AKP ព្រះសីហនុ ថ្ងៃទី១៤ ខែមិថុនា ឆ្នាំ២០២៥--

សប្បុរសជនបាននាំយកថវិកា និងគ្រឿងឧបភោគបរិភោគឧបត្ថម្ភជូនអនុសាខាកាកបាទក្រហមកម្ពុជាស្រុកព្រៃនប់ នៅអនុសាខាកាកបាទក្រហមកម្ពុជាស្រុកព្រៃនប់ កាលពីរសៀលថ្ងៃសុក្រ ទី១៣ ខែឧសភា ឆ្នាំ២០២៥ ដើម្បីអបអរសាទរខួបទី១៦២ ទិវាពិភពលោកកាកបាទក្រហម និងអឌ្ឍចន្ទក្រហម ក្រោមប្រធានបទ "រួមគ្នាស្ម័គ្រចិត្ត ដើម្បីសហគមន៍មានសុខភាពល្អ និងមានភាពធន់នឹងអាកាសធាតុ"។

 
លោក អ៊ី ធារិន ប្រធានអនុសាខាកាកបាទក្រហមកម្ពុជាស្រុកព្រៃនប់ បានថ្លែងអំណរដល់សប្បុរសជនក្នុងស្រុកព្រៃនប់ និងសប្បុរសជននៅក្រៅស្រុក ដែលបាននាំយកថវិកា និងសម្ភារប្រគល់ជូនអនុសាខាកាកបាទក្រហម ដែលនេះជាការចូលរួមការងារមនុស្សធម៌ក្នុងស្រុកព្រៃនប់ ក៏ដូចជាការងារមនុស្សធម៌ក្នុងខេត្តព្រះសីហនុផងដែរ ព្រមទាំងបានធ្វើការអំពាវនាវចំពោះឯកឧត្តម លោកជំទាវ អ្នកឧកញ៉ា ឧកញ៉ា លោក លោកស្រី អ្នកនាងកញ្ញា ជាសប្បុរសជនគ្រប់មជ្ឈដ្ឋាន និងបងប្អូនជនរួមជាតិ សូមចូលរួមបរិច្ចាគថវិកា និងគ្រឿងឧបភោគ បរិភោគទៅតាមសទ្ធាជ្រះថ្លា ជូនដល់អនុសាខាកាកបាទក្រហមកម្ពុជា ស្រុកព្រៃនប់ ក្នុងឱកាសខួបលើកទី១៦២ ទិវាពិភពលោកកាកបាទក្រហម និងអឌ្ឍចន្ទក្រហម ៨ឧសភា ឆ្នាំ ២០២៥ ដើម្បីឱ្យសាខាមានធនធាន និងលទ្ធភាពបន្តផ្តល់សេវាកម្មមនុស្សធម៌ដោះស្រាយបញ្ហាប្រឈមនានា បន្តពង្រឹងភាពធន់សហគមន៍ និងជួយសម្រាលទុក្ខលំបាករបស់ប្រជាពលរដ្ឋរងគ្រោះ និងងាយរងគ្រោះបំផុត ស្របតាមគោលការណ៍គ្រឹះរបស់ចលនាអន្តរជាតិកាកបាទក្រហម និងអឌ្ឍចន្ទក្រហម។

លោកប្រធានអនុសាខាកាកបាទក្រហមកម្ពុជា សង្ឃឹម និងជឿជាក់យ៉ាងមុតមាំថា សម្តេច ឯកឧត្តម លោកជំទាវ អ្នកឧកញ៉ា ឧកញ៉ា លោក លោកស្រី អ្នកនាងកញ្ញា និងសប្បុរសជនគ្រប់មជ្ឈដ្ឋាន អាជីវករ ពាណិជ្ជករ និងប្រជាពលរដ្ឋ នឹងចូលរួមយ៉ាងច្រើនកុះករក្នុងការជួយឧបត្ថម្ភជាថវិកា សម្ភារដល់អនុសាខាកាកបាទក្រហមកម្ពុជា ស្រុកព្រៃនប់បន្តទៀតពុំខានឡើយ។ ហើយក្រុមការងារអនុសាខានៅរង់ចាំទទួលអំណោយអំណោយសប្បុរសធម៌ពីបងប្អូនសប្បុរសជនគ្រប់មជ្ឈដ្ឋានរៀងរាល់ម៉ោងធ្វើការ នៅអនុសាខាកាកបាទក្រហមកម្ពុជា ស្រុកព្រៃនប់។

អំណោយដែលទទួលបានមានដូចជា ក្រុមហ៊ុន ហ្គ្រេនបូកគោ មានក្រុមហ៊ុនចំនួន៤ បាននាំយកគ្រឿងបរិភោគ និងភេសជ្ជៈ រួមមាន អង្ករ ៤០បាវ ភេសជ្ជៈកូកាកូឡា ៤០កេស ទឹកបរិសុទ្ធ ១០កេស។ ដោយឡែកក្រុមហ៊ុន រុនហ្ស៊ី ម៉ៅ ហ៊ែល ឯ.ក អង្ករចំនួន ២ ០០០គីឡូក្រាម មីចំនួន ៤០កេស ទឹកសុទ្ធចំនួន ១០០កេស និងថវិកាចំនួន ២ ០០០ដុល្លាអាមេរិក៕

ដោយ ងូ សុមុនី