AKPកំពង់ធំថ្ងៃទី១៧ ខែមិថុនា ឆ្នាំ២០២៥ -- នៅទីបញ្ជាការតំបន់ប្រតិបត្តិការសឹករងកំពង់ធំយោធភូមិភាគ ៤នាព្រឹកថ្ងៃទី១៧ខែមិថុនាឆ្នាំ២០២៥បានដំណើរការរៀនសូត្រអប់រំចិត្តសាស្ត្រនិងផ្សព្វផ្សាយសភាពការណ៍ថ្មីៗ ព្រមទាំងបទបញ្ជារបស់ប្រមុខរាជរដ្ឋាភិបាលនិងថ្នាក់ដឹកនាំគ្រប់លំដាប់ថ្នាក់នៃកងយោធពលខេមរភូមិន្ទ ដែលពិធីនេះប្រព្រឹត្តទៅក្រោមអធិបតីភាព ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង និងឧត្តមសេនីយ៍ត្រី និតណារ៉ុង នាយសេនាធិការរង នៃបញ្ជាការដ្ឋានយោធភូមិភាគទី៤និងជាគ្រូឧទ្ទេសតំណាងឱ្យបញ្ជាការដ្ឋានយោធភូមិភាគទី៤។

ឧត្តមសេនីយ៍ទោ សោម ស៊ុន បានឡើងថ្លែងនូវការស្វាគមន៍និងបានរាយការណ៍អំពីសភាពការណ៍មួយចំនួន ក្នុងការគ្រប់គ្រងកម្លាំង ការគ្រប់គ្រងសតិអារម្មណ៍កងទ័ព និងទឹកចិត្តមោះមុត ស្នេហាជាតិប្រកបដោយភក្តីភាពចំពោះជាតិសាសនា និងព្រះមហាក្សត្រ ពិសេសនាយទាហាន នាយទាហានរង និងពលទាហាន នៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានប្ដេជ្ញាចិត្តដាច់ខាត ក្នុងការការពារជាតិ ការពារបូរណភាពទឹកដី និងការពាររាជរដ្ឋាភិបាលស្របច្បាប់ ដែលកើតឡើងពីការបោះឆ្នោត ដែលមានសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

ឧត្តមសេនីយ៍ត្រី និត ណារ៉ុង តំណាឱ្យឯកឧត្តម​ឧត្ដមសេនីយ៍​ឯក​ពៅ​ ហេង​មេបញ្ជាការ​រង​កងទ័ព​ជើង​គោក​ មេបញ្ជាការ​យោធភូមិភាគ​ទី​៤​បានថ្លែងអំណរគុណនឹងថ្លែងនូវការកោតសរសើរ ចំពោះឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសិករងនិងថ្នាក់ដឹកនាំ ព្រមទាំងនាយទាហានរងនិងពលទាហាននៃបញ្ជាការដ្ឋានតំបន់ប្រតិបត្តិការសឹករងកំពង់ធំ ដែលបានគោរពប្រតិបត្តិយ៉ាងម៉ឺងម៉ាត់ តាមលក្ខន្តិកៈនិងបទវិន័យទូទៅរបស់កងយោធពលខេមរភូមិន្ទ មានការសាមគ្គីភាពគ្នាបានល្អ និងបានបំពេញភារកិច្ចទទួលបានជោគជ័យតាមផែនការ ដែលយោធភូមិភាគទី៤ បានដាក់ចេញនាពេលកន្លងទៅ។

ឧត្តមសេនីយ៍ត្រី និត ណារ៉ុង បានឡើង​ឧទ្ទេសនាមអំពីសភាពការណ៍អន្តរជាតិ សភាពការណ៍ក្នុងតំបន់ និងសភាពការជាតិ ពិសេសព្រឹត្តិការណ៍ជាក់ស្ដែងដែលកំពុងកើតមានឡើងរវាងកម្ពុជា និងថៃ ហើយនិងស្ថានការណ៍នៅតាមព្រំដែនកម្ពុជា-ថៃ ព្រមទាំងការប្ដេជ្ញាចិត្តរបស់ប្រមុខរាជរដ្ឋាភិបាល និងការសាមគ្គីឯកភាពជាតិទាំងមូល បានដាក់​ពាក្យបណ្ដឹងស្ដីពីបញ្ហាជម្លោះនៅតំបន់ប្រាសាទតាមាន់តូច ប្រាសាទតាមមាន់ធំ ប្រាសាទតាក្របី និងតំបន់មុំបី ទៅតុលាការយុត្តិធម៌ អន្តរជាតិទីក្រុងឡាអេ (icj) ដើម្បីបញ្ចប់ជម្លោះរវាងកម្ពុជានិងថៃ ទោះបីជាភាគីថៃ ដែលជាចោរឈ្លានពានមិនហ៊ានឡើងទៅកាន់តុលាការយុតិ្តធម៍អន្តរជាតិក៏ដោយក្តី ។ 

ជាមួយនោះដែរឧត្តមសេនីយ៍ត្រី និត ណារ៉ុងក៏បានលេីកទឹកចិត្តឱ្យយោធិនគ្រប់រូប ត្រូវតែប្ដេជ្ញាចិត្តដាច់ខាត ក្នុងការការពារជាតិ ការពារបូរណភាពទឹកដី មិនឱ្យមានខ្មាំងសត្រូវណាមកឈ្លានពានបានឡើយ។
នាយទាហាន នាយទាហានរង និងពលទាហាននៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានយល់ជ្រួតជ្រាបកាន់តែច្បាស់ អំពីប្រវត្តិសាស្ត្រទឹកដី ដែលត្រូវ​បានឧទ្ទេសនាម និងបានប្ដេជ្ញាចិត្តដាច់ខាត គោរពប្រតិបត្តិតាមបទបញ្ជារបស់ថ្នាក់ដឹកនាំគ្រប់លំដាប់ថ្នាក់នៃកងយោធពលខេមរភូមិន្ទ ឱ្យមានប្រសិទ្ធភាព និងទទួលបានជោគជ័យ ដើម្បីជាតិនិងប្រជាជនកម្ពុជា៕

ដោយ៖ ស៊ុម វណ្ណា, ប្រភពតំបន់សឹករងកំពង់ធំ