AKP ភ្នំពេញ ថ្ងៃទី១៣ ខែមិថុនា ឆ្នាំ២០២៥--

ឯកឧត្តមសាស្ត្រាចារ្យ  ឈាង  រ៉ា  រដ្ឋមន្ត្រីក្រសួងសុខាភិបាល បានមានប្រសាសន៍ថា យើងជាផលិតផលនៃការទទួលទានរបស់យើង យើងទទួលទានល្អ នាំឱ្យយើងមានសុខភាពល្អ លើសពីអ្វីដែលយើងមាន។ ឯកឧត្តមសាស្ត្រាចារ្យបានមានប្រសាសន៍ដូច្នេះ ក្នុងពិធីប្រកាសដាក់ឱ្យប្រើប្រាស់ជាផ្លូវការ «ផែនទីបង្ហាញផ្លូវសម្រាប់ពន្លឿនការកែលម្អអាហារូបត្ថម្ភ ឆ្នាំ២០២៥ ដល់ ២០៣០» “Fast Track Road Map for improving Nutrition 2023-2030” ដើម្បីជំរុញឱ្យមានការអនុវត្តចូលរួមកាត់បន្ថយបញ្ហាកង្វះអាហារូបត្ថម្ភគ្រប់ទំរង់សម្រាប់ស្រ្តី និងកុមារ នាថ្ងៃទី១៣ ខែមិថុនា ឆ្នាំ២០២៥។ 

ឯកឧត្តមសាស្រ្តាចារ្យរដ្ឋមន្រ្តី បានគូសរំលេចថា ដើម្បីលើកកម្ពស់សុខុមាលភាពប្រជាពលរដ្ឋក្នុងសហគមន៍ អភិបាលនៃគណៈអភិបាលរាជធានី-ខេត្ត ត្រូវមានរៀបចំសូចនាករឱ្យបានច្បាស់លាស់ជាអ្នកអនុវត្ត ហើយមន្ទីរសុខាភិបាលរាជធានី-ខេត្ត មន្ទីរពេទ្យគ្រប់លំដាប់ថ្នាក់ ត្រូវសហការជាមួយមជ្ឈមណ្ឌលជាតិលើកកម្ពស់សុខភាព ក្នុងការផលិតសារអប់រំសំខាន់ៗ ពីរបបអាហារហូបចុកដែលមានសុខុមាលភាព។  មន្ទីរសុខាភិបាល ត្រូវរៀបចំ៖ ១) ផែនការយុទ្ធសាស្រ្ត ដោយត្រូវមានស្ថានភាពបច្ចុប្បន្ន លក្ខខណ្ឌប្រកបបញ្ហាប្រឈម ២) ផែនការសកម្មភាព ជាពិសេសប្រជាពលរដ្ឋ ដែលខ្វះខាតអាហារូបត្ថម្ភ តាមទីជនបទ ៣) តាមដានឱ្យបានជាប់ប្រចាំ ការលូតលាស់របស់កុមារ ដោយត្រូវវាស់កម្ពស់ ថ្លឹងគីឡូ ភាពស្គមស្គាំង និងប្រាជ្ញារបស់កុមារ។

ឯកឧត្តមសាស្រ្តាចារ្យរដ្ឋមន្រ្តីបានលើកឡើងថា ស្របតាមយុទ្ធសាស្ត្របញ្ចកោណដំណាក់កាលទី១ សម្រាប់កំណើនការងារសមធម៌ ប្រសិទ្ធភាព និងនិរន្តរភាព បានអនុម័តនូវអាទិភាពសំខាន់ៗ ជាពិសេស ការអភិវឌ្ឍមូលធនមនុស្សនៅតែជាអាទិភាពចម្បង ហើយការផ្តោតសំខាន់មួយនោះ គឺការកែលម្អសុខភាព និងសុខុមាលភាពរបស់ប្រជាជន។ ផែនទីបង្ហាញផ្លូវសម្រាប់ពន្លឿនការកែលម្អអាហារូបត្ថម្ភ ឆ្នាំ២០២៥-២០៣០ ដើម្បីពង្រឹងការប្តេជ្ញាចិត្តថ្នាក់ជាតិ សម្រាប់ការកែលម្អអាហារូបត្ថម្ភ ផ្អែកលើអាទិភាពជាតិ និងយុទ្ធសាស្រ្ត ក្នុងការបង្កើនគុណភាពសេវាដែលពាក់ព័ន្ធនឹងអាហារូបត្ថម្ភ ដើម្បីកែលម្អទម្លាប់នៃការទទួលទានរបបអាហារដែលល្អ ចំពោះសុខភាព។

