AKPកំពង់ធំថ្ងៃទី០៩ខែឧសភាឆ្នាំ២០២៦ -- អនុវត្តតាមការចង្អុលដឹកនាំដ៏ខ្ពង់ខ្ពស់របស់ឯកឧត្ដម នាយឧត្ដមសេនីយ៍ ស ថេត អគ្គស្នងការនគរបាលជាតិ កាលពីថ្ងៃទី០៨ខែ ឧសភា ឆ្នាំ២០២៦ លោកឧត្តមសេនីយ៍ត្រី ខេន ឈុនគ័រ ស្នងការរងផែនការងារធនធានមនុស្ស តំណាងលោកឧត្តមសេនីយ៍ទោ ហេង សុផល ស្នងការនគរបាលខេត្តកំពង់ធំបានជួបសំណេះសំណាលប្រគល់ថវិកាសមាគមមិត្តនគរបាលជាតិកម្ពុជា ជូនសមាជិកនិងគ្រួសារសមាជិក ស្ថិតនៅស្នងការដ្ឋាននគរបាលខេត្ត។

ក្នុងឱកាសនោះលោកឧត្តមសេនីយ៍ត្រី ខេន ឈុនគ័រ ស្នងការរង បានពាំនាំនូវប្រសាសន៍ ផ្ដាំផ្ញើសាកសួរសុខទុក្ខពីសំណាក់លោកឧត្តមសេនីយ៍ទោ ហេង សុផល ស្នងការនគរបាលខេត្តនិងជាប្រធានគណៈកម្មាធិការមូលដ្ឋានសមាគមមិត្តនគរបាលជាតិ កម្ពុជា ជូនចំពោះសមាជិកទាំង០៥គ្រួសារព្រមទាំងថ្លែងចូលរួមរំលែកទុក្ខចំពោះមរណភាពស្វាមី ភរិយា ឪពុក ម្តាយ មនុស្សជាទីស្រឡាញ់ ក្នុងក្រុមគ្រួសារបងប្អូនគ្រប់ៗរូប។

លោកស្នងការរង បន្តថា ដោយមានការយកចិត្តទុកដាក់ពីសំណាក់ថ្នាក់ដឹកនាំក្រសួងមហាផ្ទៃនិងអគ្គស្នងការដ្ឋាននគរបាលជាតិចំពោះសមាជិក ដែលមានស្នាដៃ គុណបំណាច់យ៉ាងធំធេង ក្នុងបុព្វហេតុជាតិមាតុភូមិ ថ្ងៃនេះ ស្នងការដ្ឋាននគរបាលខេត្ត បានបើកថវិកាសមាគមមិត្តនគរបាលជាតិកម្ពុជា ជូនបងប្អូននាឱកាសនេះ សរុបប្រាក់ចំនួន១៨លានរៀល។ទី១-លោកវរសេនីយ៍ត្រី ម៉ិច សុខុម មន្ត្រីចូលនិវត្តន៍ នៃអធិការដ្ឋាននគរបាលក្រុង ស្ទឹងសែន ថវិកាចំនួន៦លានរៀល។ទី២.លោកអនុសេនីយ៍ឯក ឈុន ភាព មន្ត្រីចូលនិវត្តន៍នៃអធិការដ្ឋាននគរបាលស្រុកសណ្ដាន់ ថវិកាចំនួន៦លានរៀល។ទី៣-លោក ផាន់ ភាន ត្រូវជាស្វាមីលោកស្រី អនុសេនីយ៍ឯកសួស គឹមជ្រឿនមន្ត្រីចូលនិវត្តន៍នៃអធិការដ្ឋាននគរបាលស្រុកកំពង់ស្វាយ ថវិកាចំនួន២លានរៀល។ទី៤-លោកស្រី កែ ផន ត្រូវជាភរិយាលោកអនុសេនីយ៍ត្រី សេង គឹមស៊ា មន្ត្រីចូលនិវត្តន៍ នៃអធិការដ្ឋាននគរបាលស្រុកស្ទោង ថវិកាចំនួន ២លានរៀលនិងទី៥-លោកស្រី ទូច សុឃី ត្រូវជាភរិយាលោកព្រិន្ទបាលឯក ផាង សាង៉ែតមន្ត្រីចូលនិវត្តន៍ នៃអធិការដ្ឋាននគរបាលក្រុងស្ទឹងសែន ថវិកាចំនួន២លានរៀល។

លោកឧត្តមសេនីយ៍ត្រីស្នងការរងបានផ្ដាំផ្ញើ ដល់សមាជិកត្រូវថែទាំសុខភាព ដើម្បីបន្តចូលរួមការពារសន្តិភាព គោរពអនុវត្តគោលនយោបាយនានា របស់រាជរដ្ឋាភិបាល សំដៅថែរក្សាបាន សន្តិសុខ សណ្តាប់ធ្នាប់ សុវត្ថិភាពសង្គម។បន្តចូលរួមការងារបង្កបង្កើន ផល តាមរយៈ ដាំដំណាំបន្លែ ផ្លែឈើ ចិញ្ចឹមសត្វ ដើម្បីដោះស្រាយការចំណាយក្នុងជីវភាពជាប្រចាំថ្ងៃ តាមក្រុមគ្រួសារនីមួយៗ ឱ្យកាន់តែប្រសើរឡើង មួយកម្រិតទៀត។បើបងប្អូនមានបញ្ហាប្រឈមសូមទំនាក់ទំនងមក ថ្នាក់ដឹកនាំ ដើម្បីអង្គភាពមានមូលដ្ឋាន ជួយអន្តរាគមន៍ ដោះស្រាយ ជូនបងប្អូនបានទាន់ពេលវេលា៕

ដោយ៖ ស៊ុមវណ្ណា