AKP ភ្នំពេញ ថ្ងៃទី១៤ ខែមិថុនា ឆ្នាំ២០២៥-

ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជាមានព្រះរាជឱង្ការថា ទិវាគុណលោកឪពុក គឺជាសារដ៏មានសារៈសំខាន់ក្នុងការបង្កើនការយល់ដឹងអំពីគុណតម្លៃ វប្បធម៌កតញ្ញូដ៏មហាសាលនៃបិតាគ្រប់រូប ដែលមានសន្តានចិត្តប្រកបដោយព្រហ្មវិហារធម៌ គឺមេត្តា ករុណា មុទិតា ឧបេក្ខា ជាធម៌សម្រាប់ប្រោះព្រំជានិច្ចនិរន្តរ៍ ចំពោះបុត្រគ្រប់រូប។

នេះបើយោងតាមព្រះរាជសាររបស់ព្រះអង្គ ចុះថ្ងៃទី១៤ ខែមិថុនា ឆ្នាំ២០២៥ ប្រទានជូនជនរួមជាតិ ក្នុងឱកាសនៃទិវាគុណលោកឪពុក ថ្ងៃទី១៦ ខែមិថុនា ឆ្នាំ២០២៥។

ក្នុងព្រះរាជសារ ព្រះករុណា ព្រះមហាក្សត្រ មានព្រះរាជឱង្ការ លើកឡើងថា «នៅក្នុងឱកាសនៃទិវាគុណលោកឪពុក នៅថ្ងៃទី១៦ ខែមិថុនា ឆ្នាំ២០២៥ ទូលព្រះបង្គំជាខ្ញុំ ខ្ញុំព្រះករុណា ខ្ញុំ សូមសម្តែងនូវហឫទ័យសោមនស្សរីករាយឥតឧបមា អបអរសាទរយ៉ាងជ្រាលជ្រៅ រួមជាមួយព្រះសង្ឃ និងបងប្អូនជនរួមជាតិទាំងអស់ ជាទីគោរពនឹករលឹក និងស្រឡាញ់ដ៏ជ្រាលជ្រៅ បំផុត»។

ព្រះអង្គបានគូសបញ្ជាក់ថា «ទិវាគុណលោកឪពុក គឺជាសារដ៏មានសារៈសំខាន់ក្នុងការបង្កើនការយល់ដឹងអំពីគុណតម្លៃ វប្បធម៌កតញ្ញូដ៏មហាសាលនៃបិតាគ្រប់រូប ដែលមានសន្តានចិត្តប្រកបដោយព្រហ្មវិហារធម៌ គឺមេត្តា ករុណា មុទិតា ឧបេក្ខា ជាធម៌សម្រាប់ប្រោះព្រំជានិច្ចនិរន្តរ៍ ចំពោះបុត្រគ្រប់រូប។ លោកឪពុក ជាគ្រឹះដ៏រឹងមាំក្នុងសង្គមគ្រួសារ តែងតែមើលបីបាច់ថែរក្សាចិញ្ចឹមបុត្រ និងបារម្ភពីបុត្រគ្រប់ពេលវេលា ព្រមទាំងមានគុណធ្ងន់មហិមា ពុំអាចពិពណ៌នារៀបរាប់បាន។ លោកឪពុកលោកជាបុព្វទេវា នៃបុត្រ គ្រប់រូប ដូច្នេះចូរបុត្រទាំងឡាយគោរពដឹងគុណចំពោះលោកឪពុក។ ទន្ទឹមនេះ លោកឪពុកមានភារកិច្ច បង្កនូវសេចក្តីរីករាយ សុខសប្បាយចម្រើនរុងរឿង សម្រាប់ការអភិវឌ្ឍសេដ្ឋកិច្ចសង្គមប្រកបដោយ ចីរភាព និងបានលើកកម្ពស់គុណតម្លៃជាបុរស ប្រកបដោយសីលធម៌ និងគុណធម៌»៕

ដោយ៖ ជឹម ណារី