AKP ភ្នំពេញ ថ្ងៃទី២៩ ខែកក្កដា ឆ្នាំ២០២៥ -- នាយកដ្ឋានការពារផ្លូវច្បាប់នៃក្រសួងកិច្ចការនារី ក្រោមការគាំទ្រហិរញ្ញវត្ថុពីអង្គការភ្លែនអន្តរជាតិកម្ពុជា និងការគាំទ្របច្ចេកទេសពីអង្គការយូនីសេហ្វកម្ពុជា និងមូលនិធិសហប្រជាជាតិសម្រាប់ប្រជាជន នាថ្ងៃអង្គារ ទី២៩ ខែកក្កដា ឆ្នាំ២០២៥ បានរៀបចំសិក្ខាសាលាពិគ្រោះយោបល់លើកទី២លើសេចក្ដីព្រាងផែនការសកម្មភាពជាតិស្ដីពីការបង្ការទប់ស្កាត់អាពាហ៍ពិពាហ៍នៅវ័យក្មេង និងការមានផ្ទៃពោះនៅវ័យជំទង់(២០២៥-២០៣០) ក្រោមអធិបតីភាពលោកជំទាវ ហ៊ូ សាមិត្ដ រដ្ឋលេខាធិការក្រសួងកិច្ចការនារី ដែលមានសមាសភាពអញ្ជើញចូលរួមពីក្រសួង ស្ថាប័នដែលជាសមាជិកក្រុមការងារឆ្លើយតបចំពោះអំពើហិង្សាទាក់ទងនឹងយេនឌ័រ (TWGG-GBV) នៅសណ្ឋាគារកាំបូឌីយ៉ាណា រាជធានីភ្នំពេញ។

សិក្ខាសាលានេះ មានគោលបំណង៖ ទី១. ពិនិត្យផ្ដល់យោបល់និងកែសម្រួលលើសេចក្ដីព្រាងផែនការសកម្មភាពជាតិស្ដីការបង្ការទប់ស្កាត់អាពាហ៍ពិពាហ៍នៅវ័យក្មេងនិងការមានផ្ទៃពោះនៅវ័យជំទង់ដើម្បីធានាផែនការសកម្មភាពជាតិនេះមានសង្គតិភាពនិងគោលនយោបាយជាតិនិងអន្ដរជាតិ។ ទី២. ប្រមូលធាតុចូលបន្ថែមទៀតពីក្រសួងស្ថាប័នដែលជាក្រុមការងារបច្ចេកទេសឆ្លើយតបចំពោះអំពើហិង្សាទាក់ទងនឹងយេនឌ័រ (TWGG-GBV) លើសកម្មភាពជាអាទិភាព និងយន្ដការនៃការអនុវត្ដផែនការសកម្មភាពជាតិប្រកបដោយប្រសិទ្ធភាព៕

ដោយ៖ ពេជ្រ សំអឿន (ប្រភព៖ ក្រសួងកិច្ចការនារី)