីនោះ គឺជាអ្នកចាំដីឱ្យយើងជាជាងដាក់ទ័ពចាំដី យើងគ្មានទ័ពគ្រប់ទៅពង្រាយ នៅតាមព្រំដែនរាប់ពាន់គីឡូទេ ចឹងមានតែការអភិវឌ្ឍតាមព្រំដែន រុញប្រជាពលរដ្ឋទៅធ្វើ បើកច្រកសេដ្ឋកិច្ច ដើម្បីឱ្យមនុស្សទៅនៅ មនុស្សកសាងអភិវឌ្ឍន៍គាត់មើលកន្លែងនេះ ទំនាក់ទំនងជាមួយប្រទេសជិតខាង ប្រជាជនដែលរស់នៅព្រំដែននៃប្រទេសជិតខាង គោរពគ្នាទៅវិញទៅមក ជួយគ្នាទៅវិញទៅមក សហប្រតិបត្តិការល្អ នេះគឺជាគោលនយោបាយ ក្នុងការអភិវឌ្ឍ និងការពារទឹកដីរបស់យើង នៅតាមបណ្តោយព្រំដែនដែលយើងបានធ្វើ ហើយនេះគឺជាគោលការណ៍ដែលត្រូវធ្វើ»៕
ដោយ៖ គង់ សិរីរ័ត្ន, រូបថត៖ គល់ រ៉េននី