AKP ភ្នំពេញ ថ្ងៃទី១៧ ខែមិថុនា ឆ្នាំ២០២៥ -- កីឡាការិនីលើកទម្ងន់កម្ពុជា រើន ស្រីនីត មិនទទួលបានមេដាយជូនជាតិទេ ក្នុងការប្រកួតកីឡាលើកទម្ងន់ជើងឯកអាស៊ីអាគ្នេយ៍ នៅប្រទេសសិង្ហបុរី ពីថ្ងៃទី១៣-១៥ ខែមិថុនា ឆ្នាំ២០២៥ ប៉ុន្តែកីឡាការិនីលើកទម្ងន់កម្ពុជារូបនេះបានបំបែកកំណត់ត្រាខ្លួនឯង ដោយលើកទម្ងន់បានសរុប ១៥០គីឡូក្រាម បំបែកកំណត់ត្រាចាស់សរុប ត្រឹម ១២៤គីឡូក្រាម នៅក្នុងការប្រកួតកីឡាស៊ីហ្គេម លើកទី៣២ កាលពីខែឧសភា ឆ្នាំ២០២៣កន្លងទៅ ដែលកម្ពុជាទទួលធ្វើម្ចាស់ផ្ទះ។

កីឡាការិនី រើន​ ស្រីនីត

នេះជាការបញ្ជាក់របស់លោក ផេង ប៉ាក អនុប្រធានសហព័ន្ធកីឡាលើកទម្ងន់កម្ពុជា ដែលលោកបានចូលរួមក្នុងការប្រកួតកីឡាលើទម្ងន់ជើងឯកអាស៊ីអាគ្នេយ៍ លើកទី១ ឆ្នាំ២០២៥ ក្នុងនាមជាមន្ត្រីអាជ្ញាកណ្តាលអន្តរជាតិរបស់កម្ពុជា។

កីឡាការិនី និងគ្រូបង្វឹកកម្ពុជា

លោក ផេង ប៉ាក បានគូសបញ្ជាក់ប្រាប់ទីភ្នាក់ងារសារព័ត៌មានកម្ពុជា AKP នៅរសៀលថ្ងៃទី១៧ ខែមិថុនា ឆ្នាំ២០២៥នេះថា ការប្រកួតកីឡាលើកទម្ងន់ជើងឯកអាស៊ីអាគ្នេយ៍ លើកទី១ (2025 SOUTH EAST ASIA WEIGHTLIFTING CHAMPIONSHIPS) ដែលប្រទេសសិង្ហបុរីធ្វើជាម្ចាស់ផ្ទះបានធ្វើឡើងនៅថ្ងៃទី ១៣-១៥ ខែមិថុនា ឆ្នាំ២០២៤។ សហព័ន្ធកីឡាលើកទម្ងន់កម្ពុជា មានមន្ត្រីអាជ្ញាកណ្តាលអន្តរជាតិកម្ពុជា ២រូបចូលរួម គ្រូបង្វឹក ១រូបនិងកីឡាការិនី ១រូបចូលរួមប្រកួតផងដែរ។ សូមជម្រាបថាសមាជិកសហព័ន្ធអាស៊ាននីមួយៗបានបញ្ជូនអត្តពលិករបស់ខ្លួនមកចូលរួមប្រកួតជើងឯកអាស៊ីអាគ្នេយ៍ លើកលែងតែប្រទេសឡាវ និងប្រទេសទីម័រខាងកើតប៉ុណ្ណោះ ដែលមិនបានបញ្ជូនអត្តពលិកចូលរួម។ សម្រាប់ការចូលរួមរបស់កម្ពុជា លទ្ធផលកីឡាការិនីកម្ពុជា ១រូបទៅចូលរួមមិនបានដណ្តើមបានមេដាយទេ ប៉ុន្តែកីឡាការិនី រើន ស្រីនីត បានបំបែកកំណត់ត្រាថ្មី ក្នុងការប្រកួតជើងឯកអាស៊ីអាគ្នេយ៍ នៅសិង្ហបុរី ឆ្នាំ២០២៥នេះ និងការប្រកួតស៊ីហ្គេម លើកទី៣២ នៅកម្ពុជា (ស៊ីហ្គេមលើកបាន សរុប ១២៤គីឡូក្រាម ពេលនេះ លើកទម្ងន់ បានសរុប ១៥០គីឡូក្រាម)។

