AKP កំពង់ស្ពឺ ថ្ងៃទី១៤ ខែមិថុនា ឆ្នាំ២០២៥--

លោកជំទាវ ខា ឡេង រដ្ឋលេខាធិការក្រសួងពាណិជ្ជកម្ម កាលពីថ្ងៃទី១៣ ខែមិថុនា ឆ្នាំ២០២៥ បានអញ្ជើញជាអធិបតីក្នុងពិធីបើកសិក្ខាសាលាផ្សព្វផ្សាយច្បាប់ស្តីពី ប្រតិបត្តិការដែលមានកិច្ចធានា និងរបៀបប្រើប្រាស់ ប្រព័ន្ធតម្កល់លិខិតជូនដំណឹងនៃប្រតិបត្តិការដែលមានកិច្ចធានា ដោយមានការអញ្ជើញចូលរួមពីលោកប្រធានមន្ទីរពាណិជ្ជកម្មខេត្ត  លោក លោកស្រីមកពីស្ថាប័នជាច្រើនផ្សេងៗគ្នានៃវិស័យសាធារណៈ និងឯកជន គ្រឹះស្ថានធនាគារ និងមីក្រូហិរញ្ញវត្ថុ ស្ថាប័នពាក់ព័ន្ធ និងមន្ត្រីរាជការនៃមន្ទីរពាណិជ្ជកម្មខេត្តកំពង់ស្ពឺ សរុបប្រមាណជា ៦០នាក់ នៅសាលប្រជុំមន្ទីរពាណិជ្ជកម្មខេត្តកំពង់ស្ពឺ។

‎លោក ញ៉ឹល សំបូរ ប្រធានមន្ទីរពាណិជ្ជកម្មខេត្តកំពង់ស្ពឺ ពិតជាមានសេចក្តីសោមនស្សរីករាយបំផុតចំពោះវត្តមានលោកជំទាវ  និងក្រុមហ៊ុន តំណាងស្ថាប័ន អង្គភាពពាក់ព័ន្ធ  ដែលបានអញ្ជើញចូលរួមក្នុងសិក្ខាសាលាស្តីពី «ច្បាប់ស្តីពី ប្រតិបត្តិការដែលមានកិច្ចធានានិងការប្រើប្រាស់តម្កល់ លិខិតជូនដំណឹងនៃប្រតិបត្តិការដែលមានកិច្ចធានា » ដែលសហការរៀបចំឡើងដោយក្រសួងពាណិជ្ជកម្ម និងមន្ទីរពាណិជ្ជកម្មខេត្តកំពង់ស្ពឺ ដើម្បីបង្កើនការយល់អំពីខ្លឹមសារអត្ថប្រយោជន៍សិទ្ធិនិងកាតព្វកិច្ចនានានៅ ក្នុងច្បាប់ជូនទៅដល់ពាណិជ្ជករ ក្រុមហ៊ុន ហាងបញ្ចាំ ជាពិសេសគ្រឹះស្ថាន ធនាគារ មីក្រូហិរញ្ញវត្ថុ និងការិយាល័យមេធាវី។

ក្នុងឱកាសនោះ លោកជំទាវរដ្ឋលេខាធិការបានស្វាគមន៍ និងថ្លែងអំណរគុណដល់ដៃគូអភិវឌ្ឍន៍ ដូចជាស្ថាប័នពាក់ព័ន្ធនៃវិស័យសាធារណៈនិងឯកជន គ្រឹះស្ថានធានាគារនិងមីក្រូហិរញ្ញវត្ថុ តំណាងមេធាវី ជាដើម ចំពោះការគាំទ្រសម្រាប់ការអភិវឌ្ឍវិស័យពាណិជ្ជកម្មនៅកម្ពុជាពិសេសវិស័យពាណិជ្ជកម្មខេត្តកំពង់ស្ពឺ ដែលការគាំទ្រទាំងនេះបានចូលរួមចំណែកយ៉ាងសំខាន់ក្នុងការអភិវឌ្ឍវិស័យពាណិជ្ជកម្ម កសាងសមត្ថភាពពាណិជ្ជកម្ម និងជំរុញកំណើនសេដ្ឋកិច្ចនៅកម្ពុជា។

ជាមួយគ្នានេះ លោកជំទាវរដ្ឋលេខាធិការបានបញ្ជាក់ពីគោលបំណងសំខាន់ក្នុងការរៀបចំបង្កើតយន្តការសម្របសម្រួលជាមួយដៃគូអភិវឌ្ឍន៍ក្នុងវិស័យពាណិជ្ជកម្មនៅកម្ពុជាលើការធានា និងស្នើសុំឱ្យមានការចូលរួមសហការពីដៃគូអភិវឌ្ឍន៍ក្នុងដំណើរការអនុវត្តយន្តការសម្របសម្រួលរវាងដៃគូអភិវឌ្ឍន៍ ជាមួយក្រសួងពាណិជ្ជកម្មនេះឱ្យបានជោគជ័យ ក្នុងគោលបំណងដើម្បីពង្រឹងកិច្ចសហប្រតិបត្តិការឱ្យកាន់តែរឹងមាំ និងការអនុវត្តគម្រោងក្នុងកម្មវិធីពាក់ព័ន្ធនានាក្នុងវិស័យពាណិជ្ជកម្មលើកាធានានៅកម្ពុជាពិសេសខេត្តកំពង់ស្ពឺឱ្យកាន់តែមានប្រសិទ្ធិភាពខ្ពស់៕

ដោយ លឹម សាន្ត