AKP ភ្នំពេញ ថ្ងៃទី១៣ ខែមិថុនា ឆ្នាំ២០២៥

ឯកឧត្តម ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មានបានណែនាំដល់សិស្ស និស្សិត ត្រូវមានការគោរពនូវវិន័យ និងសីលធម៌ ព្រោះវាជាមូលដ្ឋានគ្រឹះដ៏សំខាន់បំផុតទាំងក្នុងជីវិតសិក្សាក៏ដូចជាការរស់នៅប្រចាំថ្ងៃនៅក្នុងសង្គមសម្រាប់មនុស្សគ្រប់រូប ហើយវិន័យនាំឱ្យយើងមានសេចក្តីថ្លៃថ្នូរ មានការគោរពពីគ្រប់មជ្ឈដ្ឋាន និងទទួលបានជោគជ័យលើការងារ។ ការលើកឡើងរបស់ឯកឧត្តម ទេព អស្នារិទ្ធ យ៉ាងដូច្នេះគឺជាការរំលឹកបន្ថែមដល់សិស្សនិស្សិតនៃសាកលវិទ្យាល័យ ប៊ែលធី អន្តរជាតិ ដែលបានបញ្ចប់វគ្គកម្មសិក្សារបស់ខ្លួននៅតាមអគ្គនាយកដ្ឋានជំនាញ ដែលស្ថិតក្រោមចំណុះក្រសួងព័ត៌មាន សម្រាប់ការចុះមកសិក្សាស្វែងយល់អស់រយៈពេល៤ថ្ងៃកន្លងមកនេះ ហើយត្រូវបានបិទបញ្ចប់នាព្រឹកថ្ងៃទី១៣ ខែ មិថុនា ឆ្នាំ២០២៥ នៅទីស្ដីការក្រសួងព័ត៌មាន។ 

ឯកឧត្តមអនុរដ្ឋលេខាធិការបានបញ្ជាក់ថា ពិតណាស់ការណ៍ដែលបុគ្គលម្នាក់មានវិន័យ និងមានសីលធម៌ វាគឺជារឿងសំខាន់ខ្លាំងណាស់ទាំងនៅលើការសិក្សារៀនសូត្រ ការប្រកបការងារ និងការរស់នៅជាប្រចាំថ្ងៃដោយក្មួយៗជាសិស្ស និស្សិតត្រូវប្រកាន់យកវាឱ្យបានខ្ជាប់ខ្ជួន នោះទើបធ្វើឱ្យការសិក្សារបស់ក្មួយៗទទួលបានជោគជ័យ។ ឯកឧត្តម អនុរដ្ឋលេខាធិការបានជម្រាបជូនថ្នាក់ដឹកនាំ លោកគ្រូ អ្នកគ្រូ និងសិស្ស និស្សិតនៃសាកលវិទ្យាល័យ ប៊ែលធី អន្តរជាតិ ដែលជាកម្មសិក្សានូវសកម្មភាពការងារជាច្រើនដែលក្រសួងព័ត៌មានបានបំពេញក្នុងវិស័យផ្សព្វផ្សាយក៏ដូចជាសកម្មភាពនានានៃកិច្ចសហប្រតិបត្តិការជាមួយបណ្តាប្រទេសជាដៃគូពាក់ព័ន្ធដែលបានគាំទ្រជាសម្ភារ និងបច្ចេកទេសសម្រាប់កិច្ចដំណើរការផ្សព្វផ្សាយព័ត៌មានក្នុង និងក្រៅប្រទេសប្រកបដោយការទទួលខុសត្រូវ និងមានប្រសិទ្ធភាពខ្ពស់ ដោយបច្ចុប្បន្ននេះក្រសួងព័ត៌មានបានចេញផ្សាយជាទៀងទាន់នូវព័ត៌មានជាភាសាខ្មែរ អង់គ្លេស បារាំង អារ៉ាប់  និងគ្រោងផ្សាយជាភាសាចិននៅពេលខាងមុខថែមទៀតផង។ 

ឯកឧត្តម ទេព អស្នារិទ្ធ បានគូសបញ្ជាក់ថា ក្រសួងព័ត៌មានសូមស្វាគមន៍យ៉ាងកក់ក្តៅបំផុតចំពោះក្រុមដែលចង់មកធ្វើកម្មសិក្សានៅក្រសួងព័ត៌មាន ដែលនេះជាលើកទី៦ហើយ សម្រាប់ក្រសួងព័ត៌មានបានបើកវគ្គកម្មសិក្សាសម្រាប់សិស្ស និស្សិតមកពីគ្រឹះស្ថានអប់រំ ដើម្បីឱ្យពួកគេទទួលបានចំណេះដឹង និងបទពិសោធន៍មួយចំនួនដែលពួកគេមិនធ្លាប់បានដឹង និងមិនធ្លាប់បានឃើញពីមុនមកសម្រាប់ទុកជាមូលដ្ឋានស្រាវជ្រាវ និងយកទៅចែករំលែកដល់ស្រទាប់យុវជន និងមហាជនគ្រប់មជ្ឈដ្ឋាន ជាពិសេសពីរបៀបនៃការរៀបចំកម្មវិធីផ្សព្វផ្សាយព័ត៌មានរបស់អគ្គនាយកដ្ឋានជំនាញ និងពីរបៀបនៃការទទួលបានព័ត៌មានត្រឹមត្រូវ ចៀសវាងការទទួលបានព័ត៌មានមិនពិត ឬ ព័ត៌មានក្លែងក្លាយនោះ ដែលភាគច្រើនគេឃើញមាននៅលើប្រព័ន្ធទំនាក់ទំនងសង្គម រួមមាន ហ្វេសប៊ុក តិកតុក ជាដើម៕

ដោយ៖ ចាន់ សុភឿន