លោក ថុម លាវ ប្រធានសហព័ន្ធកីឡាលើកទម្ងន់សិង្ហបុរី ដែលជាម្ចាស់ផ្ទះរៀបចំព្រឹត្តិការណ៍ប្រកួតជើងឯកអាស៊ីអាគ្នេយ៍ លើកទី១ ឆ្នាំ២០២៥បានកោតសរសើរដល់កីឡាការិនីកម្ពុជា ក្នុងការប្រកួតបានល្អ បើប្រៀបធៀបនឹងការប្រកួតស៊ីហ្គេម ២០២៣ កន្លងទៅ ដែលកម្ពុជាធ្វើជាម្ចាសផ្ទះ។ លោកបន្តថា កីឡាលើកទម្ងន់ជាប្រភេទកីឡាអូឡាំពិក ដោយគ្រប់អត្តពលិកទាំងអស់ហ្វឹកហាត់ត្រូវប្រើពេល ប៉ុន្តែកីឡាការិនីកម្ពុជាបានលទ្ធផលនេះ ពិតជាល្អខ្លាំងណាស់។ ចំពោះមន្ត្រីអាជ្ញាកណ្តាលអន្តរជាតិកម្ពុជា២រូបចូលរួមលើកនេះ គឺបានធ្វើការងារតាមកម្មវិធីប្រកួត ក្រឹត្យក្រមវិន័យ និងកាត់ក្តីដោយវិជ្ជាជីវៈត្រឹមត្រូវបានល្អ។

ជាមួយគ្នានេះ លោកស្រីបណ្ឌិត Sirilak Thatman សមាជិកគណៈកម្មធិការប្រតិបត្តិសហព័ន្ធកីឡាលើកទម្ងន់ពិភពលោក ក្នុងតួនាទីជាប្រធានចៅក្រមព្រឹត្តិការណ៍ SEA Championships នៅប្រទេសសិង្ហបូរី បានមានកោតសរសើរ និងវាយតម្លៃខ្ពស់ចំពោះការប្រកួតនីមួយៗ ក្រោមការកាត់សេចក្តីរបស់មន្ត្រីអន្តរជាតិទាំងអស់អស់ ដោយធ្វើបានល្អ និងសុក្រឹត្យយុត្តិធម៌ ដែលជាមោទនភាព សម្រាប់អាស៊ាទាំងមូល ក្នុងការរៀបចំការប្រកួតជើងឯកអាស៊ានជាលើកដំបូង ប៉ុន្តែដំណើរការប្រកួត ការកាត់សេចក្តីមានលក្ខណៈល្អប្រសើរ និងដំណើរការដោយរលូន ។

លោកបណ្ឌិត Niwat Limsukniran ប្រធានសហព័ន្ធកីឡាលើកទម្ងន់អាស៊ីអាគ្នេយ៍ (SEAWF) មានសេចក្តីសោមនស្សរីករាយចំពោះព្រឹត្តិការណ៍ SEA Championships (2025 SOUTH EAST ASIA WEIGHTLIFTING CHAMPIONSHIPS) ដែលធ្វើឡើងនៅប្រទេសសិង្ហបុរី ឆ្នាំ២០២៥ ដែលជាការជំរុញយ៉ាងខ្លាំងដល់ការអភិវឌ្ឍសម្រាប់សហព័ន្ធកីឡាលើកទម្ងន់អាស៊ាន។

គួរបញ្ជាក់ថា សហព័ន្ធកីឡាលើកទម្ងន់កម្ពុជាបានបញ្ជូនអាជ្ញាកណ្តាលអន្តរជាតិ ២រូប គឺលោក ផេង ប៉ាក និងលោកស្រី ពៅ គាថា គ្រូបង្វឹក លោកស្រី ទ្រី សុថាវី និងកីឡាការិនី រើន ស្រីនីត ទៅចូលរួមប្រកួតជើងឯកអាស៊ីអាគ្នេយ៍ នៅប្រទេសសិង្ហបុរី ចាប់ពីថ្ងៃទី១២-១៦ ខែមិថុនា ឆ្នាំ២០២៥ ដោយព្រឹត្តិការណ៍កីឡាលើកទម្ងន់ជើងឯកអាស៊ីអាគ្នេយ៍នេះត្រូវបានបង្កើតឡើងជាលើកទី១ ដើម្បីជំរុញដល់ដំណើរការអភិវឌ្ឍរបស់ប្រភេទកីឡាអូឡាំពិកមួយនេះឱ្យកាន់តែរីកចម្រើន នៅក្នុងតំបន់អាស៊ីអាគ្នេយ៍៕

ដោយ ហេង ណាលីន