ក្នុងឱកាសនោះ ឯកឧត្តមសាស្រ្តាចារ្យរដ្ឋមន្រ្តី បានផ្តល់អនុសាសន៍គន្លឹះ ដើម្បីឈានទៅសម្រេចបាននូវគោលដៅនានានៃផែនទីបង្ហាញផ្លូវនេះ ក្រសួង និងស្ថាប័នពាក់ព័ន្ធ រដ្ឋបាលរាជធានី ខេត្ត មន្ទីរសុខាភិបាល ដៃគូអភិវឌ្ឍន៍ អង្គការមិនមែនរដ្ឋាភិបាល សូមចូលរួមសហការ សម្របសម្រួល គាំទ្រ ក្នុងការអនុវនូវផែនទីបង្ហាញផ្លូវនេះឱ្យបានជោគជ័យ ដូចជា៖ ១.  គ្រប់មូលដ្ឋានសុខាភិបាលសូមលើកម្ពស់ការទទួលបានព័ត៌មាន ការផ្តល់ប្រឹក្សាអំពីអាហារូបត្ថម្ភ និងសេវាសុខភាព និងអាហារូបត្ថម្ភ ដែលមាននៅមូលដ្ឋានសុខាភិបាល ប្រកបដោយគុណភាព ដើម្បីលើកកម្ពស់ការអនុវត្តរបបអាហារគ្រប់គ្រាន់ ចម្រុះមុខ ជាពិសេសស្រ្តីក្នុងវ័យបន្តពូជ ស្រ្តីមានផ្ទៃពោះ និងម្តាយ និងប្រើប្រាស់សេវាដែលរួមមានសេវាសុខភាពមុនពេលសម្រាល និងក្រោយសម្រាល។ «យើងហូបអាហារបៃតង យើងនឹងមានសុខភាពល្អ»។ ២. គ្រប់មូលដ្ឋានសុខាភិបាល ត្រូវបង្កើននូវការទទួលបានព័ត៌មាន ប្រឹក្សាអំពីអាហារូបត្ថម្ភ និងសេវាសុខភាព និងអាហារូបត្ថម្ភដែលមាននៅមូលដ្ឋានសុខាភិបាលប្រកបដោយគុណភាព ដើម្បីកម្ពស់ការអនុវត្តបំបៅកូនដោយទឹកដោះម្តាយ ការផ្តល់អាហារបន្ថែមគ្រប់គ្រាន់ និងចម្រុះមុខអាហារ តាមដានការលូតលាស់ ទទួលថ្នាំគ្រាប់វីតាមីនអា និងការអនុវត្តថែទាំកុមារតូចជាដើម។ ៣. បង្កើនអត្រាគ្របដណ្តប់ក្នុងការស្រាវជ្រាវរកឱ្យឃើញ និងព្យាបាលបញ្ហាកង្វះអាហារូបត្ថម្ភស្រួចស្រាល់ធ្ងន់ធ្ងរ និងមធ្យម និងរួមបញ្ចូលការធ្វើបច្ចុប្បន្នភាពគោលការណ៍ថែទាំ និងព្យាបាលនានា ការធ្វើផែនការ និងប៉ាន់ប្រមាណការផ្គត់ផ្គង់អាហារព្យាបាល ការកសាងសមត្ថភាពបុគ្គលិកសុខាភិបាល ការចូលរួមរបស់សេវាឯកជនក្នុងការផ្គត់ផ្គង់ និងពង្រឹងប្រព័ន្ធតាមដានទិន្នន័យ។ ៤. សហការលើគាំទ្រទៅលើវិស័យអប់រំ ដើម្បីចូលរួមលើកកំពស់អាហារូបត្ថម្ភ សម្រាប់កុមារនៅតាមសាលារៀន ក្នុងការទទួលបានគ្រាប់ថ្នាំជាតិដែកប្រចាំសប្តាហ៍  ថ្នាំទំលាក់ព្រូនគ្រប់គ្រាន់ ព័ត៌មានអំពីអាហារសុខភាព និងលើកកម្ពស់ ការអនុវត្តទទួលទានអាហារសុខភាព ស្របតាម «គោលនយោបាយស្តីពីសុខភាពសិក្សា» និងផែនការសកម្មភាពពាក់ព័ន្ធ។ ៥. គាំទ្រការកែលម្អគុណភាពទិន្នន័យអាហារូបត្ថម្ភ តាមរយៈការកសាងសមត្ថភាព ការបង្កើតភស្តុតាង ការផ្លាស់ ប្តូរព័ត៌មាន ពង្រីកអត្រាគ្របដណ្តប់សុខភាពជាសកល និងផ្តល់អាទិភាពដល់តំបន់ដែលងាយរងគ្រោះដោយផ្អែកលើភស្តុតាង កសាងធនធានមនុស្ស។ ៦. សហការការងារអន្តរវិស័យក្នុងការវិនិយោគទៅលើអន្តរាគមន៍អាហារូបត្ថម្ភ  ការទទួលបានការគាំទ្រនានាដែលគាំទ្រអាហារូបត្ថម្ភដូចជា សេវាគាំពារសង្គម  ទឹកស្អាតនិងអនាម័យ ស្បៀង ការបញ្ចូលមីក្រូសារជាតិក្នុងចំណីអាហារ៕

ដោយ ទេស ច័ន្ទសុធារី (ប្រភព៖ ក្រសួងសុខាភិបាល)