AKP ភ្នំពេញ ថ្ងៃទី១៧ ខែមិថុនា ឆ្នាំ២០២៥--ឯកឧត្តម ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មានបានថ្លែងថា ក្រសួងព័ត៌មាន មានតួនាទីភារកិច្ចធ្វើកិច្ចការងារទៅលើវិស័យព័ត៌មាន និងសោតទស្សន៍ ដោយបច្ចុប្បន្នក្រសួងព័ត៌មាន មានអគ្គនាយកដ្ឋានចំណុះចំនួន៣គឺ អគ្គនាយកដ្ឋានទីភ្នាក់ងារសារព័ត៌មានកម្ពុជា (AKP)  អគ្គនាយកដ្ឋានវិទ្យុជាតិកម្ពុជា និងអគ្គនាយកដ្ឋានទូរទស្សន៍ជាតិកម្ពុជា ដែលបាន និងកំពុងសកម្មក្នុងការផ្តល់ព័ត៌មានរហ័ស ពិត ជូនទៅដល់សាធារណជនទាំងក្នុង និងក្រៅប្រទេស ដែលស្ថាប័នព័ត៌មានទាំង៣នេះគឺជាសេនាធិការដ៏សំខាន់របស់រាជរដ្ឋាភិបាលកម្ពុជា។ ការថ្លែងបញ្ជាក់របស់អ្នកនាំពាក្យក្រសួងព័ត៌មាននេះ បានធ្វើឡើងនៅក្នុងកម្មវិធីបញ្ចប់ការចុះធ្វើកម្មសិក្សារបស់និស្សិតចំនួន១២០នាក់ មកពីសាកលវិទ្យាល័យ ប៊ែលធី អន្តរជាតិ  កំពុងសិក្សាឆ្នាំទី១លើមុខជំនាញព័ត៌មានវិទ្យា (IT) នៅទីស្តីការក្រសួងព័ត៌មាន នាព្រឹកថ្ងៃទី១៧ ខែមិថុនា ឆ្នាំ ២០២៥។

ឯកឧត្តម ទេព អស្នារិទ្ធ បានថ្លែងថា ទិសដៅយុទ្ធសាស្ត្ររបស់ក្រសួងព័ត៌មានរួមមាន ១.ការធ្វើទំនើបកម្ម ស្ថាប័ន និងការកសាងរដ្ឋបាលទំនើប ២.ពង្រឹងបទដ្ឋានបច្ចេកទេស និងការទទួលខុសត្រូវវិជ្ជាជីវៈ ៣. អភិវឌ្ឍន៍ធនធានមនុស្ស និងបណ្តុះស្មារតីមនសិការវិជ្ជាជីវៈ ៤.រៀបចំប្រព័ន្ធ និងយន្តការគ្រប់លំហព័ត៌ មាន និង៥. បង្កើនភាពជាដៃគូប្រកបដោយបរិយាបន្ន និងស័ក្តិសិទ្ធភាព ដែលទាំងនេះនឹងនាំឱ្យការធ្វើការងាររបស់ក្រសួងព័ត៌មានក្នុងការផ្តល់ព័ត៌មាន ឬក៏ដំណឹងទៅកាន់សាធារណជនកាន់តែលឿន និងកាន់តែមានប្រសិទ្ធភាពប្រកបដោយការជឿទុកចិត្ត ដែលព័ត៌មាន ឬដំណឹងដែលផ្សព្វផ្សាយចេញពីអគ្គនាយកដ្ឋាជំនាញរបស់ក្រសួងព័ត៌មានមិនត្រឹមសម្រាប់តែមហាជនក្នុងប្រទេសប៉ុណ្ណោះទេ តែថែមទាំង សម្រាប់អន្តរជាតិផងដែរ ខណៈដែលយើងមានដៃគូសហការក្នុងការផ្សព្វផ្សាយព័ត៌មានបន្តចំនួន១៨ ប្រទេសនៅក្នុងពិភពលោក។ ឯកឧត្តមបានបន្តថា ក្រសួងព័ត៌មាន បាន និងកំពុងខិតខំក្នុងការជំរុញ វិស័យព័ត៌មាន និងសោតទស្សន៍ឱ្យដើរតួនាទីកាន់តែពេញលេញ តាមទាន់សម័យបច្ចេកវិទ្យា ដោយក្រសួងបានដាក់ចេញនូវផែនការអភិវឌ្ឍន៍មូលធនមនុស្សរបស់ក្រសួង ដើម្បីធ្វើកិច្ចការនេះឱ្យប្រកបដោយប្រសិទ្ធភាពខ្ពស់។

ឯកឧត្តមអនុរដ្ឋលេខាធិការ និងជាអ្នកនាំពាក្យបានលើកឡើងថា បច្ចុប្បន្នពិភពលោកគឺមានប្រព័ន្ធផ្សាយព័ត៌មានច្រើនណាស់ តែរាល់ព័ត៌មានទាំងអស់មិនមែនសុទ្ធតែអាចយកជាការ និងអាចជឿទុកចិត្តបាននោះទេ ក្នុងនោះមានព័ត៌មាន ឬក៏ដំណឹងនៅលើបណ្តាញសង្គម រួមមាន ហ្វេសប៊ុក តិកតុក ជាដើម ខណៈដែលនៅកម្ពុជាយើង មានប្រភពព័ត៌មានផ្លូវការជាច្រើនដែលអាចទុកចិត្តបាន ដូចជា ប្រភពព័ត៌មានរបស់ថ្នាក់ដឹកនាំ ប្រភពព័ត៌មានរបស់ក្រសួង ស្ថាប័ន ក្នុងនោះយើងមានក្រសួងព័ត៌មានជាសេនាធិការរបស់រាជរដ្ឋាភិបាលក្នុងការផ្តល់ព័ត៌មាន លឿន រហ័ស និងជឿទុកចិត្តបានសម្រាប់សាធារណជនទាំងក្នុង និងក្រៅប្រទេស។

ក្នុងឱកាសនោះ ឯកឧត្ដមអ្នកនាំពាក្យក្រសួងព័ត៌មានបានជំរុញក្រុមនិស្សិតសាកលវិទ្យាល័យ ប៊ែលធី អន្តរជាតិ ដែលកំពុងសិក្សាលើមុខជំនាញបច្ចេកវិទ្យាព័ត៌មានវិទ្យា (IT) នៅគ្រប់ឆ្នាំសិក្សាទាំងអស់យកចិត្តទុកដាក់ក្នុងការសិក្សាស្រាវជ្រាវដើម្បីចាក់បញ្ចូលនូវចំណេះដឹងបន្ថែមពីលើអ្វីដែលប្អូនៗបានសិក្សានៅក្នុងថ្នាក់ ជាពិសេសការចុះធ្វើកម្មសិក្សាដោយផ្ទាល់នៅក្រសួងព័ត៌មាននាពេលនេះ គឺជាមូលដ្ឋានសំខាន់បំផុតក្នុងការទទួលបានចំណេះដឹងថ្មីៗ តាមរយៈបទបង្ហាញពីមន្ត្រីជំនាញមកពីអគ្គនាយកដ្ឋាននានាក្រោមឱវាទក្រសួងព័ត៌មាន៕

ដោយ៖ដោយ៖ ចាន់ សុភឿន , រូបថត៖ សួស សាវី