AKP បន្ទាយមានជ័យ ថ្ងៃទី១៤ ខែមិថុនា ឆ្នាំ២០២៥--

ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានអញ្ជើញជាអធិបតីដ៏ខ្ពង់ខ្ពស់ក្នុងពិធីសម្ពោធដាក់ឱ្យប្រើប្រាស់ជាផ្លូវការនូវអគាររដ្ឋបាល អគារស្នាក់នៅ និងហេដ្ឋារចនាសម្ព័ន្ធនានារបស់សាខាគយ និងរដ្ឋាករខេត្តបន្ទាយមានជ័យ និងអគាររដ្ឋបាល អគារស្នាក់នៅ និងហេដ្ឋារចនាសម្ព័ន្ធនានា នៃការិយាល័យគយ និងរដ្ឋាករបឹងត្រកួន ស្រុកថ្មពួក។ ពិធីដ៏មានសារៈសំខាន់នេះត្រូវបានប្រារព្ធឡើងស្ថិតក្នុងភូមិគោរដ្ឋាន សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ នាព្រឹកថ្ងៃសៅរ៍ ទី១៤ ខែមិថុនា ឆ្នាំ២០២៥។

ការសាងសង់អគាររដ្ឋបាល អគារស្នាក់នៅ និងហេដ្ឋារចនាសម្ព័ន្ធនានានេះ គឺជាផ្នែកមួយនៃការប្តេជ្ញាចិត្តរបស់រាជរដ្ឋាភិបាលកម្ពុជាក្នុងការកែលម្អហេដ្ឋារចនាសម្ព័ន្ធរូបវន្តរបស់ស្ថាប័នរដ្ឋ ជាពិសេសអគ្គនាយកដ្ឋានគយ និងរដ្ឋាករកម្ពុជា ដើម្បីឆ្លើយតបទៅនឹងកំណើនសេដ្ឋកិច្ច ពាណិជ្ជកម្ម និងការវិនិយោគ។ ហេដ្ឋារចនាសម្ព័ន្ធទំនើបទាំងនេះនឹងរួមចំណែកយ៉ាងសំខាន់ក្នុងការលើកកម្ពស់បរិយាកាសការងារប្រកបដោយផាសុកភាព និងប្រសិទ្ធភាពខ្ពស់ សម្រាប់មន្ត្រីគយ និងរដ្ឋាករក្នុងការបំពេញភារកិច្ចរបស់ខ្លួន។

ក្នុងឱកាសដ៏ឧត្តុង្គឧត្តមនេះ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន បានមានប្រសាសន៍ទៅកាន់អង្គពិធីទាំងមូល ដោយបានគូសបញ្ជាក់អំពីសារៈសំខាន់នៃសមិទ្ធផលថ្មីនេះ។ ការសម្ពោធដាក់ឱ្យប្រើប្រាស់ជាផ្លូវការនូវអគាររដ្ឋបាល អគារស្នាក់នៅ និងហេដ្ឋារចនាសម្ព័ន្ធនានា របស់សាខាគយ និងរដ្ឋាករខេត្តបន្ទាយមានជ័យ និងការិយាល័យគយ និងរដ្ឋាករបឹងត្រកួននាពេលនេះ គឺជាសក្ខីភាពមួយបញ្ជាក់យ៉ាងច្បាស់អំពីកិច្ចខិតខំប្រឹងប្រែងរបស់រាជរដ្ឋាភិបាល ក្នុងការកែលម្អ និងពង្រឹងសមត្ថភាពស្ថាប័នរដ្ឋ ជាពិសេសអគ្គនាយកដ្ឋានគយ និងរដ្ឋាករកម្ពុជា។ ហេដ្ឋារចនាសម្ព័ន្ធទំនើបទាំងនេះនឹងក្លាយជាមូលដ្ឋានដ៏រឹងមាំមួយក្នុងការលើកកម្ពស់ប្រសិទ្ធភាពការងារ តម្លាភាព និងគណនេយ្យភាព ក្នុងការប្រមូលចំណូលពន្ធគយ ដែលជាសរសរស្តម្ភដ៏សំខាន់មួយសម្រាប់ថវិការដ្ឋក្នុងការទ្រទ្រង់ការអភិវឌ្ឍប្រទេសជាតិ។

ជាមួយគ្នានោះ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្នបាន ជំរុញឱ្យមន្ត្រីគយ និងរដ្ឋាករទាំងអស់ បន្តខិតខំប្រឹងប្រែងយកចិត្តទុកដាក់បំពេញការងារប្រកបដោយស្មារតីទទួលខុសត្រូវខ្ពស់ ប្រកាន់ខ្ជាប់នូវក្រមសីលធម៌វិជ្ជាជីវៈ និងអនុវត្តច្បាប់បទប្បញ្ញត្តិឱ្យបានត្រឹមត្រូវ ដើម្បីធានាបាននូវភាពយុត្តិធម៌ តម្លាភាព និងប្រសិទ្ធភាពក្នុងការផ្តល់សេវាសាធារណៈ ក៏ដូចជាទប់ស្កាត់អំពើអសកម្មនានា។

សមិទ្ធផលថ្មីនេះនឹងរួមចំណែកយ៉ាងសំខាន់ក្នុងការសម្រួលដល់ការធ្វើធុរកិច្ច ការវិនិយោគ និងការធ្វើពាណិជ្ជកម្មឆ្លងកាត់ព្រំដែនប្រកបដោយប្រសិទ្ធភាព ដែលនឹងជំរុញកំណើនសេដ្ឋកិច្ចជាតិ និងការលើកកម្ពស់ជីវភាពរស់នៅរបស់ប្រជាពលរដ្ឋក្នុងតំបន់។ ពិធីសម្ពោធនេះបានឆ្លុះបញ្ចាំងពីការប្តេជ្ញាចិត្តរបស់រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃរបស់សម្ដេចមហាបវរធិបតី ហ៊ុន ម៉ាណែត ក្នុងការបន្តអនុវត្តនូវកំណែទម្រង់ស៊ីជម្រៅលើគ្រប់វិស័យ ដើម្បីកសាងមូលដ្ឋានសេដ្ឋកិច្ចរឹងមាំ និងធានាបាននូវការអភិវឌ្ឍប្រកបដោយចីរភាព និងបរិយាបន្ន។ អគាររដ្ឋបាលថ្មីទាំងនេះនឹងក្លាយជាសញ្ញាណដ៏សំខាន់មួយនៃការរីកចម្រើនរបស់ខេត្តបន្ទាយមានជ័យ ក្នុងការរួមចំណែកដល់ការសម្រេចបាននូវចក្ខុវិស័យកម្ពុជាឆ្នាំ២០៥០៕

ដោយ ឈុន សារ៉ាត